Повесть об осаде г. Михайлова гетманом Сагайдачным в 1618 г.

(Заимствуем этот редкий исторический памятник из редкого в своем роде издания Черниговских Губернских Ведомостей за 1853 г., № 33-й, в свое время заимствовавших оный из Рязанских Губернских Ведомостей.)

Полезна воспоминанию о преславном чудеся, како гетман Сагайдачный и Запороги град Михайлов облегоша бранию и мнози от Запорог погибоша, Божиим судом искушени бывше, град же невредим бысть молитвами Пресвятые Владычици нашея Богородицы и заступлением небесных сил архистратига Михаила и великого чудотворца Николы.

В лето 7126 (1618) при государе царе и великом князе Михаиле Феодоровиче всея России, король польский и литовский Жигимонт, хотя московское государство поглотити и конечному потреблению предати, а веру православную искоренити и преврати в свою латынскую веру, посла сына своего Владислава со многими людьми и вои под царствующий град Москву, а на Украйну посла гетмана, именем Петра Конашевича Сагайдачного и с ним Запороги до двадесяти тысящ, который, яко начальной сему всепагубному воровству и разоритель московского государства, внезяпу прииде с вои своими на Христово стадо, и, яко змии и лютин волцы хищницы, нападения на град Ливны и Елец и разорению предаша, люди же Божии, вкупе с женами и детьми, усты меча поядоша и сих кровию землю обагриша, а монастыри и церкви Божии расхитиша и огнем сожгоша. Но еще злочестивии крови христианские не насытишася, паки на достояние Божие вооружится. Собрався в сонмище сатанино, умыслиша напасти на область рязанскую и на прочие грады, хотяще [685] разорити их, якоже Ливны и Елец. Михайла Дорошенко Цапырков (?) и товарищи его со многими вои приидоша, грады поплениша — Лебедянь, Донков, Скопин, Ряской, а мужи, жены, дети до ссущих младенец, многими муками мучаще, посекоша, и нападоша на область рязанскую, посады пожгоша, люди и священники побиша, и ко граду Переяславлю рязанскому приступиша; но Божиею милостию и заступлением Владичицы нашея Богородицы чудотворные иконы Федотиевекие и помощию страстотерпцев Христовых Бориса и Глеба и молитвами святого Василия, епископа рязанского, на приступе мнози побиени быша, а прочие отшедше от града, воеваша рязанской уезд, и паки к Елцу поидоша и плениша воронежский уезд. Сам же окаянный всепагубный враг Петр Сагайдачной внезапу прииде с Елца в Шацкой град и в Донков и отпусти пред собою под град Михайлов полковника Милостивого, а с ним тысящу человек, и повелел ему нощию приити безвестно и взяти град Михайлов украдем. Михайловские же ратные люди в то время немнози быша на городовой стене, а иннии по городам на государеве службе в Калуге и Серпухове противу поганых ляхов. И долготерпеливый Господь и Бог наш, в Тройце славимый, и Пресвятая Владычица Богородица, христианская державная помощница, и небесных сил воевода архистратиг Михаил, и великий чудотворец Никола не даша конечному православным христианом потреблению быти, ожидая грешных покаяния. В ту нощь, в кую приходу Милостивого ко граду быти, за десять поприщ тучи и громи страшни быша с дождем необычным, и Милостивый с Запороги тою нощию не дойде до града, а прииде скорым приходом августа в 12 день, и в той же день внезапу приидоша во град Сапожковского города ратные люди до 40 человек, кои шли со службы, и вышед с вои сущими во граде, победиша воюющих Запорог и побиша множество; полковник же Милостивой отъиде от града с великим страхом. Услышавше о сем, начальник их Петр Сагайдачной наполнися многие ярости и прииде ко граду Михайлову со всеми собранными его вои, августа в 16-й день; и того же дня нощию приидоша Михайлова города ратные люди из Калуги и из Серпухова — черкес, стрельцев и Козаков до 80 человек. Сагайдачный изготовися с Запороги и приступи на [686] взятие града августа в 17-й день со многими злокозненными умыслы со всех стран, а наряд постави с двух стран и повеле из наряду стену града горящими ядры зажигати, а во град из луков стрелы со огнем пущати бесчисленно; приступаша же ко граду два дни да нощь, приметая примет к стене града. Людие градские, видяще беду свою, ужасошася и изнемогающе от многих приступов, абие вспомянуша, по писанию и Божию глаголу, како Господь Бог за умножение грехов восхоте погубити град Ниневию; егда же людие града того, услышавше от пророка Ионы о праведном гневе Божием, не точию сами восприяша пост и покаяние, но и младенцем и скотом ясти не даша и вси от сердца покаяшася: тогда долготерпеливый Владыка, Господь наш Иисус Христос не презри моления их и не погуби их. Тако и града Михайлова начальник и вси людие, видяще нападения врага и изнемогающе вельми, покаяшася вси мужа и жены о гресех своих и воздевше руце на небо, начаша молитися с плачем и воплем глаголюще: Владыко человеколюбце Царю! яко же древле излиял еси милость твою на град Ниневию и избавил живущих в нем от погибели, тако и ныне, Владыко Царю, призри на ны грешные от святого жилища Твоего, удиви милость твою на нас; не ищи в нас дел праведных, не обращеши бо в нас ничто же доброе; но яко же горький плачь апостола Петра приял еси, тако приими и наш плачь малый, отъими рукописание грехов наших и губою милосердия отри прегрешения наши по велицей Твоей милости, не презри горьких слез вопиющих к тебе, сотвори второе избавление граду и людям нареченным во имя Твое святое.

Тако плачущим и молящаяся всем живущим во граде, явися в то время чудо Пресвятые Богородицы: прийде в соборную церковь архистратига Михаила некто именем Митрофан и всем предстоящим в церкви поведа сице: случися мне, изнемогшу на защите града, воздремати и слышан глас, свыше глаголющ ко всем сущим во граде: не бойтеся от находящих на вы врагов, приидох аз, небесная Царица, на помощь к вам; станите добре и мужайтеся, а страх и ужас отриньте от сердец ваших. Слышавши сие, жителие града — священницы, клирицы, иночествующие и вси люди возопиша от среды сердца, воздеюще руце на небо и молящеся Господу Богу и Пречистей [687] Богоматери о ниспослании помощи ко избавлению от предстоящей погибели; а сущии внутрь града ратные люди, силою Божественною и заступлением Богоматери, возмогоша и охрабешася, врата града отверзоша и устремишася с воплем на враги, множество Запорог побиша, щиты, штурмы и приметы все пожгоша, и бе явно видети преславную помощь Владычицы нашея Богородицы. Сагайдачный же с Запороги отступи от града со страхом, кричаще абие гражданом: не блазнитеся о вашей силе и моем отходе, всячески утре град ваш, яко птицу, рукою моею возму, и пуста его положу и огню предам, а живущим в нем, малу и велику, повелю руку и ногу отсещи и повергнути псам. — И повеле всем своим Запорогом присягати на том, дабы, не взяв града, прочь от него не отходити, и изготовив щиты, штурмы и приметы, прииде на взятие града августа в 23-й день и обложи его со всех сторон снарядом. Жители же града, видяще грозящую им погибель, взята нерукотворенный образ Господа Бога и Спаса нашего Иисуса Христа, да образ Владычицы Богородицы Одигитрии, да образ местный небесных сил архистратига Михаила и великого чудотворца Николы, преходя по стенам града, моляхуся тако: защитниче наш Господи, Господи, призри от святого жилища Твоего на скорбь и озлобление людей Твоих, отжени и низложи враги наши, да не рекут нам, где Бог их? Ты бо еси Бог наш, иже гордым сопротивляешися, а на смиренные оком милосердым призираеши; на Тя уповаем и от Твоея десницы избавления чаем, Твоя бо держава неприкладна и владычество нерушимо. Избавя град и люди Твоя от предстоящие беды и напасти.

Тако молящимся и плачущимся со священным клиром всем людем явися чудо святого Николы чудотворца. Прииде в соборную церковь архистратига Михаила некто, именем Димитрий, портной мастер и поведа священником и всем предстоящим в церкви: случися мне во время утреннего пения в хижицы моей тонце уснути, и прииде ко мне некий человек стар, власы на главе имея сединами украшены и начат мя будити. Егда же аз яко бодрствен бых, поведа ми тако: почто у вас во граде страх и ужас на всех и плачь неутешим? Вы же не бойтеся, но молитеся и уповайте; услышана бо бысть молитва ваша и посылает Бог к вам на помощь великого чудотворца [688] Николу. И повеле мне возрети на полуденную страну и, возревшу ми, видех грядуща с небеси великого чудотворца Николу на воздусе: ризы на нем быша белы, яко снег, и на главе его венец светел, подобен злату. От видения сего ужасохся аз страхом велиим и трепетен бых. Будящий же повелел сказати священником и всему миру, чтобы ходили со святыми иконы и кресты и молилися Богу и Преблагословенней Владычице Богородице, и Бог не предаст вас в руки врагов. Слышавше сие, священницы и вси людие взяша из соборные церкви хоруговь, на ней же написан нерукотворенный образ Господа Бога и Спаса нашего Иисуса Христа, а на другой стране образ небесных сил архистратига Михаила, да образ защитницы нашея Богородицы запрестольный и других церквей святые иконы и поидоша на большой приступ к сторожевой башни, где Запороги примет пристанища к стене града, наполниша рвы ко граду землею и имеяху лестницы готовы ради на град восхождения; во граде же и у ратных людей зелие в то время истощась. И бишася вои и жителие со враги ручным оружием и со стены града древом и камением метаху, а иннии, вышед из подградные стены в подкопы с оружием мечным, многих Запорог побиша, и сами мнози за веру живот свой положиша, а прочии начаша зело изнемогати и скорбети. Приидоша же мнози Запороги и ко архангельским вратам с многими умыслы на взятие града и начата зажигали стену града. В то время принесоша во врата запрестольный образ Владычицы нашея Богородицы, да хоруговь архистратига Михаила и образ великого чудотворца Николы, градские же воины и людие начаша вопити с плачем велим о избавлении града от погибели. И заступлением архистратига Божия Михаила и великого чудотворца Николы градские вои со гражданы охрабрешась, врата града отверзоша и начаша поражати враги со многою силою и одолением. И бе видети преславное избранное воеводство Владыцицы нашея Богородицы, яко отроцы и жены устремишася на Запороги и множество их побиша. Во истину совершися реченное: яко един гоняше тысящи. Такову крепость некрепким и силу немощным дарова Небесная Царица и заступница рода христианского, яко минувшей нощи, а дню наставшу, щиты, штурмы и приметы, яже бяху привезли Запороги на взятие града, и трупиева (?) [689] огню предаша, а священницы, клирицы, иночествующие, начальник града и сущий с ним людский народ, пришед в соборную церковь, руки на небо воздеюще, пеша молебны, благодаряще со слезами Господу Богу и Спасу нашему Иисусу Христу и Пренепорочной Матери Его, Владычице нашей Богородице, и небесных сил воеводе, архистратигу Михаилу, и великому чудотворцу Николе о преславном чудеси, о избавлении града от предстоящие погибели. А всепагубный враг Сагайдачный с остальными Запороги своими отъиде от града со страхом и скорбию августа в 27-й день.

Чудо первое архистратига Михаила: егда стояше Сагайдачный под градом, в то время некто от Запорог умысли разрушити себе на потребу храм на посаде во имя архистратига Михаила, возлезе на храм и нача раскрывати и абие взыде на него страх и ужас и погибе.

Чудо второе архистратига Михаила: егда поиде от града Сагайдачный с Запороги, повеле на посаде храмы и домы вси сожещи, и жегоша все храмы и посады, а на посаде стояша два храма во имя архистратига Михаила и Николы чудотворца в великой тесноте среди дворов; и около их вси домы погореша, а храмы милостию Божиею и заступлением архистратига Михаила и великого чудотворца Николы от огня невреждени быша.

И оттоле мы жители богохранимого града Михайлова совершаем по вся лета торжественные празднества в те дни, в первый приступный день, августа в 17-й день, чудо архистратига Михаила, а об отшествии от града Запорог августа в 27-й день празднуем великому чудотворцу Николе.

Примечание. Подлинник приведенного документа, как отмечено в свое время в «Рязанских Губернских Ведомостях», хранился в градском соборе г. Михайлова и записан очевидцем монахом.

Текст воспроизведен по изданию: Повесть об осаде г. Михайлова гетманом Сагайдачным в 1618 г. // Киевская старина, № 12. 1885