ПОВЕСТЬ О ЯВЛЕНИИ ЧЮДОТВОРНЫХ ИКОН ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ ВО ОБЛАСТИ ГРАДА ПСКОВА, НА СИНИЧЬИ ГОРЕ, ИЖЕ НЫНЕ ЗОВОМА СВЯТАЯ ГОРА

Бысть изволение Божие при державе благовернаго и благочестиваго царя государя и великаго князя Иоанна Василиевича всеа Русии, правящуему тогда скипетр Росийскаго царства, и при архиепископе Пимине великаго Новаграда и Пскова, от создания же мира по летех 7071 [1563].

Бысть во области града Пскова, веси, зовомей Вороноче, человек некий именем Терентий и жена его Анастасия, родися у них отрок, наречено бысть имя ему во святем крещении Тимофей. Бысть же отрок той молчалив и кроток и смиреномудрием и тихостию пребывал в покорении родителей своих, никому жестока словеси и неподобна не извещеваше. Инии же творяху ему пакости, от злых научении, паче же и от врагов прельщаеми. Егда же бысть отрок той в возрасте пятинадесяти лет, мнози нарицаху его урода несмысленна, родители же его повелеша ему пасти скоты, он же со тщанием повеленное творяше, со всяким покорением и послушанием родителей, без всякого прекословия, якоже подобает святым. Егда же пасущу ему скоты на реце, зовомей Лугвице, в год вечерняго пения виде на воздусе свет велик, паче солнца сияющь, он же ужасен быв от страха и паде на земли, моляся Богу, глаголя: Господи Исусе Христе, сыне Божий, молитвами пречистыя Твоея Матере помилуй мя, и помышляше, что будет видение сие.

И абие слыша глас предивен, глаголющ от света оного: О Тимофее, востани, не бойся! Он же трепетен восклонився и виде во свете оном стоящу велику икону пречистыя Богородицы Умиление, держаше на руки превечнаго Младенца Господа нашего Исуса Христа и Своим пречистым и непорочным лицем преклоншуся пречюдному лицу Господню, от нее же свет сияющь паче луч солнечных и глас бысть к нему: О Тимофее, пойди на Синичью гору, тамо узриши благодать Господа Бога, творца небеси и земли и вся яже в них содетеля и создателя всему миру и благодетеля всякому дыханию.

Он же во страсе велице размышляше, что есть видение сие, умом внимая, помышляше, где такова гора обрести, и недоумевашеся, и воспомяну, како хождение с родителема своима во онех пустых местех, собирая овощи земныя и слыша от них зовома Синичья гора, и тако в ум пришед, остави скоты отца своего, еже пасяше, и потече по мале стезе чащею лесом.

Вечеру же сущу глубоку наставшу, и дошед Синичьи горы; приходящу же ему близ горы тоя и виде на горе свет пречюден сияющь и честную же ону икону пречистыя Богородицы Умиление ту во свете оном стоящу на воздусе, и глас бысть к нему: о Тимофее, от сего времени по шести летех, тако Господу извольшу, иди на Синичью гору и обрящеши благодать велию, ты же буди отныне до реченного времени в терпении близе, благодать моя да будет с тобою, и паки взяся икона та пречюдная во свете оном на воздух и невидима бысть.

Он же на горе всю нощь без сна пребываша в недоумении и во страсе велице, на утреи же, дневи наставшу, поиде ко граду веси, зовомей [85] Вороночь, шествие же творящий человецы глумляхуся, мног позор творях ему, яко урода его мняху быти. Он же, пришед во град Ворона, вниде в церковь святаго великомученика Георгия помолитися и виде тую же икону пречюдную, стоящу в церкви, и удивися великому видению пречистая Богородицы и предивному гласу, глаголющему к нему, и пад на землю, на мног час со слезами моляшеся, и исшед же из церкви, пути касашеся реченнаго ему, обходя по градом и весем, работая человеком со всяким терпением, а мзды ни у кого же не взимаше. Аще же кто от боголюбивых мужей, что ему даяху за его трудное работание, он же вся та убогим раздаваше.

Некий же человек от воинского чина, именем Михаил, принуди его работати себе. Видев терпением работающа добре, и помысли его браку сочетати, да не отидет от него, он же гнушашеся велми и урод творяшеся. Михаил же сие в лукавство вменяше и прещением великим принуди, и обручив ему деву от рабынь своих и браку бывшу Тимофей же не прикоснуся ей никакоже, но по вся нощи без сна пребываше и урод творяшеся, иногда ж, пад на земли со слезами всю нощь моляшеся Богу и Пречистей Его Богоматери избавится ему от искушения лукаваго, дневи же наставшу, работайте со усердием, от яди же мало вкушаше, вся та уродством скрываше.

Обручница же его вся та возвести госпожи своей, она же возвести мужу своему Михаилу, и дивишася терпению его, и страх велий обдержаша их, и призвавше его к трапезе своей и молиша и много и прощения просяще у него. Он же со слезами многими прощение им даваше радостию; они ж даша ему одежды добры и обуша и принудиша его сребреники взяти и отпустиша с честию великою и со слезами.

Он же пришед тоя же веси к церкви Покрову Пречистыя Богородицы, в монастырь, помолився прилежно, данная же та вся убогим раздаваше вдовицам и сиротам, сам же поиде во своей ветхой ризе, скончевая реченная ему.

Минувши же времени реченному шестому лету, прииде на преждереченную гору, рекомую Синичью, и обрете на той горе стоящу у древа, рекомыя сосны, пядницу икону Пресвятыя Владычицы нашея Богородицы и приснодевы Марии Одигитрии, яже толкуется крепкая помощница, с предвечным младенцем ея, Господем нашим Ису Христом. Тимофей же возрадовася зело, яко обрете божественное сокровище, чюдотворную ону икону, и сотвори себе кущицу от дров близ горы и покры ветвием и под нею же ископа ямицу, идеже мало покоя приимаше от труда, непрестанно моляся Господу Богу и пречистей Богородице.

По днех же четыредесятих [40] восия свет велий на горе в нощи; он же, воспрянув во страсе велице и виде во свете ту же чюдотворную икону пречистыя Богородицы Умиление, стоящу на воздусе, неодержиму, и глас бысть к нему: о Тимофее, иди во град Вороначь, рцы иереом и народу, да идут со кресты и с чюдотворною сею иконою на сию гору на моление, яко ту изволися от Вседержителя Бога и Спаса нашего Исуса Христа быти благодати и милости велицей.

Он же, шед во град Вороначь, возвести иереом и народу, они же не послушаша, урода его нарекоша, ови же ругашася ему велми. Тогда же бысть во граде том у великомученика Георгиа священник Никита, той наипаче не послуша, но ругатеся ему велми, нарицаше его урода безумна, и от того времени священник той впаде в болезнь лютую, зле ему боляшу не мало время. Бывшу же ему во изступлении ума, виде себе пришедша в церковь святого великомученика Георгиа и виде чюдотворную икону пречистыя Богородицы Умиление и глас бысть к нему: аще не послушаеши реченнаго рабом моим Тимофеем, то зле умреши и дом твой расхищен будет.

Он же, очютився, призва старейшин града и сказа им вся по ряду виденная ему; они же, слышавше, советоваху, глаголюще: кая нам тщета, яже сотворити тако; и послаша во всю область веси тоя, да соберутся в нареченный день, в пяток по недели всех святых, со кресты. Собрану же народу сущу многу во град той Вороначь, и воздвигоша чюдотворную ону икону пречистыя Богородицы Умиление, начаша пети молебная и поидоша [86] к горе, рекомей Синичьи, гора же та бысть от града Вороноча; три поприща, в пусте месте.

Идущим же им по пути, молебная поюще, и егда же доидоша до реце; зовомей Лугвице, от града поприще едино, идеже первое явися чюдотворная она икона пречистыя Богородицы Умиление во свете оном Тимофею, на том месте начаша чюдотворения быти и исцеления всякими недуги одержимых: хромыя хождаху радостне с чюдотворною иконою, здравы и исцелены на Синичью гору идуще, древяницы ж от ног меташе, а ручныя на древе по пути повесиша, и по пути многа исцеления быша.

А Тимофей един на горе у самоявленныя иконы пречистыя Богородицы Одигитрия стояше, плачющи и услышавшу же ему звук велий на восток, аки гром гремящь и дыхание бурное воста, лесу преклоняющуся, он же трепете быв и во страсе велице и недоумевашеся, что есть шум велий, и пад на земли, на мног час моляся со слезами Богу и пречистей его Матери и утвердися от страха, побеже з горы во сретение шума и узре по лесу идущих с чюдотворною иконою, поюще молебная.

Он же возрадовася радостию великою, плачющи радостно, и пад на землю, моляся Господу Богу и пречистей Богородице. Народи ж плачюще, на его зряще, и прощения у него просяще.

И на котором месте срете Тимофей чюдотворную икону и на том месте многа чюдотворения быша; слепым прозрение, хромым здравия и всякими недуги одержимии мнози исцелиша. Тимофей же напредь пред чюдотворною иконою лесом и чащею идяше, а священницы с чюдотворною иконою за ним идуще, и приведе их к горе Синичьи, сам же поиде на гору, приимаяся за ветвие, и с чюдотворною иконою за ним идоша.

Он же, пришед на гору, у древа сосны паде на земли, моляся Господу Богу и пречистей Богородице, народи же дивишася, он же восклонся от земли, возрев на древо, руце простер и священницы и народи такоже возреша на древо и видеша икону пречистыя Богородицы Одигитрия пядницу, стоящу у того древа, рекомыя сосны, ко единой части на восток, а священником же молебная поющим Господу Богу и пречистей Богородице, тогда же наипаче быша исцеления, различными недуги болящий исцелевахуся.

Иереи же, видевши таковая предивная чюдеса, страхом одержими быша, не возвратишася вспять, но ту пребыша, всенощное пение возсылах Господу Богу и пречистей Богородице и паки безчисленая исцеления быша на недужных.

И слышана же быша таковая чюдеса во многих градех и весех. Священницы же и народи, советовавше о тех чюдотворных иконах пречистыя Богородицы, возвестиша о том державным града Пскова. Бысть же тогда во Пскове государевь воевода князь Георгий Токмаков. Он же, слышав таковая преславная чюдеса и дозреша и возвести писанием вседержавному царю государю и великому князю Иоанну Василиевичю всеа Росии. Он же, слышав таковая преславная чюдеса, повеле известно испытати. Бывшю же изысканию и исцелевших дозираху, истина ли сне будет. В то же время на горе устроиша часовню на прихождение православных христиан ради моления.

И паки во время осени, на праздник Покрова пресвятыя Богородицы сошедшуся на гору народу многу сущу, вечерняя молбы сотворше вечеру глубоку сущу, людем, сошедшим от труда почити, а чюдотворным иконам, стоящим в часовне, и стражем уснувшим, попущением же Божиим, часовня загореся. И видевше людие притекоша, сетующе и в перси биюще, друг друга укоряюще о таковом согрешении своего небрежения и велику скорбь вменяху о чюдотворных иконах пречистыя Богородицы.

Пламени ж возгоревшуся велику никто не возможе приближитися к часовне той, и туча велика належаше; народи плачюще всю нощь, и егда же пламени угасшу, страх велий нападе на них о таковом согрешении, велми бо печаль имяху о чюдотворных иконах.

О превеликое чюдо, братие! обретоша бо тогда чюдотворную икону пречистыя Богородицы Умиление с превечным младенцем невредиму [87] от огня, стоящу к единой части на восток у древа, рекомыя сосны, а прочил иконы и вся приношения погорели. Видевше же народи таковое преславное чюдо, припадающе, со слезами моляхуся и благодарение воздающе Господу Богу и пречистей Богородице о бывшем чюдеси.

Наставшу же утру и второму часу дни, начата погорелое место розчищати, да соберут останки кая суть железная, тогда другую чюдотворную икону пресвятыя Богородицы Одигитрия, иже Тимофей обрел исперва на горе, обретоша в пепелу, ничем невреждену, пламени ж не прикоснувшуся. Но, о земнороднии, како вышняго человеколюбие исповемы, еже на нас показа всемогий, иже пречистый свой образ и Богоматере яко небесный дар премирно низпосла и неопалим соблюдая от вещественнаго огня невещественою силою.

Вся же та преславная чюдеса поведаша царю государю и великому князю Иоанну Василиевичю всея Русии. Он же, услыша сие, прослави Бога и пречистую Богородицу, повелел на той горе устроити церковь каменну во имя пресвятыя Богородицы, честнаго и славнаго Ея Успения и повеле быти обители. А идеже обретеся чюдотворная икона Одигитрия, на том месте устроиша олтарь на Божие славословие, а другую чюдотворную икону пречистыя Богородицы Умиление повеле царь государь в той церкви поставити.

Слышано же бысть таковая предивная чюдеса во всех градех и весех росийскаго царства и стицахуся народи мнози от всех стран на Святую сию гору в церковь Богоматере и многа исцеления быша болящим различными недуги, приходящим с верою, имена ж исцелевших не написаны, но вкратце сие написано.

Ликуй ныне и веселися, граде Пскове, яко восприял еси в предел области твоея таковое божественое сокровище, чюдотворныя сия иконы пречистыя Богоматере, их же мы благолепие зряще и усердно покланяющеся, целуем их радостию и страхом, страхом убо греха ради, яко недостойни суще, радостию же милости ради, юже подает мирови, яко милосерда пресвятая Богородица, предстателница наша и помощница и заступница роду христианскому есть. И аще убо кто от человек матерь нечию стяжав ходатаицу сию молит с прилежанием и честию и молбы прилежныя творит к ней о единоплеменнем рабе или друзе, тоя сын не преслушает молбы ея и моления, превышьшая ж всякого рода и горних сил, чиста телом и духом, таковому сыну мати бывши, колико моление и дерзновение ко иже из нея воплощьшемуся имать, ибо не суждено и непостижно имать, еже помогати. И свидетельствуют притекающий ныне под кров тая, яко скора заступница и помощница нам во всякой беде и недугах есть. Мы же сие дозде прекратим, но на предлежащее паки возвратимся.

Яко по создании обители и церкви на той Синичьи горе и паки по явлению и по повелению пречистыя Богородицы, иде блаженный Тимофей в Великий Новъград и начат проповедати во все области Новгородцкой и по селом и по погостом и в самом Великом Новеграде милость Божию и пречистыя Богородицы, чюдотворныя ея иконы, явльшейся во области Псковской, и благодать исцеления бывает всем болящим, приходящим с верою к честному ея образу, и дабы шествие сотворил архиепископ Великаго Новаграда с народом во область Псковскую, во обитель пречистыя Богородицы, на Синичью гору, молитися о православием царе и о всей рустей земли православных христиан, дабы Господь Бог дал тихо и безмятежно житие православным и избавил бы от междоусобныя брани, от глада и мора и от нашествия поганых на русскую землю.

И сему ови убо от народа веру яша ему, овии ж не вероваша и посмеяшася и поругаша, якоже древним пророком и Саллосом блаженным, Христа ради уродивым, якоже и до ныне творится: безумнии ругаются праведным и не веруют глаголемым ими от Бога, милости Его или будущия казни за грехи человеческия.

Поведаша же о нем архиепископу Пимину, и приведен бысть к нему и вопрошен, он же ко преждереченному поведа ему вся повеленная от Бога, он же не внят ему веры. Мнози же тогда архиепископу, иже суть мудри [88] мняшеся в богатстве и славе, розмолвяху и ложь вменяху от раба Божия Тимофея глаголемое, и отослаша его в заточение, тамо и скончася, мученически пострада.

Сия же проповедь раба Божия Тимофея бысть в Великом Новеграде не за много лет пред пленением того града, еже бысть в лета 7078 [1570], якоже в летописных книгах написано, еже и збысться пророчество блаженаго Тимофея в Великом Новеграде, понеже бо он веляше архиепископу и с народом шествие сотворити во область Псковскую, во обитель на Святую гору в церковь Богоматере молитися, о еже бы избавитися им от всякого зла, они же не послушаша его и много зла пострадаша, писано бо есть: ненавидящий праведнаго прегрешат.

Мы ж, братие, не обленимся, притецем с верою на Святую гору, к чюдотворному образу пресвятыя Владычицы нашея Богородицы и приснодевы Марии, идеже бысть благодать и милость великая, многа бо чюдеса излияшася и подашася всякими болезньми одержимыми с верою приходящим от всех стран Росийскаго царства, исцеление неоскудно приемлющим, яко от приснотекущаго источника на жаждущия воды.

Время же прейде не мало по явлении и в та убо многая мимошедшая лета быша многая и неизреченная предивная чюдеса, их же множества ради и долготы словес не исписаны быша, паче же убо кто может исповедати или подробну исписати поистинне многая и преславная предивная чюдеса пресвятыя Богородицы, безчислена бо суть чюдотворения ея, не точию же во обители Ея на Святей горе, но и егда приносят во вся лета обе чюдотворныя Ея иконы во град Псков, всенароднаго ради моления православных христиан, в пост святых апостол, и бывает сретение на второй недели в пяток, в той бо день исходят на сретение вне града со святыми иконами и с честными кресты архиепископ со всеосвященным собором и со всенародным множеством, и певше молебная и тако со благоговением и великою честию вземше чюдотворныя оны иконы, приносят во град Псков» со свещами и с кандилы, и тогда многая чюдеса и исцеления бывают с верою приходящим, множество бо тогда народа православных христиан приходят молитися, мужи и жены с чады, свещи приносяще, припадающе же и покланяются вси благоговейне пречистому образу Господа Бога нашего и Спаса Исуса Христа и пречистыя Владычицы нашея пресвятыя Богородицы, честных же ангел и всех святых, и со страхом и любовию целующе и неоскудно приемлют исцеление и от всех бед совершенное спасение.

В неделю же с теми чюдотворными иконами пречистыя Богоматере и честными кресты и с прочими святыми иконами исходят вне Среднего града весь священный собор и со всенародным множеством и обыдут весь град той, поюще молебная, в понедельник же и провождаху те чюдотворныя иконы такожде, якоже и сретаху, с великою честию. В лета же 7155 [1647] уставиша проводите те чюдотворныя иконы в среду, в шестый день по внесении во град, и оттоле и доныне тако творят, а иногда же и во ин день провождаху, когда архиепископ изволяше.

От града же Пскова, когда с теми чюдотворными иконами ездаху по Великой реки в судех, и елицы святыя церкви стояху на брегу реки тоя на погостех, и от всех тех церквей со святыми иконами и хоругви священницы и селяне православные христиане, мужи и жены и чады выхождаху на брег реки тоя на сретение к чюдотворным иконам пречистыя Богородицы и свещи приносяще, такожде и во граде Острове сретаху со кресты иереи и народи со благоговением и великою честию, вземше чюдотворныя оны иконы, приносят во град, со свещами и с кандилы, в церковь святаго Николы, поюще молебная, и по сем приходяще к чюдотворному образу пречистыя Богоматере, усердно поклоняющеся и со страхом и любовию целующе, и паки провождаху те чюдотворныя иконы такожде со кресты вне града с великою честию, и тако путь шествующе и до обители.

Православнии же христиане, живущий близ реки тоя, и тогда выхождаху из домов своих на поклонение к чюдотворному образу пречистыя Богоматере и идяху по брегу, гоняшеся до пристанища. О, чюдо, не [89] оставляху бо матери и младенцев в домех, но и тех носяще к чюдотворному образу, тако бо творяху живущий во граде Пскове и в селе, таков бо бе обычай уставися им, яко и на пути гоняхуся за чюдотворными онеми иконами, инии ж и со слезами плачюще моляхуся.

Всего же шествия от града Пскова до Святыя горы водою сто поприщ, да сухим путем три поприща, и тако прехождаху с теми чюдотворными иконами, молебная поюще.

Потребно ж есть нам, братие, и воистинну достойно, иже от тех святых и чюдотворных икон пречистыя Богоматере во дни наша бываемых преславных чюдес от великих малая на среду изнести и от части сих вкратце изреши, не мню праведно, ниже достойно забвению предати или молчанием заградити, но на свещнице сердец наших поставити должны есмы.

Человек некий, именем Афанасий, земледелатель убо, жилище имея во области града Пскова, в некоем селе, разстояние же имея от града 40 поприщ, некогда же той Афанасий работаше в дому своем, тогда же случися ему беда велия, выразил бо десное свое око вилами, ими же траву изсохшую мещут, и от того времени тем оком не видяше ничтоже три лета, по трех же летех отняся у него и другого ока зрение; он же, пришед во град Псков, живяше и прошаше милостыни, водим бе некими и слеп бе обема очима, не видяше ничтоже 13 лет. Егда же приходят с чюдотворными иконами пречистыя Богородицы с Святыя горы во град Псков, в пост святых апостол на второй недели, и в пяток бывает сретение и того дни поют всенощное бдение во обители святаго праведнаго Алексия человека Божия, вне града, множество ж народа православных христиан приходят из града Пскова и из весей ко всенощному бдению, молящеся и свещи приносяще; Афанасий же хождаше по вся лета ко всенощному бдению, приводим бе, понеже бо един не видяше ходити. Единою же приведен бысть сыном [сном? — Н. Т.] своим во обитель святаго праведнаго Алексия человека Божия ко всенощному бдению, он же моляшеся прилежно пречистей Богородице, стоя пред чюдотворным ея образом, и абие прозре единым оком, левым. Бысть же сие чюдо при архиепископе псковском Иоакиме; Афанасий же от того времени по прозрении хождаше во вся лета во обитель на Святую гору молитися в церковь Богоматере; поживе же по прозрении человек той 15 лет и преставися.

Бысть же убо ино чюдо во обители на Святей горе, достойно убо, мню, и сие на среду изнести и яве изглаголати, еже содеяся в лета 7560 [1652] месяца сентября в первый день, при игумене тая обители Вениямине, в церкви пред чюдотворным образом пресвятыя Богородицы Умиления загореся свеща сама о себе, никим же не возжена.

Потребно ж есть нам, братие, и ино чюдо поведати, еже содеяся в той же обители на Святей горе, при игумене тоя обители Антонии: во время пения Божественыя литоргии прииде некий человек, именем Григорий, тоя же обители земледелец, со свещею, а весом та свеща яко бы в полфунта, и вжег, постави тое свещу пред чюдотворным образом пресвятыя Богородицы Одигитрия, и тое свещу отвергло от тоя иконы к правому клиросу; взем же Григорий свещу свою и вжег, постави ю паки пред таю же иконою, и паки тоеже свещу отвергло и до полуцеркви. Он же взем в тоеже свещу и вжег, постави и в третий пред тою же иконою, того ж дни, егда приидоша к вечернему пению, и обретоша тое свещу на земли лежащу, на северней стране, отвержену от чюдотворныя иконы далече, яко бы три сажени; они ж тоя свещи не дерзнуша паки вжигати.

Мы ж, братие, со страхом и верою приходим, приносяще свещи своя и вжегше, поставляем пред образом пречистыя Богородицы, многа бо и до ныне преславная чюдеса и исцеления бывают с верою приходящим. Воистину убо, братие, сокровище честно граду Пскову и всей области его чюдотворныя сия иконы даровашася, их же мы радостным сердцем и душою облобызаем, веселящеся, теплою верою прикасающеся, исцеление почерпаем.

Дозде словесе дошедше и к высоте взирая превеликих чюдес Бога и владыки и пречистыя Богородицы единоя, безгласен от ужасти бываю и [90] не обретаю словес, подобных делесем, который бо всегласный язык деву Богородицу достойно похвалит или како преславно воспоет преславную Ее благодать и источник человеколюбия прославит и благодарение принесет

Подобаше бо нам делы благодарения принести Божий Матери, таковыми бо веселится паче та же сама и тоя сын, паче свирелей и арганов и мусикийских песней, се же есть, яко же и аз реку, любы нелицемерная закону и пророком сущи глава, братолюбие непреложно, милосердие не обратно, девство божествено, брак законен, целомудрие недоведомо, правда сочетана, мужество на страсти законно, смысл благочинен, милость не обидна, воздержание без гордости, смирение благоумилено, к сим же житие непорочно, нрав прав, обычай смирен, ум благоразумен, уста благоглаголива, язык благохвален, око нелюбодеянно, руце не грабежливе, нозе не быстре на зло, ярость не безсловесна и привлачащи помыслы неистовства струями и иная, ими же по образу Божию создан человек и с Богом сочетан, яко же не утварию многоценною и красною украшается, сицевыми подобает Богородицу благодарити, понеже благодарение делы, а не словесы составити, рекоше тако мудрии.

Но понеже естества нашего немощь и замедление помысла ленивы нас творит на добродетелное потружение и помалу сея прикасаемся, яко бы рещи, краем перста, сего ради на предложение должнаго благодарения недостаток имамы, да поне словес песни принесем, вознесше убо гласы своя и смысл возвысивше, сице рцем со восклицанием: ты убо, о владычице Богородице, человеколюбие естеством имущи, не оставила еси рода нашего заступающи, яко же мати хрестианскому роду чадолюбива купно милостива, тако присно твоя благодеяния даруеши нам, спасающи и покрывающи и сохраняющи, от бед свобождающи и от напастей пременяющих. Мы ж сих ради благодарим и проповедаем благодать, не таим благодеяния, поем велегласно твоя чюдеса, помощь прославляем, промышление величием, заступление воспеваем, помощницу тя благотворну имамы, милосердие твое славословим и о минувших убо воспоминающе твоя великая дарования и от коликих бед избавихомся тобою, сия тебе благодарьственыя песни, яко долг приносим, не яко достойны суща твоему благодеянию.

Обаче улюби детий немование, о настоящих же и оскорбляющих нас, молим твою быструю помощь, требуем твоего заступления, разруши сущая посреде нас претыкания, разжени облежащий ны облак и тму, ими же, яко и в нощней брани, уязвляеми бываем, паче же рещи, яко неистови, своих плотей вкушаем, не разумеюще сродства и единоплеменства не помышляюще, и таковая творити дерзаем нецыи, иже тогожде духа, единого Христа, тояжде веры, тогожде крещения и единоя церкве и тех же таинств сподоблени бывше.

Но да слова не простираем дале, сего ради молимся, всесвятая Богородице, твоему благосердию: щедроты твоя прияти людем твоим и достоянию твоему, и стани, молитвеница, к рождьшемуся ис тебе Богу нашему, да поможет нам, конечно погибающим, да изымет ны от напастей неисцельных; зриши, Богородице, коликими слезами потопляемы есмы, умилостивися убо и не отрини нас до конца; векую, царице, лице твое отвращаеши и забываеши нищету нашю и печаль нашю. Расточи належащий на ны страх и трепет, утиши подвигшийся на ны гнев Божий и пагубу укроти и сущия посреде нас распря и мятежы умири и тишину и мир подаждь рабом твоим, да ко многим твоим благодеянием и сия приложивше, проповедаем всегда твоя чюдеса.

И дозде доплывше, ветрила словесе спустивше, в твердем пристанищи молчания пристанем, оно паки собравшемся воспомянувше, да не неразумни явимся о благодеянии Владычицы, ниже делесы благодействуеми, лениви же словесы благодарение принесем, ибо паки к нам прибыток возвратится, аще бо о пришедших на ны благодарни будем, великое себе к хотящим быти уготовим дерзновение и неизреченных благ получим, благодатию и человеколюбием Господа нашего Исуса Христа, ему же слава и держава, и покланяние ныне и присно и во веки веком, аминь.

Текст воспроизведен по изданию: Повесть о явлении чюдотворных икон пресвятыя владычицы нашея Богородицы и Приснодевы Марии во области града Пскова, на Синичьи горе, иже ныне зовома Святая гора // Звезда, № 6. 1999