№ 86.

1620 г., Сентября 22. Письмо Царя Михаила Феодоровича патриарху Филарету, о прибытии в село Братошино.

Пречестнейшему и всесвятейшему о Бозе отцу отцем и учителю Христовых велений, истинному столпу благочестия, евангилския проповеди рачителю, церковному благолепно, великому государю отцу нашему, святейшему Филарету Никитичю, Божиею милостию патриярху Московскому и всеа Русии, сын вашего по плоти благородия, вкупе же и по духу свойства, Царь и Великий Князь Михайло Федорович всеа Русии челом бьет. Сентября, государь, в 22 день писал еси, государь, к нам в своей государской святителской грамоте о своем душевном спасении и о телесном здравии: и мы и мать наша, государыня благородная старица инока Марфа Ивановна, о вашем государском святителском отческом душевном спасении и о телесном здравии зело возрадовахомся, и на вашем жалованье, что ты, государь, нас и мать нашу своим государским здоровьем обестил и о нас ведати произволил, много челом бьем; пачеж и молим, яко да частее повелиши нам о своем душевном спасении и о телесном здравии возвещати. А в Братошино, государь, пришли мы того ж дни ввечеру; а из Братошина пойдем наутрее того, Сентября в 23 день. Молим же ваше превосходящее архиерейство, да возслеши о нас и о матери нашей ко всемогущему и вся содержащему Богу нашему честныя ваша и благоприятныя молитвы, яко да сподобит нас всесилный Бог, по благословенно вашего святителства, по обещанию ж нашему, достигнути обители святыя и единосущныя Троица и целбоноснаго гроба преподобнаго чюдотворца Сергия, и летнюю его память духовне торжествовати, и оттоле в радости возвратитися в царствующий град, и с веселием равноангелное ваше лице зрети, и с любовию руку вашего святителства целоватн, и вашему святителству и государскому отческому лицу поклонитися и челом ударити.

Отпуск писан столбцом, на одном литке. Внизу помета: Сентября в 22 день, с жилцом с Яковом Салмановым из Братошина.