№ 24.

1619 г., Сентября 12. Письмо инокини Марфы патриарху Филарету, о прибытии в Кострому.

Превосходящему честно во святых, по общему естеству человеку, произволением же ангелу, великому государю отцу и владыце нашему, святейшему Филарету Никитичю, Божьего милостию патриарху Московскому и всеа Русии, старица Марфа вашему святительству челом бьет. Возвещаю, государь, вашему святительству, яко сын ваш, вкупе ж и мой, Царь и Великий Князь Михаил Федорович всеа Русии и аз на Кострому пришли есмя Сентября 10 числа к вечеру; и у чюдотворныя иконы пречистыя Богородицы Федоровския всенощная пения и литурги и молебная благодарения сподобил нас Бог принести: тако ж и в честных обителех хотим совершить. А с Костромы, государь, аще повелит твое преподобие, хотим путное шествие творити к целбоносному гробу чюдотворца Макария. Молим же ваше превосходящее святительство, да возслеши о нас ко всесильному Богу и пречистой Его Матери чесныя ваша и Богу приятные молитвы, да подаст нам Бог путное се шествие прейти благовременно и, поклонився чюдотворному гробу великаго отца Макария, здраво и весело возвратитися к царствующему граду и целовати вашего святительства руку со усердием и стопам вашим поклонитися и челом ударити.

Отпуск писан столбцом, на одном листке. Внизу помета: Сентября в 12 день, с Гаврилом Ивановым.