Похвала Ивану Калите из «Сийского Евангелия»

Около 1339-1340 г.

В лето 600-е 800-е 47-е (1340-е) инидикта 12 миротворенаго и солнечьного круга в 4-е лето висикостное, жидовь сего ирук в 7-е лето, епакта 18 лето, в 5-и каланд месяца марта, жидовьскы нисана, написано бысть си еуангелие в граде Москове на Двину к святей Богородици повелениемь рабомь Божиим Ананиею черньцемь. О семь бо князи великомь Иване пророк Езекии глаголеть: «В последнее время в апустнвшии земли на запад въстанеть цесарь правду любя и суд не по мьзде судяи ни в поношение поганым странам. При семь будеть тишина велья в Рускои земли и въсияеть в дни его правда», яко же и бысть при его царстве. Хвалить Римьская земля Петра и Павла, Асия Иоана Богословеца, Индийская — Фому, Ераполь — Филипа, Руская земле — первозванаго апостола Андрея, Гречьская земля — цесаря Костянтина. Сему благородному князю великому Ивану створшему дела подобна в Рускои земли правоверному цесарю Костянтину. О семь бо песнословьць глаголеть: «Постави, Господи, законодавца над ними, да разумеют языци, яко человеци суть». То же рек: «Боже, суд цесареви дай же правду сынови цесареву».

Сии бо князь великои Иоан имевше правый суд паче меры. Поминая божественае писания, исправльния святых и преподобных отец, по правиломь монокануньным ревнуя правоверному цесарю Устияну. В то бо время благочестию велию восиявши, многим святым церквам съзидаемым, учьнию [293] божественых словес от уст его яко источнику велию текущю, напаяющи благочестивых святитель сердца и христолюбивых в его державе людии. Безбожным ересам преставшим при его державе, многим книгам написаным его повелениемь, ревнуя правоверному цесарю гречьскому Мануилу. Любяи святительскыи сан, постничьское житье любя и удержае правоверную святую веру. Сирым в бедах помощник, вдовици от насилник изимая яко от уст лвов.

Всей Рускои земли поминая велегласно державу его царства. Сии бо великии раб Божии Анания чернць, поминая его святительскыи сан, горя духовною мыслию к Богови, хотяи видети вышнии Ерусалим, поминае душ ею первых правоверных цесарии, всех святых и молитвою — прародитель своих.

А писали многогрешнии дьяци Мелентии да Прокоша. Благословите их, а не клените.

Текст воспроизведен по изданию: Иван Калита. М. Молодая гвардия. 2005