6

1410-1417 гг. — Жалованная грамота нижегородского князя Александра Ивановича Благовещенскому монастырю на податные и судебные льготы

Святаго для благовещениа се яз князь Александр Ивановичь пожаловал есмь игумена Благовещенского с братьею: что люди монастырские пошлые в городе и селех, коли придет моа дань, и игумен за них заплатит по силе; а опричь того не надобе им ни мыт, ни тамга ни побережное, ни костки, ни осмничее, ни становщики ни езовники не ездят ни по что, ни езу им не бити, ни лугу им не косити, ни наместници мои к тем людем не всылают, ни судят их, ни доводшики к ним не въезжают ни по что, оприче душегубства и розбоя; ведает и судит их игумен или кому прикажет; а будет суд смесной, и наместници мои судят, а игумен с ними или кому при кажет. А тутошних людей становых игумен в монастырь не примает; а кого к себе игумен призовет людей из иного княженья, а не из моее отчины, и тем людем пришлым не надобе моа дань на 10 лет, ни ям, ни подвода, ни мыто ни тамга, ни инаа никотораа пошлина; а уживут 10 лет и они потянут с старожильци по силе. А к тем людем также наместници мои не всылают, ни судят их; судит игумен свои люди сам, или кому прикажет; а случится суд смесной, и игумен судит сь наместники, а прибыток [19] ся делят наполы. А через сию мою грамоту кто их чим изобидит, или что у них возьмет, быти от меня в казни. А дана грамота июля того лета, коли князь Александр Иванович сел на своей отчине на Новегороде. А на которую грамоту свою грамоту дам, а на сю грамоту грамоты нет.

А. А. Э., т. I, № 17