Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

4

Около 1372 г. — Жалованная грамота рязанского великого князя Олега Ивановича Ольгову монастырю на село Арестовское, с подтверждением права на владение погостами, землями и другими угодьями, данными монастырю от предков его и бояр

[Ми]лосердиемь божьим, молитвою святое богородици, и молитвою отця своего князя великого Ивана Олександровича, и благословеньемь епискупа рязаньского и муромского Василья, яз князь великии Олег Ивановичь, сгадав семь с своимь отцемь с владыкою с Васильемь и с своими бояры (а бояре со мною были: Софоний Алтыкулачевичь, Семен Феодоровичь, Микита Аньдреевичь, Тимошь Олександровичь, [16] Манасея дядько, Юрьи околничий, Юрьи чашник, Семен Микитьич с братьею, Павел Соробичь), дал есмь отцю своему Арсенью [ман]астырь святое Богородица, на Олгове, в свободь, до его ж[и]вота, а по своемь животе волен кого в онь благословить на игуменьство. А дал есмь святой Богородици дому Арестовское село, с в[инами], и с поличьнымь, и с резанкою, и с шестьюдесят, и со всеми пошлинами, и с бортники, и с бор[тными] землями, и с поземом, и с озеры, и с[бобры, и с] перевесьищи.

А возрев есмь в да[вн]ыи грамоты, с отцемь своимь с владыкою с Вас[илье]мь и с бояры: коли ставили по первых [праде]ди наши святую Богородицю, князь великии Ингвар, кн[язь] Олег, князь Юрьи, а с ними бояр 300, а мужии 600, тогды дали святой Богородици дому 9 земль бортных, а 5 погостов: Песочна, а в ней 300 семии, Холохолна, а в ней полтораста семии, Заячины, а в ней 200 семии, Веприя 200 семии, Заячков 100 и 60 семии, а си вси погосты с землями с бортными, и с поземом, и с озеры, и с бобры, и с перевесьищи, с резанками, и с шестьюдесят, и с винами, и с поличнымь, и со всеми пошлинами. А хто даных людей прадеды нашими святой Богородици дому где имуть седети, или бортници, или слободичь, в моей отчине, ать знают дом святой Богородици; а волостели мои ать не вступаются в них ни о которомь же деле. А Головчин дал Федор Борисовичь, а Мордовское дал Климент по Данилов двор, а Еремеи Великии с Глебом села свои подавали госпожи Богородици, а муж [и] Олговскую околицю, купивше у муромьских князии, давше 300 гривен, и дали святой Богородици.

И яз, князь великии Олег Ивановичь, што есмь дал Арестовское [с]ело святой Богородици дому, и што прадеди наши подавали которая места и люди, и што бояре подавали дому святой Богородици, того хочю боронити, а не обидети ничим дому святой Богородици; а волостели и даньници, и ямьщики ать не заимают богородицьских людии ни про што же; а кто изобидит дом святой Богородици, или князь, или владыка, или волостель, или кто иныи, тот даст ответ перед богом святой госпожи Богородици.

А коли есмь выехал из отчины ис своее, ис Переяславля, тоде есм обет учинил: к святей госпожи Богородици придал есм рязаньское мыто и побережьное, аже ми дасть [господь бог быти] в отчине своей в Переяс[лавл]и.

Сборник Московского архива министерства юстиции, т. 1, ч. 1, стр. 5-10. М. 1913.

Главная страница  | Обратная связь
COPYRIGHT © 2008-2021  All Rights Reserved.