Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

Грамота Новгорода тверскому великому князю Михаилу Ярославичу

1304-1305 гг.

Благословление от владыкы, поклон от посадника Георгия, и от тысячкого Андреяна, и от всех старейших, и от всех мьнших, и от всего Новагорода господину князю Михаилу Ярославицю. На семь ти, княже, хрьст целовати к всему Новугороду, на чемь целовали пьрвии князи, и дед твои, и отьць твои. Новгород ти дьржати по пошлине, како держал дед твои и отьць твои. Грамот ти не посужати. А мужа ти без вины волости не лишити. А бес посадника ти волостии не раздавати, ни суда ти судити, ни грамот давати. А волостии ти, княже, новгородьскых своими мужи не дьржати, дьржати ти мужи новгородьскыми; а дар тобе от тех волостии емати. А се волости новогородьскыя: Волок с всеми волостьми, а дьржати ти свои тиун на половине, а новгородьць на половине, в всей волости Волочкои; а на Тържку ти, княже, дьржати свои тиун на своей части, а новгородьць на своей части. А се волости новгородьскыя: Бежице, Городьць, Мелеча, Шипино, Егна, Волъгда, Заволочие, Голопьрьмь, Тьре, Пьрьмь, Печера, Югра; а ты волости дьржати ти мужи новгородьскыми. А свинье бита та, княже, за 60 вьрст около города, а дале куда кому годно. А закладников та не приимата, княже, по всей волости Новгородьскои, ни княгыни твоей, ни бояром твоим, ни дворяном твоим. А сел та не ставили по Новгородьскои волости, ни твоей княгыни, ни твоим бояром, ни твоим дворяном, ни купили, ни даром приимата. А свобод та не ставили по Новгородьскои волости. А что сел, княже, на Новгородьскои земли твоих, или княгининых, или бояр твоих, тех сел тобе съступитася: а куны емати на них у истьцев своих, у кого будеть кто купил; а земля святой Софии к Новугороду. А что сел и свобод Дьмитриевых, то дали есме быле Андрею до живота Андреева в хрьстное целование, а [283] целование, как было при отци твоемь Ярославе. А на Озвад ти, княже, ездити лете звери гонит. А в Русу не ехати, ехати в Русу на третьюю зиму. А в Ладогу ти, княже, ездити на третиее лето. А осетрьнику твоему ездити в Ладогу по грамоте отца твоего, како пошло. А в Вълъгде ти тиуна не дьржати. А судиям твоим ездити по волости, куда пошло, лете с Петрова дни, по пошлине. А что пожень княжих, то князю; а новгородьское Новугороду. А вывод ти, княже, в всей Новгородьскои волости не надобе. А с Суждальскои земли тобе, княже, новгородца не судити, ни грамот давати, ни волостии раздавати. А по всей Суждальскои земли гостити новгородцю без рубежа. А у мыта у новгородца и у новоторъжца по две векше от воза, и от лодие, и от хмелна короба, и от льняна. А дворяном твоим ходити по пошлине: от князя по пяти кун, а от тиуна по две куне. А за Волок ти, княже, своего мужа не слати, продаяти ти дань своя новгородцю. А холопу и робе на господаря веры не яти. А в Немечком дворе тобе, княже, тьрговати нашею братиею; а приставов ти не приставливати; а двора ти не затваряти. А что подеялося доселе межи тобою и твоими мужи Новугороду до хрьстьного целования, то ти все, княже, отложити и твоим мужем. А твоим судиям по волости самосуда не замышляти на людех по Новгородьскои волости. А вязчего не пошло по Новгородьскои волости, то судиям твоим отложити. А холопа и половника не судити твоим судиям без господаря; судити князю в Новегороде, тако пошло. И купцины в силу не судити въ волости. А кто живет въ Търъжку на Новотьрзькои земли, а к святому Спасу не тягнелъ к Търъжку, князем отьемъся, а ти поидуть ис Торъжку, куда им годно. Аже възъидеть к тобе, княже, на мужа обада, тому ти веры не яти, дали тому исправа. А у купьць повозов не имати, разве ратной вести. А коли, княже, поедешь въ Новгорода, тьгда тобе дар емати по постояниям; а коли поедешь из Новагорода, тьгда дар не надобе. А холоп или половник забежилъ в Тферьскую волослъ, а тех, княже, выдавали; который ли въстворить суд собе, судити его в Новегороде. А нелюбие, княже, тобе отложили и от старейших, и от мьнших, и от всех. На семь, господине, на всемь целуй хрьст при нашей братии, при послех.

Текст печатается по изданию: Грамоты Великого Новгорода и Пскова. М.; Л., 1949. С. 16-18.

Текст воспроизведен по изданию: Иван Калита. М. Молодая гвардия. 2005

Главная страница  | Обратная связь
COPYRIGHT © 2008-2021  All Rights Reserved.