Договорная Грамота Суздальских Князей Василья Юрьевича и Федора Юрьевича с Князем Дмитриемъ Юрьевичем (Шемякою) и с сыном его Князем Иваном: о бытии им в дружбе и согласии, о управлении всякому своими землями; о отобрании Суздаля у Князя Можайского Ивана Андреевича и купленных Боярами в разные времена в Суздальских местах вотчин, и о даче оных по прежнему им Князьям Суздальским; о незаключении мирных договоров с Великим Князем ВАСИЛИЕМ ВАСИЛИЕВИЧЕМ, без общего согласия; о невзыскивании чинимых в его отчине грабежей; о судах, расправах, и проч.— Писана около 1446 года.

Божьею милостию и пречистое его Богоматери. На семъ на всемъ, Господинъ нашь Князь Дмитрий Юриевичь, целуй къ намъ крестъ, ко мне ко Князю Василью Юриевичю и къ моему брату молодшему ко Князю Федору Юриевичю: держати ти насъ собе, меня Князя Василья Юриевича собе сыномъ, а брата моего молодшего Князя Федора Юриевича держати его собе братаничемъ; а сыну ти, Господине, своему Князю Ивану Дмитриевичю держати меня Князя Василья Юриевича братомъ ровнымъ, а меня ти, Господине, Князя Федора Юриевича держати сыну своему Князю Ивану братомъ молодшимъ: а намъ тебя своего Господина держати мне Князю Василью Юриевичю Господиномъ и отцемъ, а сына твоего Князя Ивана Дмитриевича держати ми его собе братомъ ровнымъ; а мне Князю Федору Юриевичю держати ми тебя собе Господиномъ и дядею, а сына ми твоего, Господине, Князя Ивана Дмитриевича держати ми его собе братомъ старешимъ. А добра ти намъ, Господине, и твоему сыну хотети во всемъ везде, въ Орде, и на Руси; а намъ, Господине тобе и твоему сыну Князю Ивану добра хотети во всемъ везде, въ Орде и на Руси. А въ прадедину нашю и въ дедину и въ отчину въ Суздаль, въ Новъгородъ, въ Городець, и въ Вятку, и во всю пятетемъ Новъгородскую тобе Господину нашему Князю Дмитрию Юриевичю и твоему сыну Князю Ивану не въступатися ни чимъ; а того ти, Господине, и твоему сыну Князю Ивану подъ нами не подзирати, блюсти, а не обидети, и подъ нашими детми, по крестному целованью. А Орда намъ, Господине, знати собою. А по моемъ животе, тобе моему Господину Князю Дмитрию Юриевичю и твоему сыну подъ моимъ братомъ молодшимъ подъ Княземъ Федоромъ также и не подзирати нашие отчины, блюсти, а не обидети. А что еси былъ, Господинъ нашь Князь Дмитрий Юриевичь, отступился своему брату Князю Ивану Аньдреевичю нашие отчины Суздаля, и тобе ныне тое нашие отчины Суздаля своему брату Князю Ивану не дати; а которыми си делы братъ твой Князь Иванъ имется въ нашю [115] отчину въступати, и тобе насъ отъ него боронити, а за насъ ти стояти. А жити ти, Господине, и твоему сыну съ нами, какъ жилъ твой дедъ Князь Велики Дмитрий Ивановичь съ нашимъ прадедомъ съ Великимъ Княземъ съ Дмитриемъ Костянтиновичемъ, по старине и по доконьчянью. А кто будетъ, Господине, тобе Князю Дмитрию Юриевичю и твоему сыну другъ, то и намъ другъ; а кто будетъ, Господине, тобе и твоему сыну недругъ, то и намъ недругъ: а кто будетъ, Господине, намъ другъ, то и тобе и твоему сыну другъ; а кто будетъ, Господине, намъ недругъ, то и тобе и твоему сыну недругъ, и тобе нашему Господину отъ того нашего недруга насъ боронити. А что намъ, Господине, слышевъ о твоемъ добре или о лисе и о твоего сына добре или о лисе отъ кого бы ни было, и намъ то, Господине, тобе поведати въ правду безъ хитрости, по крестному целованью; а тобе Господину нашему и твоему сыну что слышовъ о нашомъ добре или о лисе отъ кого бы ни было, и тобе то, Господине, и твоему сыну намъ поведати въ правду безъ хитрости, по крестному целованью. А лучится, Господине, тобе и твоему сыну каньчивати съ Великимъ Княземъ ВАСИЛИЕМЪ ВАСИЛЬЕВИЧЕМЪ, или съ его братьею молодшою, или съ его детми, и тобе нашему Господину и твоему сыну безъ насъ не каньчивати; а намъ, Господине, безъ тобя и безъ твоего сына съ ними не каньчивати. А что, Господине, въ наше неверемя ваши Князи служилые и ваши Бояре покупили въ нашой отчине въ Суздале у насъ и у нашие братьи, и у нашихъ Бояръ, и у манастырей волости и села, или въ Новегороде и на Городце; или что Князь Великий подавалъ въ куплю, и грамоты свои подавалъ купленые, ино те все купли не въ куплю, а те все волости и села намъ по старине, и нашимъ Бояромъ; а тобе Господину нашему Князю Дмитрию Юриевичю, и вашимъ Княземъ и вашимъ Бояромъ въ те волости и въ села не въступатися. А что, Господине, братъ твой Князь Иванъ Аньдреевичъ, держа за собою отчину нашю Суздаль, инъ далъ святой Троице село нашо уделное Шухобалово, а другое село нашо уделное жо продалъ своему Боярину Петру слободку Шиповьскую, а у Княгини у Марьи купилъ собе Князь Иванъ село Шокшовъ: ино, Господине, те села намъ по старине; а что будетъ на Шокшове далъ, инъ Господине возметъ свою цену по крестному целованью, что будетъ на немъ далъ. А что, Господине, Князь Великий отъималъ у насъ безъ пошлины села, да подавалъ святому Рожеству въ манастырь въ Володимирь: и те села намъ по старине, какъ было при нашомъ прадеде при Великомъ Князи Дмитрие Костянтиновиче, а десятое манастырю по старине. А вашему, Господине, Великому Княженью съ нашею прадединою и дединою и отчиною судъ по старине: а о обидныхъ делехъ тобе, Господине, отслати судей опчихъ, а намъ, Господине, отслати своихъ судей, ини тому исправу учинятъ; а чего наши судьи не узнають, ино имъ третий ты Господинъ нашь Князь Дмитрий Юриевичъ до отца твоего до Митрополита. А коли, Господине, всядешъ на конь. и намъ, Господине, съ тобою всести на конь со всеми людми; а где, Господине, пошлешъ своего сына, и мне, Господине, съ твоимъ сыномъ послати своего брата, или своего сына со всеми людми. А Бояромъ и детемъ Боярьскимъ и слугамъ межи насъ волнымъ воля. А кто иметъ жити въ вашей отчине въ Великомъ Княженье, а иметъ служити намъ, и тобе ихъ, Господине, и твоему сыну блюсти какъ и своихъ; а кто иметъ жити у насъ, а имутъ служити тобе Князю Дмитрию Юрьевичу и твоему сыну, и намъ ихъ, Господине, блюсти какъ и своихъ. А приставовъ ти въ нашю отчину не въсылати, ни твоему сыну, ни закладней ти въ нашои отчине не держати; а такжо и намъ въ твоемъ Великомъ Княженье закладней не держати. А исъ чего где Господинъ нашь выступишъ, и намъ тобе [116] о томъ помянути, и тобе ся того обыскати, а тобе насъ жаловати; а где мы исъ чего выступимъ и тобе Господину нашему велети намъ възвестити, и намъ тобе челомъ бити, а тобе насъ жаловати, а за то не не сложити. А что будемъ где грабили и наши Бояре и наши люди въ твоей отчине въ Великомъ Княженье: ино тому всему дерть по та места, какожо дасть ти Богъ, велитъ достати своее отчины Великого Княженья. А суженого не посужати; а суженое, даное, положеное, заемное, кабалное, поручное дати по исправе; а холопу, робе отъ века судъ. А на семъ на всемъ, Господинъ нашь Князь Дмитрий Юриевичь, целуй къ намъ крестъ ко Князю Василью Юриевичю и ко Князю Федору Юриевичю, по любви, въ правду.

На обороте Грамоты написано:

Грамота докончалная Великого Князя Дмитрея Юрьевича съ братьею со Княземъ Васильемъ да со Княземъ Федоромъ Юрьевичи.

(Перепечатано из С. Г. Г. и Д., т. I, № 62, стр. 135-137).