Договорная Грамота (в копии) Боровского Князя Василия Ярославича ¹ с Великим Князем ВАСИЛИЕМ ВАСИЛИЕВИЧЕМ, с Дядею его Князем Константином Дмитриевичем, и с Князьями Можайскими, Князем Иваном Андреевичем и Князем Михайлом Андреевичем ²: о бытии им в дружбе и согласии; о управлении всякому своими землями; о взаимном вспоможении противу общих неприятелей; о дани, судах, расправах, и проч.— Писана около 1433 года.

Божьею милостью и пречистые Богоматери. На семъ, Господине брате стариший, отець Князь Велики ВАСИЛЕЙ ВАСИЛЬЕВИЧЪ, съ своимъ братомъ молодшимъ Княземъ Костянтиномъ Дмитреевичемъ, и съ вашою молодшою братьею со Княземъ Иваномъ Андреевичемъ, целуйте ко мне крестъ ко Князю Василью Ярославичю. Имети ти, Господине Князь Велики, себе братомъ молодшимъ и сыномъ, а брату твоему, Господине, молодшому Князю Костянтину Дмитреевичю имети ему меня собе братаничемъ; а братьи, Господине, ваши молодшии Князю Ивану Князю Михайлу Андреевичемъ имети имъ меня собе братомъ молодшимъ. А быти съ вами за одинъ; а держати ми, Господине, подъ тобою Великимъ Княземъ Княженье Великое чесно и грозно. А добра ми вамъ хотети везде во всемъ; а что ми слышовъ о вашомъ добре или о лисе отъ хрестьянина и отъ поганина, а то ми вамъ поведати въ правду, безъ примышленья. А хто будетъ, Господине Князь Велики, тобе другъ, то и мне другъ; а хто будетъ, Господине Князь Велики, тобе недругъ, то и мне недругъ. А не канчивати ми, Господине Князь Велики, ни съ кемъ безъ веданья вашого: такжо, Господине, и вамъ не канчивати ни съ кемъ безъ моего веданья; а держати вы меня въ братстве безъ обиды. А чемъ, Господине Князь Велики, благословилъ тобя Отець твой Князь Велики Василей Дмитреевичь въ Москве, и Коломною съ волостми, и всемъ Великимъ Княженьемъ, такжо и Муромомъ съ волостми, и Козельскими месты, иными примыслы: того ми, Господине, подъ тобою блюсти, а не обидети, ни вступатися, такжо и подъ твоею братьею подъ Княземъ Костянтиномъ Дмитреевичемъ, и подъ Княземъ Иваномъ и подъ Княземъ Михайломъ Андреевичемъ ихъ уделовъ блюсти, а не обидети. А что уделъ Деда моего Княжъ Володимеровъ Андреевича, треть въ Москве и въ пошлинахъ, и Серпыховъ съ волостми, Боровескъ съ волостми, Лужа съ волостми, Хотунь съ волостми, Радонежь съ волостми, Перемышль съ волостми, Мужковы горы треть, Добрятиньская треть, числяныхъ людей треть: того, Господине Князь Велики, тобе и твоей братьи молодшой блюсти, ни вступатися, ни обидети. А числяныхъ людей блюсти намъ съ одного; а Ордынци и делюи, а те знаютъ своя служба по старине, а земель ихъ не купити. А где, Господине Князь Велики, самому тобе всести на конь противу своего недруга, и [108] мне пойти съ тобою безъ ослушанья; а где пошлешь на свою службу своихъ Воеводъ, и мне послати съ твоими Воеводами своего Воеводу съ своими людми. А которые, Господине, Бояря и дети Боярьские служатъ тобе Великому Князю или твоей братье, а жывутъ въ моемъ уделе, и те, Господине, ходятъ съ тобою съ Великимъ Княземъ и съ вашими Воеводами: а которые, Господине, Бояря и дети Боярьские жывутъ въ твоей отчине Великомъ Княженье и въ твоей братьи въ отчинахъ, а имутъ служыти мне Князю Василью Ярославичю, и темъ ходити со мною и съ моими Воеводами. А городная осада, где хто жыветъ, тому туто сести, опричь Бояръ введеныхъ и путниковъ. А коли, Господине Князь Велики, тобе въ городы на Москве и въ станы въ Московьские послати своего данщика, и мне послати съ твоимъ данщикомъ своего данщика; а что зберутъ данщики наши, а тому ити въ твою казну Великого Князя. А Орда знати тобе Великому Князю, а мне Орды не знати. А въ уделъ ти, Господине, въ мой своихъ данщиковъ не всылати, ни приставовъ своихъ не всылати, ни грамотъ ти не давати, ни закладней ни оброчниковъ не держати; а селъ ти, Господине, въ моемъ уделе не купити, ни твоей братье, ни вашимъ Бояромъ безъ моего веданья: а мне въ твое Великое Княженье и въ твоей братьи вотчины данщиковъ не всылати, ни приставовъ своихъ не давати, ни закладней ни оброчниковъ не держати, ни селъ не купити безъ нашего веданья, ни моимъ Бояромъ. А что, Господине, суды потягли къ городу изъ вашихъ волостей и изъ моихъ при твоемъ Деде при Великомъ Князи, и при твоемъ Отце при Великомъ Князи, и те суды судятъ наши Наместници по томужъ, какъ было переже сего: а которые слуги потягли къ дворьскому, а черные люди къ сотцкому при твоемъ Отце при Великомъ Князи, а техъ вамъ и мне не приимати. А давати ми, Господине, тобе Великому Князю съ своей отчины по тому розводу, какъ напередъ сего давали въ выходъ и въ ямъ. А ци переменитъ Богъ Орду, не имемъ давати къ Орде; и тобе, Господине, имати съ своей отчины съ Великого Княженья дань собе, а мне съ своего удела собе дань имати. А хто, Господине, иметъ жыти твоихъ Бояръ и слугъ и твоихъ братье въ моемъ уделе, и мне ихъ блюсти какъ и своихъ, а дань взяти какъ на своихъ: а хто иметъ жыти въ твоей отчине въ Великомъ Княженье, или у твоей братьи въ вотчинахъ моихъ Бояръ и слугъ, вамъ ихъ блюсти какъ и своихъ, и дань взяти какъ на своихъ. А Московьская, Господине, рать ходитъ съ твоимъ Великого Князя Воеводою, какъ было переже сего. А въ городъ на Москву послати намъ своихъ Наместниковъ, и они очистятъ нашихъ холоповъ и селчянъ. А кого собе, Господине, вымемъ огородниковъ и мастеровъ; и тобе Князю Великому и твоей братьи два жеребья, а мне треть. А которые, Господине, дела учинятся межъ нами, и намъ отослати своихъ Бояръ, и оне переговорятся; а о чемъ сопрутся, и оне едутъ на третей, кого собе изберутъ; а которого Князя Боярина умолвятъ, и тотъ Князь то подойметъ, а Бояромъ вины нетъ. А закладней намъ въ городе не держати; а человека зъ дворомъ въ городе не купити, а блюсти намъ съ одного. А Бояромъ и слугамъ межъ насъ волнымъ воля. А на семъ на всемъ, Господине брате стариший и отче Князь Велики ВАСИЛЕЙ ВАСИЛЬЕВИЧЪ, съ своимъ братомъ молодшимъ со Княземъ Костянтиномъ Дмитреевичемъ, и съ вашою братьею молодшою со Княземъ Иваномъ и со Княземъ Михайломъ Андреевичемъ, целуйте ко мне крестъ ко Князю Василью Ярославичю, по любви въ правду, безъ хитрости.

(Перепечатано из С. Г. Г., т. I, № 45, стр. 90-92).

Комментарии

1. Сей Князь был сын Князя Боровскаго Ярослава Володимеровича, шурин же Великаго Князя ВАСИЛИЯ ВАСИЛИЕВИЧА; ибо сестра его Марья Ярославовна была супруга Великаго Князя.

2. Князья сии были внуки Великаго Князя Дмитрия Ивановича Донскаго, а дети Князя Можайскаго Андрея Дмитриевича, умершего 1432 года.