II.

Договорная Грамота Великого Князя ДИМИТРИЯ ИОАННОВИЧА съ двоюродным его братомъ Княземъ Володимером Андреевичем (первая): о бытии имъ въ дружбе и союзе; о управлении каждому своими землями по учиненному Отцами ихъ розделу; о взаимном вспоможении противу общих ихъ неприятелей; о даче для Ордынского похода дани; о судах и расправах.— Учиненная при Митрополите Алексее 1362 года.

По благословенью отця нашего Олексея Митрополита всея Руси. Се язъ Князь Великий ДМИТРИЙ ИВАНОВИЧЬ докончали есмы зъ братомъ своимъ съ молодшимъ со Княземъ съ Володимеромъ Андреевичемъ, целовали есмы крестъ у отця своего у Олексея у Митрополита всея Руси. Быти ны за одинъ, имети ми брата своего старейшего Князя Великого ДМИТРИЯ въ отця место; а жити ны по тому, какъ то Отци наши жили съ братомъ своимъ съ старейшимъ, зъ Дядею нашимъ со Княземъ съ Великимъ съ Семеномъ. А тобе брату моему молодшему Князю Володимеру держати ти подо мною Княженье мое Великое честно и грозно, а добра ти мне хотети во всемь: а мне Князю Великому тобе брата своего держати въ братъстве, безъ обиды во всемь. А что мя благословилъ Отець мой Князь Великий Иванъ уделомъ Дяди моего Князя Великого Семеновымъ, того ти но искати: тобе знати своя отчина, а мне знати своя отчина. А кто будеть мне брату твоему старейшему другъ, то и тобе другъ; а кто будеть мне недругъ, то и тобе недругъ. А тобе брату моему молодшему безъ мене не докончивати, ни съсылатися ни съ кемже; такоже и мне безъ тобе. А что ти слышавъ о мне отъ крестьянина ли, отъ поганина ли о моемь добре или о лисе, или о нашей отчине и о всехъ крестьянехъ, то ти мне поведати въ правду, безъ примышленья, по целованью; а мне такоже тобе поведати. А тобе брату моему молодшему въ моемь уделе селъ ти не купити, ни твоимъ Бояромъ, ни закладневъ ти ни оброчниковъ не держати: такоже и мне въ твоемь уделе селъ не купити, ни моимъ Бояромъ, ни закладневъ ми ни оброчниковъ не держати. А что наши Ординци и Делюи, а темъ знати своя служба, како было при нашихъ Отцехъ. А коли ми будеть слати свои данщики въ городъ и на перевары, и которыи волости за Княгинею за Ульяною и въ Бели; а тобе свои данщики слати съ моими данщики вместе. А въ твой ми уделъ данщиковъ своихъ и приставовъ не всылати; такоже и тобе въ мой уделъ данщиковъ своихъ ни приставовъ не всылати, ни во все мое Великое Княженье. А которыи слуги потягли къ дворьскому, а черныи люди къ сотникомъ, тыхъ ны въ службу не приимати, но блюсти ны ихъ съ одиного, такоже и численыхъ людий: а которыи суды издавна потягли къ городу, а те и нынеча къ городу; а Бояромъ и слугамъ вольнымъ воля. А кто будеть Бояръ и слугъ къ тобе брату моему молодшему отъ мене отъехалъ до сего докончанья, или по семь докончаньи къ тобе приедеть, на тыхъ ми нелюбья не держати; такоже и отъ тобе отъ брата моего молодшего ко мне Бояръ и слугъ кто приехалъ до сего докончанья или ли по семь докончаньи, или по семь докончаньи ли кто приедеть, тобе брату моему молодшему на тыхъ ти нелюбья не держати. А чего ми будеть искати на твоихъ Боярехъ, или чего искати тобе на моихъ Боярехъ, намъ отослати отъ собе по Боярину, те тому делу учинять исправу; а ци о какове деле межи собе сопрутся, [98] ехати имъ на третий, кого собе изберуть, тамо ехавъ перемолвятся. А чего ны будеть поискати тобе ли, мне ли, а тому такоже межи насъ исправа. А Ординьская тягость и проторъ дати ти мне брату своему старейшему съ своего удела по давнымъ сверткомъ. А коли ми будеть, брате молодший, и дань взяти на своихъ Боярехъ въ Великомъ Княженьи, а кто будеть твоихъ Бояръ и слугъ въ Великомъ Княженьи ......ми дань взяти, какъ и на своихъ ..................................................................................

.................... въ городе и въ варяхъ или въ городьскихъ .................. на тыхъ. ................ по силе, а тобе брату моему со мною. А въ твой ми уделъ грамотъ жаловальныхъ не давати; такоже и тобе въ мой уделъ и во все мое Великое Княженье не давати своихъ грамотъ: а которыи грамоты буду подавалъ, а те ми грамоты отоимати; а тобе такоже брату моему молодшему грамоты отоимати, кому будешь подавалъ въ моемь Княженьи. А который Бояринъ поедеть исъ коръмленья отъ тобе ли ко мне, отъ мене ли къ тобе, а службы не отъслуживъ, тому дати коръмленье по исправе; а любо служба, отъслужити ему. А коли ми будеть где отпущати своихъ Воеводъ изъ Великого Княженья, а кто будеть....... твоихъ Бояръ и слугъ, тобе послати своихъ Воеводъ съ моими Воеводами вместе безъ ослушанья; а кто ся ослушаеть, того ми казнити, а тобе брату моему со мною. А кого коли оставити у тобе Бояръ, про то ти мене доложити, то ны учинити по згадце: кому будеть слично ся остати, тому остатися; кому ехати, тому ехати. А тобе брату моему молодшему мне служити безъ ослушанья по згадце, како будеть мне слично и тобе брату моему молодшему; а мне тобе кормити по твоей службе. А коли ти будеть всести со мною на конь, а кто будеть твоихъ Бояръ и слугъ, где кто ни живеть, темъ быти подъ твоимъ стягомъ. На семь на всемь целовали есмы межи собе крестъ по любви въ правду, безо всякое хитрости.

У сей Грамоты печатей нет, но есть знак, что привешены были к оной две печати. На обороте же сей Грамоты написано:

Грамота докончалная Князя Великого Дмитрия Ивановича съ братомъ съ своимъ съ молодшимъ со Княземъ Володимеромъ Ондреевичемъ при Олексеи Митрополите всея Руси.

(Перепечатано из С. Г. Г. и Д., т. I, № 27, стр. 44-45.)