Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

XIV.

1389 или 1404, Июня 28. Уставная грамота Великого Князя Василия Димитриевича и Митрополита Киприана, о церковных судах, распорядках и пошлинах въ волостях, принадлежащих духовному ведомству.

Се язь Князь Великий .............., седъ съ своимъ отцемъ ......................... Митрополитомъ Киевскимъ и всеа Руси, управили есмь о домехъ о церьковныхъ и о волостехъ, и о земляхъ, и о водахъ, и о всехъ пошлинахъ о церковныхъ. Судити Митрополиту Луховца съ волостелемъ или съ доводщикомъ, а судье моему Великого Князя не быти; а бояромъ и слугамъ Князя Великого и митрополичимъ земль Луховскихъ не купити, а которыи будутъ покупили, а темъ лезти вонь, а серебро свое взяти. А имати мне Князю Великому дани съ Луху въ выходъ по своей грамоте по оброчной, а лише того оброка не имати; а белки, ни резанки, не имати Князю Великому, но Митрополиту. А что Луховци ставливали хоромы на Князя Великого дворе въ Володимере, ино то обыскано, что то было уничилося ново, не по пошлине, а нынеча ненадобе Луховцемъ ставити хоромовъ на Князя Великого дворе. А Сенегъ его по тому, какъ обыскано и управлено по старине: кое Князя Великого, то Князя Великого; а кое церковное митрополичь, а то митрополиче; а дань имати съ Сенгу въ выходъ по моей грамоте Князя Великого по оброчной, а лише того оброка не имати. А что села отца нашего митрополичи церковныи, которыи дававны издавна и до Олексеа Митрополита, и те села потянуть къ Митрополиту, какъ и при Олексеи Митрополите тягли; а на техъ селехъ данщику и белщику моему Князя Великого не быти, а дань имати съ техъ селъ въ выходъ по оброку по моей грамоте Князя Великого по оброчной, а лише того оброка не имати; а ямъ по старине шестый день, а коли мои села Князя Великого дадутъ, тогды и митрополичи дадутъ. А что люди митрополичи живутъ въ городе, а тянутъ къ дворцу, а техъ описавъ да положить на нихъ оброкъ, какъ и на моихъ Князя Великого дворчанъ. А Костянтиновьский монастырь извечный митрополичь и съ селы; также и Борисоглебьский монастырь и съ селы, какъ тягли издавна и при Олексеи Митрополите, потомужь и нынеча потянутъ. А что села пошлые манастырскии, въ те села мне Князю Великому не всылати, ни судити: ведаютъ ихъ и судятъ игумены; а будетъ судъ смесной, ино прибытокъ наполы. А которыи человекъ мой Князя Великого ударитъ челомъ на игумена, или на попа, или на черньца, ино судъ вобчой; а не пригодиться Митрополита въ Великомъ Княжении, коли куде отъедетъ въ свою митрополию дале, а ударитъ кто челомъ мне Князю Великому на митрополича, и мне Князю Великому судити; а будетъ судъ смесной, ино прибытокъ наполы; а будетъ митрополичь судъ, ино судитъ митрополичь наместникъ. А также будетъ кто ударитъ челомъ мне Князю Великому на митрополича наместника, или на десятинника, или на волостеля, и мне Князю Великому судить самому. А митрополичимъ людемъ церковнымъ тамги не давати, какъ было и при Алексеи Митрополите: кто продастъ свое домашнее, тотъ тамги не дастъ; а который иметъ прикупомъ которымъ торговати, а тотъ тамгу дасть. А коли дань дати въ Татары, тогды и оброкъ дати церковнымъ людемъ: а коли дани не дати въ Татары, тогды и оброкъ не дати церковнымъ людемъ; а съ Луху по тому же отца нашего Митрополита Киевского и всеа Руси. А про войну, [148] коли язъ самъ Князь Великий сяду на копь, тогды и митрополичимъ бояромъ и слугамъ, а подъ митрополичимъ воеводою, а подъ стягомъ моимъ Великого Князя; а кто будетъ бояръ или слугъ не служивалъ Алексею Митрополиту, а приказался ново Митрополиту, а те поидутъ подъ моимъ воеводою Великого Князя, где который живетъ, инъ подъ темъ воеводою и есть. А сборного Митрополиту имати съ церкви шесть алтынъ, а заезда три денги, а болши того ненадобе ничто; а десятиннику на десятину наседъ имати за въездное, и за Рожественое, и за Петровское, пошлины шесть алтынъ, а боле того ненадобе ничто; а имати сборное о Рожестве Христове, а десятиннику имати своя пошлина о Петрове дни; а которые съборные церкви по городомъ не давывали сборного при Феогносте Митрополите и при Алексеи Митрополите, темъ и нынеча не давати. А слугъ моихъ Князя Великого и моихъ данныхъ людей въ диаконы и въ попы Митрополиту не ставити; а который поповичь хотя будетъ писанъ въ мою службу, а въсхочетъ стати въ попы или въ диаконы, ино ему волно стати; а поповичь, который живетъ у отца, а хлебъ естъ отцовъ, ино той митрополичь: а который поповичь отделенъ и живетъ опричь отца, а хлебъ естъ свой, а то мой Князя Великого. А писана грамота на Москве, месяца Июня въ 28 день, индикта въ 12, въ лето 6900.

Выписано из Великой Минеи-четъи (месяц Август, л. 776 и 777), хранящейся в Московской Синодальной библиотеке под № 183 Сверено с Сборником той же библиотеки (in 4 0, л. 38-40), значащемся по каталогу под № 562.

(Перепечатано из А. А. Э., т. I, № 9, стр. 4-6).

Еще больше интересных материалов на нашем телеграм-канале ⏳Вперед в прошлое | Документы и факты⏳

Главная страница  | Обратная связь
COPYRIGHT © 2008-2024  All Rights Reserved.