Первая.

Божьею милостью и пречистые его Матери, и по благословенью отца нашего Геронтья Митрополита всеа Руси. На семъ на всемъ, брате молодший Князь Велики Иванъ Васильевичь, целуй ко мне крестъ къ своему брату старейшему къ Великому Князю ИВАНУ ВАСИЛЬЕВИЧЮ, и къ моему сыну, къ своему брату старейшему, къ Великому Князю Ивану, и къ нашему брату молодшему ко [125] Князю Андрею Васильевичю, и къ нашему брату молодшему ко Князю къ Борису Васильевичю, и къ меншему нашему брату ко Князю къ Михайлу Андреевичю, и къ его сыну ко Князю къ Василью: имети ти меня Великого Князя себе братомъ старейшимъ, и моего сына Великого Князя имети ти его себе братомъ старейшимъ; а брата нашего молодшего Князя Андрея. имети ти его себе братомъ, а брата нашего молодшево Князя Бориса, и меншево нашего брата Князя Михайла и сына его Князя Василья имети ти себе братьею молодшею. А добра ти намъ хотети везде во всемъ, где бы ни было; а что ти слышевъ о нашемъ добре или о лисе отъ христианина, или отъ Литвина или отъ иноверця, то ти намъ поведати въ правду безъ примышленья. А быти ти со мною съ Великимъ Княземъ, и съ моимъ сыномъ съ Великимъ Княземъ везде за одинъ безъ хитрости; а намъ Великимъ Княземъ съ тобою быти везде за одинъ, и печаловатися тобою и твоею отчиною безъ хитрости: а где будешъ хотя послалъ на наше лихо, тамо ти отослати. А съ Королемъ съ Казимиромъ и съ Великимъ Княземъ Литовскимъ, или кто иный будетъ Князь Велики на Литовской земле, не канчивати ти, ни съсылатися съ нимъ на наше лихо, ни въ его ти ся имя съ своею землею не дати; а отъ насъ ти къ Литовскому никоторыми делы не отступити, а быти ти съ нами съ Великими Князьми на Литовского везде за одинъ. Также ти, брате, и съ нашими лиходеи со Княжими съ Ивановыми детми Можайского, и со Княжими съ Ивановыми детми Шемячича, и съ Ярославичя сыномъ ² не канчивати ти съ ними, ни къ собе ихъ не приимати, ни съсылатися съ ними никоторою хитростью; а быти ти съ нами на нихъ везде за одинъ. Также намъ кто иный лиходей будетъ, а побежитъ изъ нашие земли въ твою землю, и тебе и того не приимати къ собе; а быти ти на него съ нами съ Великими Князьми за одинъ, также и на всякого нашего недруга быти ти съ нами везде за одинъ и на Татаръ. А учнетъ къ тебе съ чемъ присылати Король и Великий Князь Литовский, и тебе то намъ поведати въ правду безъ хитрости; а съ чемъ къ тобе учнутъ слати те наши недрузи Можайского дети и Шемячичя дети, и Ярославичя сынъ, то ти намъ также сказати въ правду, а техъ ти послати къ намъ, ково къ тебе пришлютъ. А пойдетъ на тебя Король и Великий Князь Литовский, и намъ Великимъ Княземъ пойти самимъ тобя боронити; а пошлетъ на тебя своихъ Воеводъ, и намъ послати своихъ Воеводъ тебя боронити; а кто тебя почнетъ обидети, а отъ кого ся самъ не взможешъ оборонити, и намъ тобя отъ того боронити. А какъ дасть Богъ учнемъ имати любовь и докончание съ Королемъ и съ Великимъ Княземъ Литовскимъ, и намъ тебя писати въ своемъ докончанье, что еси съ нами одинъ человекъ; а тебе съ нимъ не канчивати ни съ инымъ ни съ кемъ. А где пойдемъ мы Великие Князи ратью на своего недруга, и тебе Великому Князю Ивану самому пойти съ нами безъ ослушанья; а где пошлемъ Воеводъ своихъ, и тебе послати съ нашими Воеводами своихъ Воеводъ въ правду безъ хитрости. А со Царевичемъ съ Даньяромъ, или кто будетъ иный Царевичь на томъ месте, не канчивати ти съ ними, ни съсылатися па наше лихо; а жити ти съ ними по нашему докончанью. А что шло Царевичю Касыму и сыну его Даньяру Царевичю съ вашие земли при твоемъ деде при Великомъ Князи Иване Федоровиче и при твоемъ отце при Великомъ Князи Василье Ивановиче, и что Царевичевымъ Княземъ шло и ихъ казначеемъ [126] и дарагамъ ³: а то тобе давати съ своее земли Царевичю Даньяру, или кто иной Царевичь будетъ на томъ месте, и ихъ Княземъ и Княжимъ казначеемъ и дарагамъ по темъ записемъ, какъ отець мой Князь Велики Василей Васильевичь за твоего отця за Великого Князя Василья Ивановича кончалъ со Царевичевыми съ Касымовыми Князьми съ Кобякомъ съ Айдаровымъ сыномъ, да съ Исакомъ съ Ахматовымъ сыномъ. А ясачныхъ людей отъ Царевичя отъ Даньяра, или кто будетъ на томъ месте иный Царевичь, и отъ ихъ Князей тобе Великому Князю Ивану и твоимъ Бояромъ и твоимъ людемъ не приимати. А которые люди вышли на Резань отъ Царевичя и отъ его Князей после живота деда твоего Великого Князя Ивана Федоровича бесерменинъ, или Мордвинъ, или Мачяринъ, черные люди, которые ясакъ Царевичю даютъ: и тебе Великому Князю Ивану и твоимъ Бояромъ техъ людей отпустити доброволно на ихъ места, где кто жилъ; а кто не похочетъ на свои места пойти, ино ихъ всилу не вывести, а имъ Царевичю давати его оброки и пошлины по ихъ силе. А что давали те люди деду твоему Великому Князю Ивану Федоровичю и отцу твоему Великому Князю Василью Ивановичю; и ты свои пошлины емлешъ, а Царевичю въ то не вступатися, ни его Княземъ. Также и опроче того, которой Царь или Царевичь будетъ у насъ въ нашей земле, не канчивати ти съ ними, ни съсылатися на наше лихо; а учнетъ тебя чемъ обидети, и намъ за тобя стояти и боронити. А отчины ти нашие Москвы и Коломны съ волостми, и всего нашего Великого Княженья подъ нами подъ Великими Князьми не обидети, ни вступатися, ни подъ нашими детми ни твоимъ детемъ никоторою хитростью; а намъ Великимъ Княземъ твоей отчины Переславля Рязанского и всехъ Переславскихъ местъ, что потягло къ Переславлю, не обидети, ни вступатися, ни нашимъ детемъ и подъ твоими детми никоторою хитростью. А межи насъ розделъ земле ниже Коломны по реце по Оце по Цну, отъ усть Цны вверхъ по Цне, что на Московской стороне, то къ Москве; а что на Рязанской стороне, то къ Рязани. А что Володимерьское порубежье, а то по тому, какъ было при нашихъ прадедехъ и дедехъ, при Великомъ Князи Иване Даниловиче, и при Великомъ Князи Семене Ивановиче, и при Великомъ Князи Иване Ивановиче, и при Великомъ Князи Дмитрее Ивановиче, и при Великомъ Князи Василье Дмитреевиче, и при нашемъ отце при Великомъ Князи Василье Васильевиче, и при твоемъ прадеде при Великомъ Князи Иване Ярославиче, и при Великомъ Князе Иване Ивановиче, и при Великомъ Князи Иване Александровиче, и при Великомъ Князи Олге Ивановиче, и при твоемъ прадеде при Великомъ Князи Федоре Олговиче, и при твоемъ деде при Великомъ Князи Иване Федоровиче, и при твоемъ отце при Великомъ Князи Василье Ивановиче. А что купля отця нашего Великого Князя Василья Васильевича за рекою за Окою Тешиловъ и Веневъ и Растовець и иная места, и темъ нашимъ землямъ съ твоею землею рубежъ отъ Оки съ усть Смедвы въверхъ по Смедве до усть Песоченки, а Песоченкою до верховья Песоченского, а отъ верховья Песоченки черезъ лесъ прямо къ Осетру къ усть Кудесне, а Кудесною въверхъ до верховья, а отъ верховиа Кудесны прямо къ верхъ Табаломъ, а по Табаломъ на низъ въ Донъ. И что перешло за тотъ рубежъ тое купли отця нашего Великого Князя Васильевы на твою сторону, и намъ Великимъ Княземъ въ то не вступатися, ни подъискивати, ни нашимъ детемъ подъ твоими детми никоторою [127] хитростью; а что перешло твоей земли Великого Князя Рязанские за тотъ рубежъ на нашу сторону, и въ то ся тебе у насъ не вступати, ни подъискивати подъ нами подъ Великими Князьми, ни подъ нашими детми ни твоимъ детемъ никоторою хитростью. А что за Дономъ твое Великого Князя Иваново Романцево съ уездомъ, и что къ нему потягло, и намъ Великимъ Княземъ въ то не вступатися; а тебе не вступатися въ нашу отчину въ Елечь и во вся Елецская места, а Меча намъ ведати вопче. А что Мещерскаа места, что будетъ покупилъ прадедъ твой Князь Велики Олегъ Ивановичь, или прадедъ твой Князь Велики Федоръ Олговичь, или дедъ твой Князь Велики Иванъ Федоровичь, или отець твой Князь Велики Василей Ивановичь, ты или Князь Велики Иванъ Васильевичь, или ваши Бояря: въ та места тебе Великому Князю Ивану Васильевичю не вступатися, пи твоимъ Бояромъ, а знати ти свое серебро и твоимъ Бояромъ; а земля по давному къ Мещере, а порубежье Мещерскимъ землямъ, какъ было при Великомъ Князи Иване Ярославиче и при Князи Александре Уковиче. А что прадедъ нашъ Князь Велики Дмитрей Ивановичь поотоималъ места Татарьские и Мордовские, и та места намъ Великимъ Княземъ, а тебе ся въ нихъ не вступати: а что будетъ отнялъ прадедъ твой Князь Велики Олегъ Ивановичъ Татарьские места и Мордовские, ино то твое и есть, а намъ Великимъ Княземъ не вступатися. А что наши Князи Мещерские, которые живутъ въ Мещере и у насъ у Великихъ Князей, и тебе ихъ къ себе не приимати; а побежатъ. отъ насъ, и тебе ихъ добывати намъ безъ хитрости, а добывъ ти ихъ намъ выдати. А которой полонъ побежитъ изъ Татаръ въ нашу землю въ Великое Княженье, опроче твоей земли полону: и тебе Великому Князю Ивану тотъ полонъ велети отпущати въ нашу землю доброволно со всемъ, съ чемъ будутъ выбежали. А судъ вопчей межи насъ по преставленье отця нашего Великого Князя Василья Васильевича: а которыхъ делъ не искали при нашемъ отце при Великомъ Князи Василье Васильевиче, пристава не было, за поруку не дано, тому погребъ; а кто за порукою или за приставомъ, тому судъ; а которые дела суженые или поле не кончалося, а то кончати. А намъ Великимъ Княземъ въ суды въ вопчие не вступатися; а судьямъ нашимъ сести судити, целовавъ крестъ, что имъ судити въ правду, а судити имъ но старине. А где ся учинитъ розбой и татба и наездъ изъ твоее отчины на нашихъ людей, и о томъ суда вопчево не ждати, отослати намъ на то своихъ судей, да велети намъ тому исправа учинити безъ перевода; а не даси исправы, или судьи твои судомъ переведутъ, и намъ свое отняти, а то намъ не вь измену. А судьи наши вопчие о чемъ ся сопрутъ, и они собе берутъ трехъ Князей нашихъ земль; а на комъ ищутъ, и тотъ судья себе беретъ изъ трехъ одново. А суженово не посужати; а суженое, положеное, заемное, поручное дати по исправе; а холопа, робу, поручника, должника, татя, розбойника, душегубця, порубежника по исправе выдати. А пошлинъ съ беглеца съ семьи два алтына, а съ одинця алтынъ; а мытные держати старые пошлины, которые бывали при нашихъ прадедехъ и дедехъ и при нашихъ отцехъ, а новыхъ намъ мытовъ и пошлинъ не замышляти. А мыта съ воза и въ городехъ денга, а съ пешехода мыта нетъ; а тамги и всехъ пошлинъ отъ рубля алтынъ, а съ лодьи съ доски по алтыну, а съ струга съ набои два алтына, а безъ набои денга; а со Князей Великихъ лодей пошлинъ нетъ. А вывода намъ и рубежа не замышляти; а Бояромъ и слугамъ межи насъ волнымъ воля. А на семъ на всемъ, Князь Велики Иванъ Васильевичь, целуй ко мне крестъ къ своему брату къ старейшему къ Великому Князю ИВАНУ ВАСИЛИЕВИЧЮ, и къ моему сыну, къ своему брату старейшему, къ Великому Князю Ивану, и къ нашему [128] брату молодшему ко Князю Андрею Васильевичю, и къ нашему брату молодшему ко Князю къ Борису Васильевичю, и къ меншему нашему брату ко Князю Михайлу Андреевичю, и къ его сыну ко Князю къ Василью, по любви, въ правду безъ хитрости. А писана на Москве, лета девятьдесятъ перваго, Июниа 9 (т. е. 6991, от Р. Хр. 1483, Июня 9).

На подлинном подписано:

+ Смирены Героньтий Митрополитъ всеа Руси.

Вторая.

Божьею милостью и пречистой его Матери, и по благословенью отца нашого Геронтья Митрополита всея Руси. На семъ на всемъ, Господине брате старишой Князь Великий ИВАНЪ ВАСИЛЬЕВИЧЬ, исъ своимъ сыномъ, съ моимъ братомъ старишымъ, съ Великимъ Княземъ Иваномъ, целуйте ко мне крестъ къ своему брату молодшому къ Великому Князю Ивану Васильевичю, и съ своимъ братомъ молодшымъ со Княземъ съ Ондреемъ съ Василъевичемъ, и съ вашымъ братомъ молодшымъ со Княземъ Борисомъ съ Васильевичем, и съ меншымъ вашымъ братомъ со Княземъ Михайломъ Андреевичемъ, и съ его сыномъ со Княземъ съ Васильемъ: имети ти, Господине, мене собе братомъ молодшымъ, и твоему сыну Великому Князю Ивану имети ему меня собе братомъ молодшымъ; а брату вашому молодшому Князю Андрею Васильевичю имети ему меня собе братомъ, а брату вашому молодшому Князю Борису Василъевичю, и меншому вашому брату Князю Михайлу Ондреевичю и его сыну Князю Василью имети имъ меня собе братомъ старейшымъ. А добра вамъ хотети мне везде во всемъ, где бы ни было; а что вамъ слышевъ о моемъ добре или о лисе отъ хрестьянина, или отъ Литвина или отъ иноверца, то вамъ поведати мне въ правду безъ примышленье. А быти вамъ со мною везде за одинъ безъ хитрости, а мне съ Вами съ Великими Князьми быти везде за одинъ, и печаловатися вамъ мною и моею вотчиною безъ хитрости: а и где хотя буду послалъ на ваше лихо, тамо ми отослати. А съ Королемъ съ Казимиромъ и съ Великимъ Княземъ Литовскимъ, или хто будетъ иный Князь Великий на Литовской земле, не канчивати ми, ни съсылатися съ нимъ на ваше лихо, ни въ его имя съ своею ми ся землею не дати; а отъ васъ ми отъ Великихъ Князей къ Литовскому никоторыми делы не отступити, а быти ми съ вами съ Великими Князьми на Литовского везде за одинъ. Такжо ми и съ вашыми лиходеи со Княжыми Ивановыми детми Можайского, и со Княжыми Ивановыми детми Шемячича, и съ Ерославича сыномъ не канчивати ми съ ними, ни къ собе ихъ не примати, ни съсылатися съ ними никоторою хитростью; а быти ми съ вами на нихъ везде за одинъ. Такжо вамъ хто иный лиходей будетъ, а побежытъ изъ вашые земли въ мою землю, и мне и того не приимати къ собе; а быти ми на него съ вами съ Великими Князьми за одинъ, такжо и на всякого вашого недруга быти ми съ вами везде за одинъ и на Татаръ. А учнетъ ко мне съ чемъ присылати Король и Великий Князь Литовский, и мне то вамъ поведати въ правду безъ хитрости, а съ чемъ ко мне учнутъ слати те вашы недрузи Можайского дети, и Шемячича дети, и Ерославича сынъ, то мне вамъ такжо сказати въ правду, а техъ ми послати къ вамъ, кого ко мне пришлютъ. А пойдетъ на меня Король и Великий Князь Литовский, [129] и вамъ Великимъ Княземъ пойти самимъ меня боронити; а пошлетъ на меня своихъ Воеводъ, и вамъ послати своихъ Воеводъ меня боронити; а хто меня почнетъ обидети, отъ кого ся самъ не възмогу оборонити, и вамъ меня отъ того боронити. А какъ дасть Богъ учнете имати любовь и докончанье съ Короломъ и съ Великимъ Княземъ Литовскимъ, и вамъ меня писати въ своемъ докончанье, что есми съ вами одинъ человекъ; а мне съ нимъ не канчивати ни съ инымъ ни съ кемъ. А и где пойдете вы Великии Князи ратью на своего недруга, и мне Великому Князю Ивану самому пойти съ вами безъ ослушанье; а и где пошлете Воеводъ своихъ, и мне послати съ вашыми Воеводами своихъ Воеводъ въ правду безъ хитрости. А со Царевичемъ съ Данияромъ, или хто будетъ иный Царевичь на томъ месте, не канчивати ми съ ними, ни съсылатися на вашо лихо; а жити ми съ ними по вашому докончанью. А что шло Царевичю Касыму и сыну его Данияру Царевичю съ нашой земли при моемъ деде при Великомъ Князи Иване Федоровиче и при моемъ отце при Великомъ Князи Васильи Ивановиче, и что Царевичевымъ Князомъ шло и ихъ казночеемъ и дарогамъ: а то мне давати съ своей земли Царевичю Данияру, или хто будетъ иный Царевичь на томъ месте, и ихъ Княземъ и Княжымъ казночеемъ и дарогамъ по темъ записемъ, какъ отець твой Князь Великий Василей Васильевичь за моего отца за Великого Князя за Василья Ивановича кончалъ со Царевичевыми съ Касымовы Князьми съ Кобякомъ съ Айдаровымъ сыномъ, да съ Исакомъ съ Охматовымъ сыномъ. А есачныхъ людей отъ Царевича отъ Данияра, или хто будетъ на томъ месте иный Царевичь, и отъ ихъ Князей мне Великому Князю Ивану и моимъ Бояромъ и моимъ людемъ не примати. А которыи люди вышли на Резань отъ Царевича и отъ его Князей после жывота деда моего Великого Князя Ивана Федоровича бесерменинъ, или Мордвинъ, или Мочаринъ, чорные люди, которые ясакъ Царевичю даютъ: и мне Великому Князю Ивану и моимъ Бояромъ техъ людей отпустити доброволно на ихъ места, где хто жылъ; а хто не похочетъ на свои места пойти, ино ихъ всилу не вывести, а имъ Царевичю давати его оброки и пошлины по ихъ силе. А что давали те люди деду моему Великому Князю Ивану Федоровичю и отцю моему Великому Князю Василью Ивановичю; и язъ свои пошлины емлю, а Царевичю въ то не въступатися, ни его Княземъ. Такжо и опроче того, который Царь или Царевичь будетъ у васъ у вашой земле, не канчивати ми съ ними, ни съсылатися на вашо лихо; а учнутъ чемъ меня обидити, и вамъ за меня стояти и боронити. А вотчины вамъ моее Переславля Резанского и всехъ Переславскихъ местъ, что потегло къ Переславлю, не обидити, ни въступатися, ни вашымъ детемъ ни подъ моими детми никоторою хитростью; а мне вашой вотчины Москъвы и Коломны съ волостьми, и всего вашого Великого Княженья подъ вами подъ Великими Князьми не обидити, ни въступатися, ни подъ вашими детми ни моимъ детемъ никоторою хитростью. А межы насъ розделъ земли ниже Коломны по реце по Оце по Цну, отъ усть Цны въверхъ по Цне что на Московской стороне, то къ Москъве; а что на Резанской стороне, то къ Резани. А что Володимерьское порубежье, а то по тому, какъ было при вашихъ прадедехъ и дедехъ, при Великомъ Князи Иване Даниловиче, и при Великомъ Князи Семене Ивановиче, и при Великомъ Князе Иване Ивановиче, и при Великомъ Князи Дмитреи Ивановиче, и при Великомъ Князи Васильи Дмитреевиче, и при твоемъ отце при Великомъ Князи Васильи Васильевиче, и при моемъ прадеде при Великомъ Князе Иване Ерославиче, и при Великомъ Князе Иване Ивановиче, и при Великомъ Князе Иване Александровиче, и при Великомъ Князе Олге Ивановиче, и при моемъ прадеде при [130] Великомъ Князе Федоре Олговиче, и при моемъ деде при Великомъ Князе Иване Федоровиче, и при моемъ отце при Великомъ Князе Василье Ивановиче. А что купля отца твоего Великого Князя Василья Васильевича за рекою за Окою Тешыловъ и Веневъ и Растовець и иная места, и темъ вашымъ землямъ съ моею землею рубежъ отъ Оки съ усть Смедвы въверхъ по Смедве до усть Песоченки, а Песоченкою до верховья Песоченского, а отъ верховья Песоченки чересъ лесъ прямо къ Осетру кь усть Кудесны, а Кудесною въверхъ до верховья, а отъ верхъ Кудесны прямо къ верхъ Таболомъ, а по Таболомъ на низъ въ Донъ. И что перешло за тотъ рубежъ тое купли отца твоего Великого Князя Васильевы на мою сторону, и вамъ Великимъ Княземъ въ то не въступатися, ни подъискивати, ни вашымъ детемъ ни подъ моими детми никоторою хитростью; а что перешло моей земли Великого Князя Резанские за тотъ рубежъ на вашу сторону, и въ то ся у васъ мне не въступати, ни подъискивати подъ вами подъ Великими Князьми, ни подъ вашыми детми ни моимъ детемъ никоторою хитростью. А что за Дономъ мое Великого Князя Иваново Романцево съ уездомъ, и что къ нему потегло, и вамъ Великимъ Княземъ въ то не въступатися; а мне не въступатися въ вашу отчину въ Елечь и во вся Елецькая места, а Меча намъ ведати вобче. А что Мещерьскии места, что будетъ покупилъ прадедъ мой Князь Великий Олегъ Ивановичъ, или прадедъ мой Князь Великий Федоръ Олговичъ, или дедъ мой Князь Великий Иванъ Федоровичь, или отець мой Князь Великий Василей Ивановичь, или язъ Князь Великий Иванъ Васильевичь, или нашы Бояре: въ та места мне Великому Князю Ивану Васильевичю не въступатися, ни моимъ Бояромъ, а знати ми свое серебро и моимъ Бояромъ; а земля по давному къ Мещере, а порубежье Мещерьскимъ землямъ, какъ было при Великомъ Князе Иване Ерославиче и при Князе Александре Уковиче. А что прадедъ вашъ Князь Великий Дмитрей Ивановичь поотоималъ места Татарьские и Мордовские, и та места вамъ Великимъ Княземъ, а мне ся въ нихъ не въступати: а что будетъ отнялъ прадедъ мой Князь Великий Олегъ Ивановичъ Татарьские места и Мордовские, ино то мое и есть, а вамъ Великимъ Княземъ въ то не въступатися. А что вашы Князи Мещерьские, которыи жывутъ въ Мещере и у васъ у Великихъ Князей, и мне ихъ къ собе не примати; а побежатъ отъ васъ, и мне ихъ добывати вамъ безъ хитрости, а добывъ ми ихъ вамъ выдати. А который полонъ побежитъ исъ Татаръ въ вашу землю въ Великое Княженье, опроче моей земли полону: и мне Великому Князю Ивану тотъ полонъ велети отпущати въ вашу землю добровольно со всемъ, съ чемъ будутъ выбежали. А судъ вобчий межъ насъ по преставленье отца твоего Великого Князя Василья Васильевича: а которыхъ делъ не искали при твоемъ отце при Великомъ Князе Васильи Васильевиче, пристава не было, за поруку не дано, тому погребъ; а кто за порукою или за приставомъ, тому судъ; а которые дела суженые или иоле не кончалося, а то кончати. А намъ Великимъ Княземъ въ суды въ вобчие не вступатися; а судьямъ нашымъ сести судити, целовавъ крестъ, что имъ судити въ правду, а судити имъ по старине. А и где учинится розбой и татба и наездъ изъ вашой вотчины на моихъ людей, и о томъ суда вобчего не ждати, отослати намъ на то своихъ судей, да велети намъ тому исправа учинити безъ перевода; а не дадите исправы, или судьи вашы судомъ переведутъ, и мне Великому Князю свое отнети, а то ми не въ измену. А судьи наши вобчие о чемъ ся сопрутъ, ино собе берутъ трехъ Князей нашыхъ земль; а на комъ ищутъ, и тотъ судья собе беретъ исъ трехъ одного. А суженого не посужати; а суженое, положеное, заемное, поручное дати по исправе; а холопа, [131] робу, поручника, должника, татя, розбойника, душогубца, порубежника по исправе выдати. А пошлинъ съ беглеца съ семьи два алтына, а съ одинца алтынъ; а мытные держати старые пошлины, которые были при нашыхъ прадедехъ и дедехъ и при нашыхъ отцехъ, а новыхъ намъ мытовъ и пошлинъ не замышляти. А мыта съ воза и въ городехъ денга, а съ пешахода мыта нетъ; а тамги и всехъ пошлинъ отъ рубля алтынъ, а съ лодьи и со дски по алтыну, а съ струга съ набои два алтына, а безъ набои денга; а со Князей Великихъ лодей пошлинъ нетъ. А вывода и рубежа намъ не замышляти; а Бояромъ и слугамъ межы насъ волнымъ воля. А на семъ на всемъ, Господине брате старишой Князь Великий ИВАНЪ ВАСИЛЬЕВИЧЬ, съ своимъ сыномъ, съ моимъ братомъ старейшымъ, съ Великимъ Княземъ Иваномъ, и съ своимъ братомъ съ молодшымъ со Княземъ съ Ондреемъ съ Василъевичемъ, целуйте ко мне крестъ къ Великому Князю Ивану Васильевичю, и съ вашымъ братомъ молодшымъ со Княземъ съ Борисомъ съ Василъевичемъ, и съ меншымъ вашымъ братомъ со Княземъ Михайломъ Ондреевичемъ, и съ его сыномъ со Княземъ съ Васильемъ, по любви, въ правду безъ хитрости. А писана на Москъве, лета деветьдесятъ перваго, Июния 9 (то есть 6991, отъ Р. Хр. 1483 года, Июня 9).

На подлинной подписано:

+ Смирены Геронтий Митрополитъ всеа Руси.

На обороте последней написано:

Две Грамоты утверженные Великого Князя Ивана Васильевича болшего со Княземъ Иваномъ Васильевичем меншим.

(Перепечатано из С. Г. Г. и Д., т. I, №№ 115-116, стр. 279-286).

Комментарии

1. По смерти Великого Князя Рязанского Василия Ивановича (скончавшегося 7 Генв. 1483 года), принял в Рязани наследие сын его Великий Князь Иван Васильевич, на 16 году своего возраста. А поелику отец его не только был женат на сестре Великого Князя ИОАННА ВАСИЛЬЕВИЧА Анне Васильевне, но и во всю жизнь свою хранил к нему дружбу и согласие, то и нужным почтено заключить союзный сей договор с сыном его, сим юным Князем Рязанским.

2. Все сии Князья, отклонясь от Великого Князя ИОАННА ВАСИЛЬЕВИЧА, ушли было в Литву.

3. Дараги: сим именемъ, как думать должно, назывались те Татары, которые у Российских Великих и удельных Князей собирали дань для своих владетелей.