Духовная Грамота Великого Князя ВАСИЛИЯ ДИМИТРИЕВИЧА (третья): о разделе, по смерти ею, движимого и недвижимого имения сыну своему Князю Василию Василиевичу, и Княгине своей Софие Витовтовне.— Писана при Митрополите Фотие 1424 года — съ некоторою противъ второй Грамоты при конце переменою.

Во имя Отця и Сына и святаго Духа. По благословленью отця нашего Фотея Митрополита Киевского и всия Руси. Се язъ грешный, худый рабъ Божей ВАСИЛЕИ, при своемъ здоровье пишу грамоту душевную; даю рядъ своему сыну Князю Василью и своей Княгине. Приказываю своего сына Князя Василья своей Княгине: а ты, сынъ мой Князь Василей, чти матерь и слушай своее матери въ мое место своего Отця. А благословляю своего сына Князя Василья своею вотчиною, чемъ мя благословилъ Отець мой, третью Москвы и съ путми, съ моими жеребьи, и Добрятиньскимъ селомъ зъ бортью, и Василцевымъ стомъ, и третью численыхъ людей, и Коломною съ волостми и съ путми. А изъ селъ даю сыну своему Князю Василью, на Москве село Островьское съ Орининьскимъ и съ Костянтиновьскимъ, да село Малаховское, да Жирошкины деревни со всемъ, что къ темъ селомъ потягло, да село Копотенское, да селце у города у Москвы надъ великимъ прудомъ, да Хвостовьское селце, да лугъ великий за рекою у города у Москвы, да Ходыньскую мелницю, да дворъ въ городе Фоминьской Ивановича у Боровицскихъ воротъ, а другий дворъ, что былъ за Михайломъ за Вяжемъ, да за городомъ новой дворъ у святого Володимера; да даю сыну своему Князю [26] Василью свой примыслъ въ Юрьеве село Петровское, да Олексиньское. А Княгине своей даю волости Коломеньские: Песочну, да Брашеву зъ селцемъ зъ Гвоздною и съ Иванемъ, да Устьмерску, да Гжелю и съ путми и зъ селы зъ своими, что въ техъ волостехъ ни есть. А исъ Коломеньскихъ селъ даю своей Княгине села Малиньские, что были за моею матерью, да село Ивановское съ Чюхистовымъ, да Окуловское, да Захаровское со всемъ, что къ нимъ потягло, да село Репинское, что ей дала мати моя; а что ее прикупъ и примысль, а то ее и есть. А Княгине же своей даю Деда своего примыслъ въ Бежицскомъ версе Кистму, да села Онтоновские, да Василевское въ Ростове, да свой примыслъ Троецскую слободку на Волзе, да Белевутовские села на Волоце и въ Юрьеве слободе, да треть тамги Московские и всехъ пошлинъ въ городе на Москве свои жеребьи. А изъ селъ изъ Московьскихъ даю своей Княгине Митинъ починокъ со всемъ, что къ нему потягло, да Семцинское село и зъ Самсоновымъ лугомъ и со всемъ, какъ было за моею матерью, да селце Федоровское Свиблово на Яузе и съ мелницею, да Крилатьское село, что было за Татаромъ; а Княгини моя дастъ съ того села Софее чернице долгу ее пятьдесятъ рублевъ; а что покупила села на Москве, и что ее примыслъ, а то ее и есть. А Княгине же своей даю примыслъ своего Отця слободку на Гуси, да въ Юрьеве село Красное и съ Проватовымъ и съ Елизаровскимъ, да свой примыслъ въ Юрьеве село Фроловское, да Елохъ, да село Богородицское; а что ее прикупъ и примыслъ, а то ее и есть; да на Беле озере слободка, что была Княжа Васильева Семеновича, да на Вологде Уктюжка, да Брюховская слободка, да Федоровские села Свибловы, да свой прикупъ на Вологде и на Тошне; а что ее прикупъ и примыслъ, а то ее и есть; да на Устюзе Федоровские же деревни Свибловы, да Головинские деревни, мой примыслъ. А дасть Богъ сыну моему Великое Княженье, ино и язъ сына своего благословляю Князя Василья. А Княгине моей исъ Костромы Иледамъ съ Комелою и съ Волочкомъ и съ Обнорою, да Нерехта и съ варницями и со Княгининьскимъ селомъ, и зъ бортники и зъ бобровники; а исъ Перьяславля Княгине моей Юлка также со всеми людми, которого пути въ ней люди ни будутъ, да Доброе село; а что ее прикупъ и примыслъ, а то ее и есть; а изъ Володимеря Ондреевское село, а Тошну оже выменитъ сынъ мой у Княжихъ детей у Володимеровыхъ по докончалной нашей грамоте съ ихъ отцемъ, и Тошна Княгине же моей. А сына своего Князя Василья благословляю своими примыслы, Новымъ городомъ Нижнимъ со всемъ; да своимъ же примысломъ благословляю сына своего Муромомъ со всемъ же. А изъ Новагорода Княгине моей половина пошлинъ моихъ всехъ; а что есмь ей подавалъ села въ Новегороде, или что ее примыслъ, а то ей и есть; да Сокольское село ей же со всемъ, да Кержанець со всемъ Княгине же моей; а изъ Мурома Княгине моей селце да Шатуръ. А те волости и села, что есмь подавалъ своей Княгине, пославъ сынъ мой да моя Княгини, опишутъ, да положатъ на нихъ дань по людемъ и по силе; и Княгини моя дастъ съ техъ волостей и зъ селъ дань по розочту и ямъ, что ся коли имъ иметъ. А переменитъ Богъ Орду, и Княгини моя емлетъ ту дань собе, а сынъ мой Князь Василей не вступается; а Волостели свои и тиуни и доводщики судитъ сама, а сыну моему Князю Василью въ ее волости ни въ села не всылати ни по что. А те волости и села Княгине моей до ее живота, опроче Гжели, да Семциньского села, да ее прикупа и примысла; а по ее животе, ино сыну моему Князю Василью; а во Гжеле, да въ Семцинскомъ селе и въ своемъ примысле волна Княгини моя, кому то хочетъ дати, тому то дастъ. А кто иметъ Бояръ служити моей Княгине, и сынъ мой Князь Василей техъ ее Бояръ блюдетъ. А [27] сына своего благословляю Князя Василья Страстьми болшими, да Крестъ честный животворящий Патрияршь Филофеевский, а сына же своего благословляю, даю ему икону Парамшина дела, да чепь хресчатую, что мя благословилъ Отець мой, да шапку золотую, да бармы, да поясъ золотъ съ каменьемъ, что ми далъ Отець мой, да другий поясъ мой на чепехъ съ каменьемъ, а третей поясъ ему же на синемъ ремени. А изъ судовъ даю сыну своему Князю Василью коропку сердоничную, да ковшъ золотъ Княжъ Семеновской, да судно оковано золотомъ, что ми дала мати моя, да каменое судно велико, что ми отъ Великого Князя отъ Витовта привезлъ Князь Семенъ, да кубокъ хрусталной, что ми Король прислалъ. А стада кои кобыльи сыну моему Князю Василью съ моею Княгинею на полы; а опроче того, что ни есть у мене, то все моей Княгине. А холопи, которые подавалъ есмь своей Княгине при своемъ животе, те ей и есть; а дастъ моя Княгини дочеремъ моимъ изъ моихъ холоповъ по пяти семей, а опроче того, все холопи мои на слободу зъ женами и зъ детми. А приказываю сына своего Князя Василья и свою Княгиню и свои дети своему брату и тьстю Великому Князю Витовту, какъ ми реклъ, на Бозе и на немъ, какъ ся иметъ печаловати, и своей братье молодшей Князю Ондрею Дмитриевичю и Князю Петру Дмитриевичю, и Князю Семену Володимеровичю и Князю Ярославу Володимеровичю, и ихъ братье, по ихъ докончанью, какъ ми рекли. А у сее грамоты были мои Бояре: Князь Юрьи Патрекеевичъ, Иванъ Дмитриевичь, Михайло Ондреевичь, Иванъ Федоровичь, Михайло Федоровичъ, Федоръ Ивановичь. А писалъ сю мою грамоту Олексей Стромиловъ. ¹

На подлинной подписано по Гречески:

Mhtropoliths FwtioV

(то есть: Митрополитъ Фотий.)

К сей Грамоте привешена на шелковом снурке большая восковая печать.

(Перепечатано из С. Г. Г. и Д., т. I, № 42, стр. 83-85).

Комментарии

1. Великий Князь ВАСИЛИЙ ДИМИТРИЕВИЧЬ скончался в Москве, 27 Февраля 1425 года.