VII.

Духовная Грамота Великого Князя ДИМИТРИЯ ИОАННОВИЧА (вторая): о разделе, по смерти его, всего движимого и недвижимого имения сынам своимъ Князю Василию, Князю Юрию, Князю Андрею, Князю Петру, Князю Ивану, и Княгине своей Евдокие Дмитриевне. — Писана 1389 года.

+ Во имя Отця и Сына и святого Духа. Се язъ грешный худый рабъ Божий ДМИТРИЙ ИВАНОВИЧЬ пишю грамоту душевную целымъ своимъ умомъ. Даю рядъ сыномъ своимъ и своей Княгине; приказываю дети свои своей [20] Княгине; а вы дети мои жывите за одинъ, а матери своее слушайте во всемъ. А приказываю отчину свою Москву детемъ своимъ Князю Василью, Князю Юрью, Князю Аньдрею, Князю Петру; а братъ мой Князь Володимеръ ведаетъ свою треть, чемъ его благословилъ Отець его Князь Аньдрей. А сына своего Князя Василья благословляю на стариший путь въ городе и въ станехъ моего удела двою жеребьевъ половина; а тремъ сыномъ моимъ половина, и въ пошлинахъ въ городьскихъ половина. А тамга изъ двою моихъ жеребьевъ Княгине моей половина, а сыномъ моимъ половина; а восмьничее мои два жеребья Княгине моей. А на стариший путь сыну моему Князю Василью Василцево сто и Добрятиньская борть съ селомъ зъ Добрятиньскимъ; а бортъници въ станехъ въ городьскихъ, и конюший путь и соколничий и ловчий, темъ сынове мои поделятъся ровно. А численыхъ людий моихъ двою жеребьевъ сыномъ моимъ по частемъ, а блюдутъ съ одиного. А се даю сыну своему Князю Василью: Коломну со всеми волостми и съ тамгою и съ мыты, и зъ бортью и съ селы и со всеми пошлинами; а волости Коломеньские: Мещерка, Раменка, Песочна, Брашева съ селцемъ зъ Гвоздною и съ Иванемъ, Гжеля, деревни Левичинъ, Скулневъ, Маковець, Каневъ, Кочема, Комаревъ зъ берегомъ, Городна, Похряне, Устьмерьско. А изъ Московъскихъ селъ даю сыну своему Князю Василью: Митинъ починокъ, Малаховъское, Костянтиновъское, Жырошкины деревни, Островъское, Орининьское, Копотеньское, Хвостовъское, у города лугъ великий за рекою; а изъ Юрьевъскихъ селъ даю сыну своему Князю Василью: своего прикупа Красное село съ Елезаровъскимъ, съ Проватовымъ, да село Василевъское въ Ростове. А се даю сыну своему Князю Юрью: Звенигородъ со всеми волостми и съ тамгою и съ мыты, и зъ бортью и съ селы и со всеми пошлинами; а волости Звенигородьские: Скирмоново зъ Белми, Тростна, Негуча, Сурожыкъ, Замошъская слобода, Юрьева слобода, Руза городокъ, Ростовци, Кремична, Фоминьское, Угожъ, Суходолъ съ Истею съ Истервою, Вышегородъ, Плесць, Дмитриева слободка. А изъ Московъскихъ селъ даю сыну своему Князю Юрью: село Михалевъское, да Домантовъское, да лугъ Ходыньский; а изъ Юрьевъскихъ селъ ему: прикупа моего село Кузмыдемъяньское, да Красного села починокъ за Везкою придалъ есмъ къ Кузмыдемъяньскому, да село Богородицьское въ Ростове. А се даю сыну своему Князю Аньдрею: Можаескъ со всеми волостми и съ тамгою и съ мыты, и зъ бортью и съ селы и со всеми пошлинами, и съ отъездными волостми; а волости Можайские: Исмея, Числовъ, Боянь, Берестовъ, Поротва, Колоча, Тушковъ, вышнее Глиньско, Пневичи съ Загорьемъ, Болонескъ, а Коржань да Моишинъ холмъ придалъ есмъ къ Можайску; а се волости отъездные: Верея, Рудь, Гордошевичи, Гремичи, Заберега, Сушовъ, да село Репиньское, да Ивановъское Васильевича въ Гремичахъ. А Колуга и Роща сыну же моему Князю Аньдрею; и что вытягалъ Бояринъ мой Федоръ Аньдреевичь на обчемъ реше Товъ и Медынь у Смолнянъ, а то сыну же моему Князю Аньдрею. А изъ Московъскихъ селъ ему: Напрудьское село, да Луциньское на Яузе съ мелницею, Деуниньское, Хвостовъское въ Перемышле, да лугъ Боровъский, а другий противу Воскресенья; а изъ Юрьевъскихъ селъ ему Олексиньское село на Пекше. А се даю сыну своему Князю Петру: Дмитровъ со всеми волостми и съ селы и со всеми пошлинами, и съ тамгою и съ мыты и зъ бортью; а се Дмитровъские волости: Вышегородъ, Берендеева слобода, Лутосна съ отъездьцемъ, Инобашъ. А изъ Московъскихъ волостий Князю Петру: Мушкова гора, Ижво, Раменка, слободка Княжа Иванова, Вори, Корзенево, Рогожъ, Загарье, Вохна, Селна, Гуслеця, Шерна городокъ; а изъ Московъскихъ селъ Князю Петру Новое село, [21] Сулишинъ погостъ; а изъ Юрьевъскихъ селъ ему прикупа моего село Богородицьское на Богоне. А се даю сыну своему Князю Ивану: Раменейце зъ бортъники, и что къ ному потягло, да Зверковъское село съ Сохоньскимъ починкомъ, что отошло ото Князя отъ Володимера; а Сохна сыну же моему Князю Ивану; а въ томъ уделе воленъ сынъ мой Князь Иванъ, который братъ до него будетъ добръ, тому дастъ. А се благословляю сына своего Князя Василья своею отчиною Великимъ Княженьемъ. А сына своего благословляю Князя Юрья, своего Деда куплею, Галичемъ со всеми волостми и съ селы и со всеми пошлинами, и съ теми селы, которые тягли къ Костроме, Микульское и Борисовъское. А сына своего Князя Аньдрея благословляю куплею же Деда своего, Белымъ озеромъ со всеми волостми, и Вольскимъ съ Шаготью, и Милолюбъский езъ и съ слободками, что были детий моихъ. А сына своего Князя Петра благословляю куплею же своего Деда, Углечимъ полемъ, и что къ нему потягло, да Тошною и Сямою. А се даю своей Княгине: изъ Великого Княженья у сына у своего у Князя у Василья изъ Переяславля Юлку, а исъ Костромы Иледамъ съ Комелою; а у Князя у Юрья изъ Галича Соль; у Князя у Оньдрея изъ Бела озера Вольское съ Шаготью, и Милолюбъский езъ; а изъ Володиморьскихъ селъ Княгине моей Оньдреевъское село, а исъ Переяславъскихъ селъ Доброе село, и что къ нимъ потягло; а изъ удела сына своего Княжа Васильева Каневъ, Песочну, а исъ селъ, Малиньское село, Лысцево; а исъ Княжа удела изъ Юрьева, Юрьева слобода, Суходолъ съ Истею съ Истервою, да село Оньдреевъское, да Каменьское; а изо Княжа удела изъ Оньдреева Верея, да Числовъ, да село Луциньское на Яузе съ мелницею; а изъ Княжа удела исъ Петрова Ижво, да Сяма. А что осмъ далъ своей Княгине изъ удела сына своего Княжа Васильева, я изо Княжа изъ Юрьева, изо Княжа Оньдреева, изо Княжа исъ Петрова волости и села; а что Богъ розмыслитъ о моей Княгине, и те волости и села во чьемъ уделе, то тому и есть. А се даю своей Княгине: свой примыслъ Скирменовьскую слободку съ Шепковымъ, Смоляные съ Митяевъскимъ починкомъ и зъ бортью, съ Вышегородскими бортъники, Кропивну зъ бортники съ Кропивеньскими и съ Исменьскими и зъ Гордошевъскими и съ Рудьскими, Желескова слободка зъ бортью съ Ивановымъ селомъ съ Хороброва, Исконьская слободка, Кузовъская слободка, и что Княгини моее прикупъ, и что исъ ней потянуло, то моей Княгине. А по которая места слободъские Волостели судили те слободы при мне, и Княгини моее Волостели судятъ по та же места, какъ было при мне. А что Княгини моее купля Лохно, то ее и есть. А на Коломне мой примыслъ Самойлецевъ починокъ зъ деревнями, Савельевъский починокъ, Микульское село, Бабышево, Ослебятевъское, а то Княгини моей. А что ее село Репеньское и прикупъ, то ее и есть. А изъ Московъскихъ селъ даю своей Княгине: Семцииьское село съ Ходыньскою мелницею, да Остафьевъское село, да Илмовъское; а изъ Юрьевъскихъ селъ даю ей куплю свою Петровъское село, да Фроловъское, да Елохъ; а Холхолъ и Заячковъ, то моей Княгине. А что ми дала Княгиня Федосья Суду на Беле озере, да Колашну и слободку, и что благословила Княгиню мою Городкомъ да Волочкомъ, та места ведаетъ Княгини Федосья до своего жывота; а по ее жывоте, то Княгине моей. А темии своими примыслы всеми благословляю Княгиню свою, а въ техъ примыслехъ волна моя Княгини, сыну ли которому дастъ, по души ли дастъ; а дети мои въ то не въступаютъся. А которые деревни отоималъ былъ Князь Володимеръ отъ Лыткиньского села Княгини моее къ Берендееве слободе, а те деревни потянутъ къ Лытъкинскому селу моее Княгини. А по грехомъ которого сына моего Богъ отъиметъ, и Княгини [22] моя поделитъ того уделомъ сыновъ моихъ; которому что дастъ, то тому и есть, а дети мои изъ ее воли не вымутъ. А дастъ ми Богъ сына, и Княгини моя поделитъ его, возмя по части у болшие его братьи. А у которого сына моего убудетъ отчины, чемъ есмъ его благословилъ, и Княгини моя поделитъ сыновъ моихъ изъ ихъ уделовъ: а вы дети мои матери слушайте. А по грехомъ отыметъ Богъ сына моего Князя Василья, а хто будетъ подъ темъ сынъ мой, ино тому сыну моему Княжъ Васильевъ уделъ, а того уделомъ поделитъ ихъ моя Княгини: а вы дети мои слушайте своее матери; что кому дастъ, то тому и есть. А коли детемъ моимъ взяти дань на своей отчине, чемъ есмъ ихъ благословилъ, и сынъ мой Князь Василей возметъ съ своего удела съ Коломны и со всехъ Коломеньскихъ волостей триста рублевъ и сорокъ и два рубли, и Княгини моя дастъ ему въ то серебро съ Песочны 50 рублевъ безъ 3 хъ, а съ Канева дватцять рублевъ и два рубли. А Князь Юрьи возметъ съ Звенигорода и со всехъ Звенигородскихъ волостий двесте рублевъ и семъдесятъ рублевъ и два рубли, и Княгини моя дастъ ему въ то серебро съ Юрьевы слободы пятьдесятъ рублевъ, а съ Суходола полъпятадесять рублевъ, а съ Смоляныхъ 9 рублевъ, а съ Скирменовъские слободки 9 рублевъ. А Князь Оньдрей возметъ съ Можайска и со всехъ волостий Можайскихъ сто рублевъ и семъдесятъ рублевъ бесъ трехъ, а съ отьездныхъ местъ семъдесятъ рублевъ безъ дву, и Княгини моя дастъ ему въ то серебро дватцять рублевъ и полътретья рубля съ Вереи, а съ Числова полъосма рубля, а съ Заячкова дватцять рублевъ и два, съ Холъхла десять рублевъ, съ Желесковы 9 рублевъ, съ Исконьские слободки полъсема рубля, съ Кропивны полъсема рубля.А Князь Петръ возметъ съ своего удела сто рублевъ и одинънатцять, и Княгини моя дастъ ему въ то серебро съ Ижва тритцять рублевъ. А Князь Иванъ дастъ Князю Василью съ Сохны пять рублевъ, а съ Раменейця дастъ Князю Петру пять рублевъ, а то возмутъ въ тысячю рублевъ; а будетъ боле или менши, ино по тому розочту. + А переменитъ Богъ Орду, дети мой не имутъ давати выхода въ Орду, и который сынъ мой возметъ дань на своемъ уделе, то тому и есть. А что есмъ подавалъ своей Княгине волости и села изъ уделовъ детий своихъ, и свой примыслъ и слободы и села, и Холхолъ и Заячковъ, а съ техъ волостий, и съ слободъ и съ селъ что возметъ Княгини моя, то ей и есть; а дети мои въ то не въступаютъся. А исъ техъ волостий и слободъ и селъ, что есмъ вымалъ у детий своихъ изъ уделовъ, а подавалъ Княгине своей, а кому будетъ жалоба сиротамъ на Волостели, и темъ людемъ учинитъ исправу Княгини моя; а дети мои въ то не въступаютъся. А что есмъ далъ сыну своему Князю Аньдрею Заберегу, за то дети мои вси даютъ оброкъ святому Спасу пятьнатцять рублевъ на годъ на Спасовъ день. А се благословляю детий своихъ: сыну моему старишему Князю Василью икона Парамшина дела, чепь золота, что ми дала Княгини Василиса, поясъ золотъ великий съ каменьемъ безъ ремени, поясъ золотъ съ ременемъ Макарова дела, бармы, шапка золота; а сыну моему Князю Юрью поясъ золотъ новый съ каменьемъ съ жомчюгомь безъ ремени, поясъ золотъ Шышкина дела, вотола сажена; а сыну моему Князю Оньдрею снастъ золота, поясъ золотъ старый Новгородьский; а сыну моему Князю Петру поясъ золотъ съ каменьемъ пегий, поясъ золотъ съ калитою да съ тузлуки, да наплечки, да аламъ; а сыну моему Князю Ивану поясъ золотъ татауръ, да два ковша золоты по две гривенки. А что ся останетъ золото или серебро, или иное что не есть, то все моей Княгине. А что ея останетъ стадъ моихъ, темъ моя Княгини поделитъся съ моими детми по частемъ. А хто будетъ моихъ казначеевъ, или хто будетъ моихъ дьяковъ [23] прибытокъ мой отъ мене ведали, или посельскихъ, или тиуновъ, или хто женилъся у техъ, те все не надобе моей Княгине и моимъ детемъ. А приказалъ есмъ свои дети своей Княгине: а вы дети мои слушайте своее матери во всемъ, изъ ее воли не выступайтеся ни въ чемъ. А который сынъ мой не иметъ слушати своее матери, а будетъ не въ ее воли, на томъ не будетъ моего благословенья. А дети мои, молодшая братья Княжы Васильевы, чтите и слушайте своего брата старишего Князя Василья въ мое место своего Отця: а сынъ мой Князь Василий держытъ своего брата Князя Юрья и свою братью молодшюю, въ братьстве безъ обиды. А хто моихъ Бояръ иметъ служыти моей Княгине, техъ Бояръ дети мои блюдите съ одиного. А хто сю грамоту мою порушитъ, судитъ ему Богъ, а не будетъ на немъ милости Божии, ни моего благословенья ни въ сий векъ, ни въ будущий. А писалъ есмъ сю грамоту передъ своими отци, передъ Игуменомъ передъ Сергиемъ, передъ Игуменомъ передъ Савастъяномъ, а туто были Бояре наши Дмитрий Михайловичъ, Тимофей Василъевичъ, Иванъ Родивоновичъ, Семенъ Василъевичъ, Иванъ Федоровичъ, Олександръ Анъдреевичъ, Федоръ Анъдреевичъ, Федоръ Анъдреевичъ, Иванъ Федоровичъ, Иванъ Анъдреевичъ; а писалъ Внукъ. ¹

К сей Грамоте, писанной на пергамине, привешена серебреная позолоченная печать.

(в тексте древнерусские буквенные обозначения чисел заменены на арабские цифры. – прим. расп.)

(Перепечатано из С. Г. Г. и Д., т. I, № 34, стр. 58-62).

Комментарии

1. Великий Князь ДМИТРИЙ ИОАННОВИЧЬ (прозванием ДОНСКОЙ) скончался в Москве, 19 Маия, 1389 года.