Духовная Грамота Великого Князя ИОАННА ИОАННОВИЧА (вторая): о разделе движимого и недвижимого его имения детям его, племяннику, и Княгине его — противу первой Грамоты с некоею прибавкою.— Писана 1356 года.

Во имя Отца и Сына и святого Духа. Се язъ грешный худый рабъ Божий ИВАНЪ ИВАНОВИЧЪ пишу душевную грамоту, ни чимже не нуженъ, целымъ своимъ умомъ, во своемъ здоровье. Аже что Богъ розмыслить о моемь животе, даю рядъ своимъ сыномъ Князю Дмитрею и Князю Ивану, и своему братаничу Князю Володимеру, и своей Княгини. Приказываю отчину свою Москву сыномъ своимъ Князю Дмитрью и Князю Ивану; а братаничу моему Князю Володимеру на Москве въ наместничтве треть, въ тамзе, въ мытехъ и въ пошлинахъ городьскихъ треть, что къ городу потягло; и что медъ оброчный Василцева стану, и что Отца моего бортници купленые подъ вечные варяхъ, и кони ставити по станомъ и по варямъ, и конюший путь, то имъ все на трое. А численые люди вси три Князя блюдуть сопча съ одиного. А се даю сыну своему Князю Дмитрью: Можаескъ съ волостми со всеми, съ тамгою и съ селы и зъ бортью и со всеми пошлинами, Коломну со всеми волостми и съ тамгою и съ мытомъ и съ селы и зъ бортью и со всеми пошлинами. А что исъ тыхъ волостий за Княгинью за Маръею, а те волости до ее живота; а по ее животе, те волости сыну моему Князю Дмитрью: Городна, Мезыни, Песочна, Середокоротна, Похряне, Устьмерьска, Брашевая, Гвоздна, селце Ивань, деревни Маковець, Левичинъ, Скулневъ, Каневъ, Кошира, Гжеля, Горки, Горетовка, село въ Похряньскомъ уезде на Северце, село Малино, село Холмы, село Костянтиновьское, село Орининьское, село Островьское, село Копотеньское, село Микульское, село Малаховьское, село Напрудьское, село Илмовьское, село Новое; а исъ тыхъ селъ, которая будеть за Княгинью за Марьею села, те до ее живота; а по ее животе, те села сыну моему Князю Дмитрью, Мещерка у Коломны. А се даю сыну своему Князю Ивану: Звенигородъ со всеми волостми и съ мытомъ и съ селы и зъ бортью и съ оброчники, со всеми пошлинами, Кремична, Руза, Фоминьское, Суходолъ, Истерва свободка, свободу Замошьскую, Ростовци, Кремичну, Тростну, Негучу, село Рюховьское, село Михалевьское, село Каменьское, село на Репне въ Боровьсце, селце Милциньское, село Максимовьское, село Домонтовьское, село Андреевьское, село Кариньское, село Козловьское, село въ Замошьской свободе, село Выславьское, село Кузминьское. А братаничь мои Князь Володимеръ ведаеть уездъ Отца своего. А что ся мне достали места Рязаньская на сей стороне Оки, исъ тыхъ местъ далъ есмь Князю Володимеру въ Лопастны места, новый городокъ на усть Поротли, а иная места Рязаньская отъменьная сыну моему Князю Дмитрию и Князю Ивану, поделятся на полы безъ обиды. А Княгини Ульяна, по Отца моего Князя Великого грамоте по душевной, ведаеть волости и осмничье и села до своего живота; а по ее животе, те волости и села и осмничье детемъ моимъ Князю Дмитрию и Князю Ивану, и Князю Володимеру, и моей Княгине, поделятся на четверо безъ обиды. А ци по грехомъ имуть изъ Орды искати Коломны, или Лопастеньскихъ местъ, или отъменьныхъ местъ Рязаньскихъ, а ци по грехомъ отоймется которое место, дети мои Князь Дмитрий и Князь Иванъ, и Князь Володимеръ въ то место и Княгини поделятся безъпеньными месты. А се далъ есмь Книгини своей Олександре исъ Коломеньскихъ волостий: Похряне, Песочну, Середокоротну, село Лысцевьское, [18] село Сомциньское на Москве; а изъ Звенигородскихъ волостий далъ есмь Княгине же своей: Угожь, великую свободу Юрьеву, село Кляповьское, село Белциньское съ Новымъ селцемъ; а исъ тамги исъ Московьское Княгине моей у моего сына у Князя у Дмитрья, и у Князя у Ивана изъ дву жеребьевъ треть. А по животе моее Княгини, те волости и села и часть тамги сыномъ моимъ Князю Дмитрью и Князю Ивану, въ которого уезде, то того и есть. А се далъ есмь сыну своему Князю Дмитрью: икону святый Олександръ, чепь золоту великую врану съ крестомъ золотымъ, чепь золоту колчату, икона золотомъ кована, Парамшина дела, шапка золота, бармы, поясъ великий золотъ съ каменьемъ съ женчуги, что мя благословилъ Отець мой Князь Великий, поясъ золотъ съ крюкомъ, обязь золота, сабля золота, и серга золота съ женчугомъ, чечакъ золотъ съ каменьемъ съ женчуги, 2 овкача золота, ковшь великий золотъ гладъкий, коропка золотомъ кована сердонична, бадья серебрена съ наливкою серебреною, . . . ца золота съ каменьемъ, опашень скорлатенъ саженъ. А се далъ есмь сыну своему Князю Ивану: чепь великую золоту съ крестомъ, чепь золоту врану, а другую огнивчату съ кресты, икону Благовещенье, и сергу съ женчугомъ, поясъ золотъ съ каменьемъ съ женчуги, что ми далъ братъ мой Князь Великий Семенъ, поясъ золотъ сточный, аламъ оженчужный, наплечки золоты съ круги съ каменьемъ съ женчуги, аламъ малый съ женчуги, что ми дала Княгини Марья, ковшь великий золотъ гладъкий, овкачикъ золотъ, чашка золота, да стоканъ Царьгородский золотомъ кованъ, чечакъ золотъ съ каменьемъ съ женчуги, сабля золота, обязь золота. А кого ми дасть Богъ зятью, по чепи имъ золоте, да по поясу по золоту. А что за Княгинью за Маръею Заячковъ, Заборегъ съ месты, то до ее живота; а по ее животе, моей Княгине. А что волости за Княгинью за Ульяною, исъ тыхъ волостий по ее животе дети мои дадуть дчери ее Сурожикъ, село Лучиньское. А изъ моихъ судовъ серебреныхъ дадуть къ святей Богородици Володимерь блюдо великое серебрено съ колци; а иными суды серебреными дети мои Князь Дмитрий и Князь Иванъ своею матерью поделятся на трое. А село на Рокше Романовьское Князю Дмитрью; а Князю Ивану село Афиньевьское, да селце у Павловьского села; а село Павловьское далъ есмь святому Олександру въ прокъ, собе въ память. А что моихъ стадъ коневыхъ и жерепцовъ и кобылиць, а то сыну моему Князю Дмитрью и Князю Ивану, то имъ на полы. А исъ тамги исъ Коломеньское четвертую часть далъ есмь къ святей Богородици на Крутицю, собе въ память. А костки Московьскии далъ есмь къ святей Богородици и къ святому Михаилу, въ память по своемь Отце и по своей братьи и по собе, то имъ руга. А хто будеть моихъ казначеевъ, или тивуновъ, или посельскихъ, или это будеть моихъ Дьяковъ, что отъ мене будеть ведали прибытокъ ли который, или у тыхъ хто будеть женился, те люди не надобни моимъ детемъ, ни моей Княгини, далъ есмь имъ волю. Такъ же хто будеть моихъ людий купленыхъ, грамотныхъ, полныхъ, далъ есмь имъ свободу, куда имъ любо; а детемъ моимъ, ни моей Княгини не надобни. А на сю грамоту послуси: отець мой Владыка Ростовьский Игнатий, отци мои душевные Игуменъ Иванъ, попъ Акинфъ, попъ Патрекей. А хто сю грамоту порушить, судить ему Богъ, а не буди на немь моего благословенья ни въ сий векъ, ни въ будущий. А грамоту писалъ Нестерко. ¹

К сей Грамоте привешена печать серебреная позолоченная.

(в тексте древнерусские буквенные обозначения чисел заменены на арабские цифры. – прим. расп.)

(Перепечатано из С. Г. Г. и Д., т. I, № 26, стр. 41-43).

Комментарии

1. Великий Князь ИОАНН ИОАННОВИЧ скончался в Москве 13 Ноября, 1359 года.