Духовная Грамота Великого Князя СИМЕОНА ИОАННОВИЧА (в монашестве СОЗОНТА): о бытии, по смерти его, всему движимому и недвижимому собственному и купленному имению за Княгинею его, Марьею Александровною.— Писана 1353 года.

Во имя Отца и Сына и святого Духа. Се язъ худый грешный рабъ Божий СОЗОНТЪ, при своемь животе, целымъ своимъ умомъ, пишу грамоту душевную. Даю рядъ своей Княгине: велелъ есмь у нее быти своему Дяде Василью. А по Бозе приказываю своей братье Князю Ивану и Князю Андрею свою Княгиню и своего .... и свои Бояре; положилъ есмь на Бозе и на васъ на своей [16] братьи, тако имете блюсти по нашему докончанью, како тогды мы целовали крестъ у Отня гроба. А чимъ мя благословилъ Отець мой Князь Великий, Коломна съ волостми и съ селы и зъ бортью, Можаескъ съ волостми и съ селы и зъ бортью, Заячковъ, что мя благословила тетка моя Княгини Анна, и Гордошевичи; а въ городе на Москве жеребей мои тамги; а села на Москве въ городьскомъ уезде: село Напрудьское, село Новое на Купавне, село Островьское, село Орининьское, село Малаховьское, село Копотеньское, село на Клязме Остафьевское, село Илмовьское, село на Клязме Хвостовьское, село Дейгуниньское, село на Сулишине погосте; а въ Перьяславле купля моя: село Самаровьское, село Романовьское на Кержаче, село Ортаковьское въ Юрьевьское волости, село Семеновьское Володимерьское волости, что есмь купилъ у Овци у Ивана, село на Костроме Олександровьское, село въ Дмитрове, что есмь купилъ у Ивана у Дрюцьского, и Заберегъ, что есмь купилъ у Семена у Новосилъского, или буди чего забылъ написати своее купли и участка, чимъ мя благословилъ Отець мой; такоже и про золото, нимъ мя благословилъ Отець мой, и что буди примыслилъ при своемъ животе золота ли, женчугу ли, то все далъ есмь своей Княгине. А исъ конь изъ своихъ изъ ездовныхъ велелъ есмь дати своей Княгини пятьдесятъ конь; а и стадь изъ моихъ моей Княгине стадо Коломеньское, другое стадо Детино Ивашьково. А что есмь писалъ въ сю грамоту, то есмь все далъ своей Княгини, ать молить Бога, а душу мою поминаеть до своего живота. А что буди судилъ когда Великомъ Княженье и вотчине въ своей на Москве, или мои Бояре, или Боярьские люди; а того вы, братья моя, не восчинайте. А хто моихъ Бояръ иметь служити у моее Княгини, а волости имуть ведати, дають Княгине моей прибытъка половину. А что моихъ людий деловыхъ, или кого буди прикупилъ, или хто ми ся будеть въ вине досталъ, такоже мои тивуни, и посельские, и ключники и старосты, или хто ся будеть у тыхъ людий женилъ, всемъ темъ людемъ далъ есмь волю, куды имъ любо; а братье моей, ни моей Княгине те люди не надобны. А сю грамоту писалъ есмь передъ своими отци, передъ Владыкою Володимерьскимъ передъ Олексеемъ, передъ Владыкою Переяславьскимъ Офонасеемъ, передъ Владыкою Коломеньскимъ Офонасьемъ, передъ Архимандритомъ Петромъ, передъ Архимандритомъ передъ Филимономъ, передъ своимъ отцемъ душевнымъ попомъ Евсевьемъ; а все есмь се положилъ на Бозе, и на своей братье на Князи на Иване и на Князи на Андреи. А по Отца нашего благословенью, что намъ приказалъ жити за одинъ, такоже и язъ вамъ приказываю своей братьи жити за одинъ; а лихихъ бы есте людий не слушали, и хто иметь васъ сваживати, слушали бы есте отца нашего Владыки Олексея, такоже старыхъ Бояръ, хто хотелъ Отцю нашему добра и намъ. А пишу вамъ се слово того деля, чтобы не перестала память родителий нашихъ и наша, и свеча бы не угасла. А хто сю грамоту иметь рушити, судить ему Богъ въ семь веце и въ будущемъ ¹.

К сей Грамоте привешены три печати, изъ коих первая серебреная позолоченная, а другие две восковые.

(Перепечатано изъ С. Г. Г. и Д., т. I, № 24, стр. 37-38).

Комментарии

1. Великий Князь СИМЕОН ИОАННОВИЧ (в монашестве СОЗОНТ) скончался в Москве 26 Апреля, 1353 года.