Духовная Грамота Великого Князя ИВАНА ДАНИЛОВИЧА КАЛИТЫ (вторая): о разделе не токмо движимого и недвижимого его имения, но и купленных им вотчин, детям и Княгине своей.— Писана 1328 года.

+ Во имя Отця и Сына и святого Духа. Се язъ грешный худый рабъ Божий ИВАНЪ пишу душевную грамоту, ида въ Орду, ни кимь не нуженъ, целымъ своимь умомъ, въ своемь здоровьи. Аже Богъ что розгадаетъ о моемь животе, даю рядъ сыномъ своимъ и Княгини своей. Приказываю сыномъ своимъ отчину свою Москву; а се есмь имъ розделъ учинилъ. Се далъ есмь сыну своему болшему [14] Семену: Можаескъ со всими волостьми, Коломну со всими Коломеньскими волостьми, Городенку, Мезыню, Песочну и Середокоротну, Похряне, Устьмерьску, Брошевую, Гвоздну, Ивани деревни, Маковець, Левичинъ, .Скулневъ, Каневъ, Гжелю, Горетову, Горки, село Астафьевское, село на Северьсце въ Похряньскомъ уезде, село Костянтиновское, село Орининьское, село Островьское, село Копотеньское, селце Микульское, село Малаховьское, село Напрудьское у города. А при своемь животе далъ есмь сыну своему Семену: 4 чепи золоты, 3 поясы золоты, 2 чаши золоты съ женчюги, блюдце золото съ женчюгомь съ каменьемъ, 2 чума золота болшая; а исъ судовъ исъ серебрьныхъ далъ есмь ему 3 блюда серебрьна. А се даю сыну своему Ивану: Звенигородъ, Кремичну, Рузу, Фоминьское, Суходолъ, Великую свободу, Замошьскую свободу, Угожь, Ростовци, Окатьеву свободку, Скирминовьское, Тростну, Негучю; а села: село Рюховьское, село Каменичьское, село Рузьское, село Белжиньское, село Максимовское, село Андреевское, село Вяземьское, село Домонтовьское, село въ Замошьской свободе, село Семциньское. А изъ золота далъ есмь сыну своему Ивану: 4 чепи золоты, поясъ золотъ болший съ женчюгомь съ каменьемь, поясъ золотъ съ капторгами, поясъ сердониченъ золотомь окованъ, 2 овкача золота, 2 чашки круглыи золоты, блюдо серебрьно ездниньское, 2 блюдци меншии. А се далъ есмь сыну своему Андрею: Лопастну, Северьску, Нарунижьское, Серпоховъ, Нивну, Темну, Голичихи, Щитовъ, Перемышль, Растовець, Тухачевъ; а се села: село Талежьское, село Серпоховьское, село Колбасиньское, село Нарьское, село Перемышльское, село Битяговьское, село Труфоновьское, село Ясиновьское, село Коломниньское, село Ногатиньское. А изъ золота далъ есмь сыну своему Андрею: 4 чепи золоты, поясъ золотъ Фрязьский съ женчугомь съ каменьемь, поясъ золотъ съ крюкомь на червьчате шелку, поясъ золотъ Царевьский, 2 чары золоты, 2 чумка золота меншая; а изъ блюдъ: блюдо серебрьно, а два малая. А се даю Княгини своей съ меншими детми: Сурожикъ, Мушкину гору, Радонежьское, Бели, Воря, Черноголовль, на Вори свободка Софроновьская, Вохна, Дейково Раменье, Данилищова свободка, Машевъ, Селна, Гуслиця, Раменье, что было за Княгинею; а села: село Михайловьское, село Луциньское, село у озера, село Радонежьское, село Дейгуниньское, село Тыловское, Ротожь, село Протасьевское, село Аристовское, село Лопастеньское, село Михайловское на Яузе, 2 селе Коломеньскии. А изъ городскихъ волостий даю Княгини своей осмничее; а тамгою и иными волостми городскими поделяться сынове мои: такоже и мыты, которыи въ которого уезде, то тому; а оброкомь городскимь Василцева веданья поделяться сынове мои. А что моихъ бортниковъ и оброчниковъ купленыхъ, которыи въ которого росписи, то того. А по моимъ грехомъ ци имуть искати Татарове которыхъ волостий, а отыимуться вамъ сыномъ моимъ и Княгини моей, поделити вы ся опять тыми волостми на то месь. А числьныи люди ведають сынове мои собча, а блюдуть вси съ одиного: а что мои люди куплении въ великомъ свертце, а тыми ся поделять сынове мои. А что золото Княгини моее Оленино, а то есмь далъ дчери своей Фетиньи, 14 обручи и ожерелье матери ее, монисто новое, что есмь сковалъ; а чело и гривну, то есмь далъ при собе. А что есмь придобылъ золота, что ми далъ Богъ, и коробочку золотую, а то есмь далъ Княгини своей съ меншими детми. А исъ портъ изъ моихъ сыну моему Семену кожухъ черленый женчужьный, шапка золотая; а Ивану сыну моему кожухъ желтая обирь съ женчугомь, коць великий съ брмами; Андрею сыну моему бугай соболий съ наплечки съ великимь женчугомь съ каменьемъ, скорлатное портище съ бармами. А что есмь нынеча нарядилъ 2 кожуха [15] съ аламы съ женчугомь, а то есмь далъ меншимъ детемъ своимъ Марьи же Федосьи ожерельемъ. А что моихъ поясовъ серебрьныхъ, а то роздадять по попьямъ. А что мое 100 рубли у Ески, а то роздадять по церквамъ. А что ся остало изъ моихъ судовъ изъ серебрьныхъ, а тымъ поделяться сынове мои и Княгини моя. А что ся останеть моихъ портъ, а то роздадять по всимъ попьямъ и на Москве. А блюдо великое о 4 колця, а то даю святей Богородици Володимерской. А что есмь далъ сыну своему Семену стадце, а другое Ивану; а иными стады моими поделятся сынове мои и Княгини моя. А опрочь Московьскихъ селъ, даю сыну своему Семену села своя купленая: село Аваковское въ Новегороде на Улале, другое въ Володимери Борисовское. А что есмь купилъ село Петровское и Олексиньское, Вседобричь и Павловьское на Масе, половину есмь купилъ, а половину есмь сменилъ съ Митрополитомъ .... а селця на Масе, что есмь купилъ у Афинея, то даю сыну своему Ивану. А что есмь купилъ село Варварьское и Меловьское у Юрьева, что есмь сменилъ на Матфеищовьское село, то даю сыну своему Андрею. А что село Павловское Бабы нашее купля, и новое селце, что есмь купилъ, и Олександръ святый, что есмь купилъ на Костроме, то даю Княгини своей. А что есмь купилъ село въ Ростове Богородичское, а далъ есмь Бориску Воръкову, аже иметь сыну моему которому служити, село будеть за нимъ; не иметь ли служити детемъ моимъ, село отоимуть. А что есмь прикупилъ селце на Кержачи у Прокофья у Игумна, другое Леонтиевское, третье Шараповское, а то даю святому Олександру собе въ поминанье. А приказываю тобе сыну своему Семену братью твою молодшую и Княгиню свою съ меншими детми, по Бозе ты имъ будешь печалникъ. А кто сю грамоту порушить, судить ему Богъ. А на се послуси отець мой душевный Ефремъ, отець мой душевный Федосий, отець мой душевный попъ Давыдъ ¹.

К сей Грамоте, на пергамине писанной, привешена, сверх Княжеской серебреной позолоченной печати, другая свинцовая, по-видимому Татарская печать.

(Перепечатано изъ С. Г. Г. и Д., т. I, № 22, стр. 33-35).

(в тексте древнерусские буквенные обозначения чисел заменены на арабские цифры. – прим. расп.)

Комментарии

1. Великий Князь ИВАН ДАНИЛОВИЧЬ скончался 1340, Марта 31.