XXII.

Духовная Грамота Великия Княгини Софии ¹, вдовствующей супруги Великого Князя Василия Димитриевича: о разделе, по смерти ее, движимого и недвижимого ее имения сыну своему Великому Князю ВАСИЛИЮ ВАСИЛИЕВИЧУ, внукам трем Князю Юрью, Князю Андрею и Князю Борису Василиевичам; и о даче въ Архангельской Собор, в Вознесенский девичий и въ Троицкий Сергиев монастыри селъ и деревень для поминовения своего — за подписанием Московского Митрополита Ионы.— Писана 1453 года.

+ Во имя святыя и живоначалныя Троицы Отца и Сына и святого Духа, и по благословению отца нашего Ионы Митрополита Киевьскаго и всея Руси. Се язъ грешная и худая раба Божья Софья пишу сию духовную грамоту, управление чиня о своей души, въ своемь смысле и въ своемь разуме. А приказываю ......................... моему сыну Великому Князю ВАСИЛЬЮ ВАСИЛЬЕВИЧЮ; а Господинъ мой сынъ мой Великий Князь Василей Васильевичь печа......................... А благословляю своего сына Великого Князя, даю ему отъ святости ящикъ съ мощми, а въ немъ крестъ вз.................................... Витовтъ; да благословляю его, даю ему, чимъ мя благословилъ Господинъ мой мужъ мой, Отець его Великий Князь Василей Дмитриевичь ............ по своей духовной грамоте, и те волости и села моему сыну Великому Князю, оприсно своего прикупа, да оприсно селца Семчиньского и Кжели, въ чемъ есмь волна по Господаря своего жалованью Великого Князя Василья Дмитриевича. А изъ Коломеньскихъ селъ изъ своихъ прикуповъ даю сыну своему Великому Князю Василью Колычевьское село, Николцево село, Липятиньское село, Чюхистово село; а что есмь переже сего дала два свои села Окуловьское да Репиньское ...., и те оба села мои сыну же моему Великому Князю Василью, въ томъ воленъ онъ, за собою ли ихъ держитъ, кого ли ими самъ пожалуетъ. А изъ Юриева даю сыну своему Великому Князю свой же прикупъ село Курчевьское, да село Елецкое, да [92] село Варварьское; а за Волгою на Шекстне даю сыну своему Великому Князю свои волости Устьуглу, да станъ Веретейку съ всеми деревнями и съ езы своими съ всеми, и со всею рыбною ловлею, и со всеми уходы и съ пошлинами съ всеми, и съ судомъ, какъ было за мною за Великою Княгинею. А сноху свою Великую Княгиню Марию благословляю, даю ей святую икону оковану на мусии святыи; а изъ селъ изъ своихъ даю ей на Коломне село Бабышевьское, да Лысцево, да село Ослебятевьское, куплю своее свекрови, чимъ мя благословила моя свекры Великая Княгини Овдотья, а изъ прикуповъ изъ своихь изъ Коломеньскыхъ селъ, на Северьсце Григориево село Наумова, да у Малина Ивановьское село Бункова. А внука своего Великого Князя Ивана благословляю, даю ему святую икону пречистую Богородицю съ пеленою; а изъ селъ изъ своихъ даю ему свой прикупъ въ Володимери, село Григориевское Олфергева Толъбу, да Вижекшю, да Головино. А внука своего Князя Юриа благословляю, даю ему святую икону пречистую Богородицю, болшюю икону степную съ пеленою и съ убрусцы; а изъ селъ изъ своихъ даю ему селце Семчиньское и съ Самсоновьскымъ лугомъ, да Кжелю, чимъ мя пожаловалъ и благословилъ мой Господарь Великий Князь Василей Дмитриевичь, и положилъ на моей воли; а изъ Московьскыхъ селъ даю ему свой прикупъ село поповьское Воробиево, и съ Семеновьскимъ, и съ деревнями, и съ всемъ своимъ прикупомъ; да на Похре село Мячково и съ Фавустовьскимъ, и съ Лодыгинскимъ, и съ Федоровымъ Левонтиева и съ Тяжинымъ, и съ рыболовлими деревнями, и съ всемъ съ темъ, что къ темъ селомъ и къ деревнямъ потягло, какъ было за мною за Великою Княгинею. А изъ Коломенскихъ изъ своихъ селъ даю внуку своему Князю Юрию свой же прикупъ Велино, да Кривцево, да Бронниче, да Чевырево, да Марчюково, да Рожекъ, да починокъ у Щелина озера; а изъ Юриевьскыхъ изъ своихъ селъ даю ему свой же прикупъ Турабьевскии села все, оприсно Березниковъ, да Раткова, да Олексина; а то Олексино дала есмь Княгине Ефросинъе до ее живота, а Березники и Ратково дала есмь своей сносе Княгине Марье до еежъ живота, а по ихъ животехъ, и те села Олексино и Березники и Ратково внуку же моему Князю Юрию, да даю ему тутожъ въ Юриеве свой же прикупъ свои села Кучку, да Деревенку, да Шадрино; а изъ Костромскыхъ изъ своихъ селъ даю ему свой же прикупъ село Качаловьское, да село Ушаковьское, да Святое село у .....впатья; а изъ Вологодскыхъ изъ своихъ селъ даю ему свой же прикупъ Масленьские села, да Янгасарьскии села, да Говоровъскии села. А внука своего Князя Андрея благословляю, даю ему святую икону святыхъ безсребреникъ и чюдотворець Козму и Дамиана; а изъ селъ изъ своихъ даю ему свой же прикупъ Вышелесъ. А внука своего Князя Бориса благословляю, даю ему святую икону святого Великомученика Феодора Стратилата, выбиту на серебре; а изъ селъ изъ своихъ даю ему свой же прикупъ на Волоце Белевутовьские села, да Окораковские. А что ся останетъ которые святости, оприсно того, кого есмь чимъ благословила, честные кресты и святые иконы, или мощи святыхъ ........ въ болшемъ въ дубовомъ и въ меншемъ ларчику, и въ ящику въ болшемъ и въ коробьи, и язъ всемъ темъ благословила внука же своего Князя ......... А что ся останетъ у мене моее казны, или какие рухляди моее клетные, какие ни буди, и язъ то все даю внуку же своему Князю Юрию, да даю ему дворъ свой Московьский внутри города Орининъский Семеновы жены Васильевича, и съ теми съ своими дворци съ подолними, что стоятъ подъ моимъ дворомъ на томъ же Орининъскомъ месте; да и то мое место тутожъ на подоле ему же, где собе поставлялъ хоромы Степанъ Обобуровъ. Да что ми далъ сынъ мой Князь Великий [93] Василей Васильевичь место дворовое Фоминьское Ивановича, и язъ на томъ на Фоминьскомъ месте поставила житничный дворъ, да тогожъ Фоминъского места променила есмь была Ивану Старкову на его куплю, на Степановьский дворъ Дмитриевича и его детей Григориевъ и Федоровъ на подоле, и тотъ есмь была Степановьский дворъ и его детей взяла собе, а Ивану есмь была противу того дала того Фоминьского места, где собе Иванъ хоромы поставилъ, и то свое место подолнее, свою куплю, ведаетъ Иванъ, а въ то ся место въ Фоминьское не въступаетъ, знаетъ свои хоромы; а язъ то все Фоминьское место и съ житничнымъ своимъ дворомъ дала внуку же своему Князю Юрию. А за городомъ дала есмь ему Елизаровьский дворъ и со всемъ, что къ нему потягло, да Ивановьское место конюшего; а на великомъ посаде Моравьевьский дворъ и съ садомъ, то все емужъ А что взхочетъ сынъ мой Князь Великий у своего сына, а у моего внука, у Князя у Юриа выменити что, села ли, места ли какие, где будетъ ему что пригодно, и онъ у него выменитъ, а безъ обиды. А что у мене у Великие Княгини колькое людей моихъ ни есть, и болшихъ и меншихъ, и язъ ихъ всехъ пожаловала, ослободила есмь ихъ всехъ, по моемъ животе вси слободни. А что которыи мои Бояре и дети Боярьскии и слуги мои, которыи служили мне Великой Княгине, и техъ всехъ Господинъ мой сынъ мой Великий Князь Василей Васильевичь жалуетъ и блюдетъ какъ и своихъ; а язъ своего Господина сына своего Великого Князя о томъ и благословляю и челомъ бью, и Бога молю о немъ. А на поминокъ души своего Господаря мужа своего Великого Князя Василья Дмитриевича, и своее свекрови Великие Княгини Овдотьи, и по своей души, и по души сына своего Князя Ивана, даю великому Архангилу Михайлу къ сборной церкви ....ща село свое Баню. А къ святому Взнесенью въ манастырь даю село свое Дорепьское, да внутри города дворъ свой ....вьское место, что есмь взяла у Ивана у Старкова. А къ святей и живоначалней Троици въ Сергиевъ манастырь даю села Кинельские, Чечевкино, да Слотино, и иныи все свои села Кинельскии, оприсно техъ всехъ пустошей, что ми былъ къ темъ моимъ селомъ далъ волостныи пустоши сынъ мой Великий Князь; въ те ся пустоши Игуменъ съ братьею не въступаютъ, да оприсно и суда, судъ Княж.... А даю те свои села къ темъ Божиимъ церквамъ со всемъ съ своимъ, какъ было за мною за Великою Княгинею, и съ хлебомъ со всемъ и съ животиною, да съ половиною изделного серебра, что на людехъ; а половину изделного серебра велела есмь христианомъ серебреникомъ отдавати, оприсно и страдниковъ, страдники пойдутъ на слободу. А что есмь которыи села свои подавала своему сыну Великому Князю Василью, и своей сносе Великой Княгине Марье, и своимъ внучатомъ, и язъ имъ те села подавала по томужъ съ половиною изделного серебра и съ животиною, да съ хлебомъ съ темъ, который въ земли; а другую половину изделного серебра велела есмь христианомъ серебреникомъ отдавати, да оприсно и страдниковъ, страдники пойдутъ на слободужъ. А о всемъ положила есмь на своемъ Господине на своемъ сыну на Великомъ Князи, о томъ своемъ серебре приказала есмь ему то учинити по обыску: кто будетъ отъ техъ изделниковъ охуделъ, а и половины того изделного серебра заплатити не взможетъ, и сынъ мои Великий Князь тому велитъ отдати за мою душю все изделное серебро; а который будеть изделный серебреникъ изможенъ въ животе, а не охуделъ, взможетъ заплатити и все серебро, и на томъ сынъ мой Великий Князь велитъ все изделное серебро взяти; то учинитъ сынъ мой Великий Князь своего ради спасениа, а и за мою душю по обыску ........ А что будетъ въ техъ въ моихъ селехъ въ всехъ хлеба стоячего на поли ржи и яри, оприсно [94] семенъ ярныхъ, и сынъ мой Великий Князь Василей Васильевичь тотъ хлебъ стоячий весь велитъ попродати, да серебро роздасть по моей души. А кто сию мою духовную грамоту въ чемъ порушитъ, и тотъ дасть ответъ праведному Судье всехъ Владыце Господу Богу. А у сее моее духовныи грамоты были священници: Спасьский Архимандритъ Трифонъ, Симоновьский Архимандритъ Геронтий, отець мой духовный Архимандритъ Феодосий; а духовную грамоту писалъ Митрополичь дьякъ Ярлыкъ.

На подлинной подписано:

Смирены Иона Архиеп. Кие. всея Руси.

К сей Грамоте, в которой по обоим краям многих недостает слов, привешены на шелковых снурках две восковые печати.

(Перепечатано из С. Г. Г. и Д., т. I, № 83, стр. 191-194).

Комментарии

1. Великая Княгиня София, в монашестве Евфросиния, была дочь Литовского Великого Князя Витовта, скончалась въ Москве 15 Июн. 1453, и погребена в Вознесенском монастыре.