Духовная Грамота (в копии) Князя Феодора Борисовича Волоцкого ¹, писанная при отбытии его с войском в Казань: о разделе, по смерти его, движимого и недвижимого имения Княгине его, и будущему сыну, или дочери; о раздаче некоторых деревень по монастырям и церквам, и о уплате долгов его разным людям.— Писана около 1523 года.

+ Во имя живоначальныя Троица Отца и Сына и святаго Духа. Се язъ многогрешной рабъ Божой Федоръ, Княжъ Борисовъ сынъ Василъевича, пишу сию грамоту душевную, идучи на дело своего Государя Великого Князя ВАСИЛЬЯ ИВАНОВИЧА всея Руси хъ Козани, кому ми что дати. Дати ми Вепрю Федору Васильеву сыну триста рубловъ; а въ техъ есми деньгахъ заложилъ закладъ у Вепря: ковшъ золотъ, а весу въ немъ гривенка безъ дву золотниковъ; да кубокъ съ полкою серебренъ золочонъ, а весу полпеты гривенки и восмъ золотниковъ; кубокъ чеканенъ съ финифтомъ серебренъ жо золочонъ, а весу четыре гривенки безъ десяти золотниковъ; да суденко сводное золочоно, да ковшь великъ серебренъ, а весу въ суденку и въ ковше пять гривенокъ безъ четверти безменныхъ; да поясъ золотъ на тесме на червчетой, а весу полтретьи гривенки и полшеста золотника и съ тесмою; да шуба Руская отласъ червьчатъ Венедитцкой зъ золотомъ на соболехъ, да шуба бархатъ лазоревъ зъ золотомъ па рысехъ Рузскаяжъ, да шуба отласъ синь зъ золотомъ на рысехъ Рускаяжъ, да шуба бархатъ чернъ [89] зъ золотомъ на горнастаихъ Тотарская. Дати ми Олексею да Митрию сто рубловъ; а въ техъ деньгахъ заложено у нихъ чепь золота, а въ чепи весу четыре гривенки съ четвертью скаловыхъ. Дати ми Бахтеяру Федорову сыну Дубового носу шестдесятъ рубловъ; а въ техъ есми деньгахъ заложилъ шубу бархатъ червчатъ зъ золотомъ на соболехъ круги великие, да шубу, бархатъ чернъ съ серебромъ на соболехъ, а обе шубы Татарские. Дати ми Игумену Иосифу зъ братьею сто рубловъ. Дати ми Офонасу Елчанинову сто рубловъ. Дати ми Возмицкому Архимандриту зъ братьею двенацать рубловъ. Дати ми городцкимъ людемъ Волочаномъ двацать рубловъ. Дати ми Оладъи дьяку десять рубловъ. Дати ми Тимофею Телперокину два рубля. Дати ми городцкимъ людемъ Ржевичемъ тритцать рубловъ и два рубля безъ четверти. Дати ми Архимандритужъ Возмицкому зъ братьею за два ковша серебреныхъ шесть рубловъ; да Архимандритужъ ми дати Возмицкому за шубу бархатъ чернъ на черевехъ на бельихъ шесть рубловъ. Дати ми въ Левкеевъ манастырь Игумену зъ братьею десять рубловъ заемная. Дати ми въ Левкеевъ жо манастырь за шубу за соболью восмь рубловъ, а отласъ на шубе червчатъ Венедитцкой. Дати Игнатью Глазатому опашенъ зуфенъ; дати ми Олеши Носу опашенъ зуфенъ. Дати ми Покровскому Игумену зъ братьею на Волоце три рубли. Дати ми на Москве Юрьевского манастыря сто рубловъ и полъосманацата рубля. А въ Селижаровъ ми манастырь дати къ живоначальной Троици Игумену зъ братьею петьдесятъ рубловъ съ рубломъ, да съ четвертью; дати ми Игумену Сергею Селижаровскому двенацать рубловъ. Дати ми Гриди Скоробогату десять рубловъ. Дати ми Ивану Фомину сыну Иванова саблю булатну Гирейскую, да охабенъ зуфенъ, да лошадь карю, да кобылу Татарьскую, да рогатину, да колпакъ Ординьской. Дати ми Князю Ивану Телелякши оргамакъ серъ; дати ми Князю Андрею Княжо Иванову сыну Звенцову конь каръ иноходъ; дати ми Дмитрею Загряскому конь чалъ иноходь; дати ми Синему Исакову меринъ каръ иноходъ. Дати ми Вериги Иванову сыну Есипова наколенки; дати ми Веригижъ конь серъ.

+ А даю своей Княгини на Волоце свои села въ Репотине: село Огрызково, да Наумово, да Высокое, да Косово, да Михалково, да Липняги и зъ деревнями и зъ бортми, и со всемъ съ темъ, какъ те села были за мною; да село Раменье, да Плоское, да Кореневское, да Фроловское, да Монежъ, да Ядрово, да Юдино и зъ деревнями и зъ бортми, и со всемъ съ темъ, какъ те села были за мною; а у города даю своей Княгини село Староволодцкое и зъ деревнями, да даю своей Княгине село Рюховское и зъ деревнями. А во Ржеве даю своей Княгине волость Вселукъ, да Яжжину, да Кличенъ, да Лещину, да Котици, да Горышинъ, опрочь Хрестець да Голенкова, да Боронкино, да Осеченъ, да Сытково и съ слободами, что въ техъ волостехъ, и со всемъ съ темъ, какъ те волости и села и слободы были за мною. А что мои села въ Московскомъ уезде Шерапово, да Ядреево, да Лошаково, да Рупосово и зъ деревнями; да что мой лугъ на Москве на реце подъ Крутицою, да дворъ мой на Москве внутри города, да и дворы мои на Москве на посаде у Юрья святаго: а то все даю своей Княгини со всемъ съ темъ, какъ было за мною. А что ее приданые люди, то ей то и есть; и хто у ней мой ее приданую понялъ, или хто ее приданой понялъ мою: ино то ее то и есть. А дастъ Богъ, родитца у моей Княгини сынъ: и язъ сына своего благословляю крестъ золотъ съ чепью, да икону пречистую Богородицу къ лицу съ манисты и съ жемчуги и съ яхонты, и покровъ сажонъ, и пелена сажена, и застенокъ сажонъ, чемъ мя благословилъ братъ мой Князь Иванъ Борисовичь; да поясъ золотъ, [90] чемъ меня благословилъ отець мой Князь Борисъ Васильевичь. Да чемъ мя благословилъ отецъ мой Князь Борисъ Васильевичь городомъ Волокомъ съ волостми и съ пути и съ селы и со всеми пошлинами: и язъ благословляю сына своего, и съ мытомъ съ Войницкимъ. Да что меня благословилъ отець мой Князь Борисъ Васильевичь городомъ Ржевою и съ волостми и съ пути и съ селы, и зъ бортью и со всеми пошлинами: и язъ благословляю сына своего своею вотчиною. А родитца у моей Княгини дочь: и язъ дочь свою благословляю крестъ золотъ, да пречистую Богородицю Одигитрею, обложену съ манистомъ, да пелена сажена, да покровъ саженъ, чемъ мя благословила мати моя. Даю своей дочери на Волоце свою вотчину волость Войничи; а во Ржеве даю своей дочери свои села Федтково, да Спаское и зъ деревнями. А по души даю къ пречистой Богородици въ Осифовъ манастырь свою вотчину волость Буйгородъ со всемъ съ темъ, какъ было за мною; а въ Левкеевъ манастырь даю свою вотчину село Назарьевское и зъ деревнями и со всемъ съ темъ, какъ было за Княземъ за Григорьемъ за Мещерскимъ; а къ пречистой Богородици на Возмищо даю свою вотчину село Данилково и зъ деревнями и со всемъ съ темъ, какъ было за мною; а къ Троици къ живоначальной въ Селижаровъ даю свою вотчину въ Горыншинской волости Хрестци да Голенково, и со всемъ съ темъ, что къ темъ деревнямъ потягло, и съ лесомъ и зъ бортью; а къ Воскресенью Христову на Волоце къ соборной церкви даю свою вотчину село Порохово и зъ деревнями и со всемъ съ темъ, какъ было за мною; а къ Пречистой къ соборъной церкви въ городе во Ржеве даю Игнатьево поместье Глазатого да Пронино поместье Плотниково, и со всемъ съ темъ, что къ темъ деревнямъ потягло истарииы. А дасть Богъ, родитца у моей Княгини сынъ; и сынъ мой у техъ манастырей и у Воскресенья Христова те земли выкупитъ: въ Осифовъ манастырь дастъ зъ Буягорода полтораста рубловъ; а въ Левкеевъ манастырь дастъ съ Назарьевского села семдесятъ рубловъ; а къ пречистой Богородици на Возмищо дастъ съ села зъ Данилкова сто рубловъ; а къ Троици къ живоначальной въ Селижарово дастъ съ Хрестець да зъ Голенкова сто рубловъ; а къ Воскресенью Христову съ села съ Порохова дастъ семдесятъ рубловъ; а съ Игнатьева поместья Глазатово да съ Пронина поместья Плотникова педдесятъ рубловъ. А къ Троици живоначальной въ Сергеевъ манастырь въ Московскомъ уезде па реце на Клязме даю мелницу, да деревню Курову, да лугъ, а ведаетъ Игуменъ зъ братьею по сей по моей по духовной грамоте ту деревню и и мелницу и лугъ, и по моей грамоте по жаловалной; а ко Въздвиженью честнаго креста, и къ Покрову святей Богородици, и къ Ильи Пророку дадутъ по пяти рубловъ на престолъ. А къ Федору къ Стратилату, къ Анъилу къ моему, на городе даю пошлину на Волоце полавочное; а ведаетъ свою пошлину по моей грамоте по жаловалной. А въ городе на Волоце на посаде по церквамъ попомъ, и въ городе во Ржеве на посаде по церквамъ попомъ по три рубли на престолъ; на Волоце по селамъ по подклетнымъ и по волостемъ по церквамъ, и во Ржеве по селамъ по подклетнымъ и но волостемъ попомъ по церквамъ по два рубля на престолъ. А къ Пречистой къ соборной на Москве, да къ Благовещенью, да къ Спасу, да ко Вознесенью, да къ Михаилу къ Арханьилу на площадь къ соборнымъ церквамъ по десяти рубловъ; а къ Спасу къ Новому, да къ Михайлову Чюду, да къ Пречистой на Симоново, да къ Спасу въ Ондронъево, да въ Пахнутъевъ манастырь къ Пречистой, да къ Рожеству Пречистой на Рве по десяти рубловъ на престолъ. А что мои люди полные и кабалные: и те мои люди на слободу. А приказываю своему Государю Великому Князю Василью Ивановичу [91] всея Руси свою душу, какъ ему Богъ положитъ на сердци, жаловати и печалотися моею Княгинею, и дастъ Богъ у моей Княгини сынъ или дочь будетъ; а не будетъ у моей Княгини отрода, ино моя вотчина передъ Богомъ и передъ моимъ Государемъ передъ Великимъ Княземъ, чтобы Государь мой съ моей вотчины душу помянулъ и долгъ заплатилъ. А что есми по церквамъ давалъ земли, да что есми писалъ своей Княгини въ вотчину: и Государь бы мой пожаловалъ Князь Велики въ те земли не вступался.

1. Сей Князь былъ двоюродный брат Великого Князя ВАСИЛИЯ ИОАННОВИЧА, а сын Князя Бориса Васильевича, внук же Великого Князя Василья Васильевича Темного. Завещание сие писал он пред походом своим 1523 года въ Казань; откуда возвратясь скончался, и погребен въ Волоколамском Иосифове монастыре.

(Перепечатано из С. Г. Г. и Д., т. I, № 151, стр. 417-420).