Духовная Грамота (в копии) Князя Ивана Борисовича Волоцкого: о разделе движимого и недвижимого его имения брату своему Князю Феодору Борисовичу, племяннице своей и дяде своему Великому Князю ИОАННУ ВАСИЛИЕВИЧУ, о уплате его долгов, и о даче для поминовения своего в некоторые монастыри и церкви деревень и денег.— Писана около 1504 года.

Паметь Князю Ивану Борисовичю ¹, кому что дати, и у ково есми что взялъ. Дати ми Вепрю сто рубловъ, а заложилъ есми у него въ техъ деньгахъ манисто, да поясъ, да три обручи, а манисто и обручи сестричны моей. Дати ми Вепрюжъ сорокъ рубловъ да полтретья рубля; дати ми Вепрюжъ двенацать рубловъ за две камки. Дати Егорьевского серебра сто рубловъ, да дватцать рубловъ да два; а ростъ на те деньги неплачонъ на пять летъ, а ростъ платимъ вполы. Дати ми Семену броннику сорокъ рубловъ да четыре рубли; дати ми Вепрюжъ три рубли да четыре алтыны за четыре сукна. Дати ми Голове Володимерову двацать рубловъ да два; дати ми Фили седелнику десять рубловъ. Дати ми Осифу старцу педдесятъ рубловъ. Дати ми Бохтаяру Добовованоса сыну полчетвертацать рубловъ, а заложено у него въ техъ деньгахъ три ковши да чара. Дати ми Лагуте кузнецу педдесятъ рубловъ; дати ми Есипу Языкову полчетвертацать рубловъ; дати ми Оляуху ключнику девять рубловъ безъ дву гривенъ. Да платить ми машкина долгу Осифу старцу двенацать рубловъ, Облязу одиннацать рубловъ зъ гривною, Офонасу Елчанинову десять рубловъ; у Олешиной жены у Денежниковой кубокъ во шти рублехъ, а кубокъ сестричны моей. Дати ми Кошкарю Исакову полшеста рубля; Осмому Исакову педдесятъ рубловъ безъ дву; Митинымъ детемъ Ойдарова девять рубловъ да четыре гривны. Дати ми въ Селижаровъ манастырь сорокъ рубловъ да два. Взялъ есми у Головы у Володимерова опашенъ обьяриненъ голубъ; взялъ есми у Вепря опашенъ камчатъ дикъ Венедицкой. Взялъ есми у Князя у Олександра у Ростовского конь коуръ иноходъ; взялъ есми у Ивана у Михайлова у Семонова конь чалъ иноходъ; взялъ есми у Пестрика у Хухрина конь гнедъ; взялъ есми у Ондрея у Микитина сына у Полуектова жеребець воронъ; взялъ есми у Федца у Врехъдеревского конь буръ; взялъ есми у Якова у Назарьева конь пегъ проиноходъ; взялъ есми у Григорья у Безумова жеребчикъ буръ иноходъ; взялъ у Оринки конь игрень; взялъ есми у Володи у Бибикова меринъ серъ; взялъ есми у Судока у Иванова сына у Есипова меринъ голубъ; взялъ есми у Звенцова сына конь коуръ. Взялъ есми у Бориса у Кутузова саблю булатну Гирейскую; взялъ есми у Иванажъ у Михайлова коверъ намазной. Дати ми Вепрю три рубли за два сукна. Взялъ есми у Петра у Есипова однорятку; взяла Княгини у Петра у Есипова шубу горлатну; взяла Княгини у Петражъ жеребецъ чалъ. А брата своего Князя Федора Борисовича благословляю образъ Пречистые, обложенъ съ застенкомъ да съ убрусомъ и съ пеленою, а [81] застенокъ и убрусъ и пелена сажены; да крестъ золотъ, да икона Благовещенье камень серебромъ обложенъ. Да далъ есми брату своему Князю Федору село Рюховьское и зъ деревнями, да другое село подъ Москвою Ядреево и зъ деревнями и со всемъ съ темъ, что къ темъ селамъ и къ деревнямъ потягло истарииы; да половину своего лугу подъ Симановымъ. А что есми истерялъ у своей сестричны ее приданое, платье и суды и иную ее рухледь; и язъ ее за то благословилъ понагея золота, да крестъ серебрянъ; да далъ есми ей село свое Сщитники и зъ деревнями, а въ немъ церковь Благовещенье, да погостъ Рожество Пречистые, и со всемъ съ темъ, что къ тому селу и къ деревнямъ и къ погосту потягло истарины. А что меня благословила мати моя двои серги яхонты, а третьи лалы, а то каменье и жемчуги на калпаце на моемъ; и язъ то далъ своей сестричне. А Пречистой въ домъ въ Осифовъ манастырь далъ есми по своемъ отци и по своей матери и по себе село свое Спаськое и зъ деревнями и со всемъ, что къ нему потягло истарины; а къ Арханъилу на Москву далъ есми по своемъ отци и по своей матери и по себе село Зубарово и зъ деревнями, что къ нему потягло истарины со всемъ съ темъ. А что моя служилая рухлядь, доспехи и кони: то передъ моимъ Государемъ Великимъ Княземъ. А что мои суды серебряные, тритцать блюдъ безъ одного, да пять мисъ, да уксусница, да перечница, да солонка болшая, да две малыхъ глаткихъ, да чарка серебрена, да одиннацать ложекъ, да семь ковшовъ, да семь чарокъ глаткихъ, да осмая чарка съ полкою, да три кубки, да две чарки болшихъ, да четыре чарки малыхъ, да рогъ, да три достаканы, да ковшъ болшой, да сковорода серебрена съ венцомъ, да серебреникъ, да суды каменые: и Государь бы мой Князь Велики те суды велелъ провесить, темъ есми велелъ по матери своей и по себе кормить; да напалокъ золотъ, да перстень съ перелефтою золотъ, да перстень съ чевцомъ, да перстень съ яхтомъ, да два перстня золоты у Юрья у малого у Грека, да перстень съ перелефтью у Обляза. А что моя вотчина Руза и половина Ржовы: а то передъ моимъ Государемъ передъ Великимъ Княземъ; и Государь мой Князь Велики съ тое съ моей вотчины долгъ мой велитъ пожалуетъ заплатить, и душу помянетъ. Да чтобы Государь мой Князь Велики пожаловалъ давалъ на церкви по матери нашей и по мне: въ Кириловъ манастырь десять рубловъ, да шуба камка лазорева, золотомъ на соболехъ; въ Мартемьяновъ десять рубловъ, да кожухъ бархатъ на соболехъ шитъ золотомъ да серебромъ; на Каменое десять рубловъ, да кожухъ на черевехъ на белиныхъ бархатъ червьчатъ; въ Павлову пустыну десять рубловъ; къ Троици въ Сергеевъ тритцать рубловъ, да шуба на соболехъ бархатъ зеленъ; на Сторожи къ Пречистой шуба соболья гола поношена; въ Пахнутьевъ манастырь десять рубловъ, да кожухъ камчатъ на черевехъ па лисьихъ; въ Колязинъ монастырь кожухъ камка есеевъ корень; на Симоново десять рубловъ; на Прилукъ къ Спасу пять рубловъ; на Песношъ къ Николе десять рубловъ; на Новое къ Спасу десять рубловъ; на Ондрониково десять рубловъ; къ Михайлову Чюду десять рубловъ; ко Взнесенью десять рубловъ; къ Богоявленью каменому десять рубловъ; къ Егорью каменому десять рубловъ; къ Пречистой къ болшой на площадь десять рубловъ; къ Благовещенью на площадь десять рубловъ; къ Рожеству на рве десять рубловъ; къ Олексею святому десять рубловъ; въ Левкеевъ манастырь десятъ рубловъ; ко Вскресенью въ Рузу десять рубловъ; въ Рузужъ къ Покрову десять рубловъ. Да далъ есми къ Покрову по матери своей и по насъ въ Рузежъ три деревни въ слободе въ Юрьеве, что были за Тимохою за Внуковымъ, и со всемъ съ темъ, что къ темъ деревнямъ потягло истарины; да въ Рузежъ къ Ивану [82] къ Богуслову, Ангиилу своему, далъ есми по матери своей и по себе къ его деревни свою деревню Моховскую и со всемъ съ темъ, что къ ней потягло истарины; на Волокъ ко Вскресенью пять рубловъ; на Волокъ на Возмищо далъ есми по себе Булгаковские деревни Синигъ на речки на Волцне, да деревню Кривошеино, да деревню Бучневу конюхову на Волценежъ, и со всемъ съ темъ, что къ темъ деревнямъ потягло истарины; къ Троици въ Селижаровъ десять рубловъ; къ Пречистой во Ржеве пять рубловъ. А въ Рузе, и на Волоце, и во Ржеве въ городе и на посадехъ на все церкви Государь бы Князь Велики пожаловалъ давалъ по матери по нашей и по насъ по три рубли на церковь на престолъ; а въ Можаескъ къ Николе пять рубловъ; къ Пречистой въ Колугу пять рубловъ; къ Пречистой въ Лужки пять рубловъ; къ Покрову въ Суздаль десять рубловъ. А что мои кобылы въ Щитникехъ и зъ жеребяты: и язъ те кобылы и жеребята велелъ дати къ Пречистой Осифу да Левке и къ Пречистой по половинамъ. Да взялъ есми у Вепря черьвчату япончу Бурскую. А приказываю свою душу Государю своему Великому Князю ИВАНУ ВАСИЛЬЕВИЧЮ всея Руси, и своему Государю Великому Князю Василью Ивановичю всея Руси, долгъ заплатити и душу помянути; и людци мои передъ Богомъ да передъ ними передъ моими Государи, а ведаетъ Богъ да они Государи, какъ имъ Богъ положитъ на сердци. А у сего у моего списка сиделъ отецъ мой духовной Пречистые Игуменъ Иосифъ.

На обороте написано:

Списокъ со Княжи Ивановы Борисовича духовной грамоты, выдалъ Князь Велики изъ казны лета *** (т. е. 7040, от Р. Хр. 1532 года).

(Перепечатано из С. Г. Г. и Д., т. I, № 132, стр. 341-343).

Комментарии

1. Сей Князь в самое время брачного торжества брата своего Кн. Феодора, в начале 1504 года занемог, и по кратковременной болезни скончался. Тело его погребено в Волоколамском Иосифове монастыре.