Духовная Грамота Князя Михайла Андреевича Верейского ¹: о учинении Великого Князя ИОАННА ВАСИЛИЕВИЧА наследником движимого и недвижимого имения и поместьев своих Бела-Озера, Ярославца и Вереи со всеми уездами и доходами; о даче брату своему Князю Ивану Юрьевичу сел Митинского, Олешковского и Белые Колодязи; о пожаловании некоторых Бояр своих пустошми, и о даче для поминовения своем в разные монастыри и церкви нескольких деревень — за подписанием Московского Митрополита Геронтия.— Писана около 1486 года.

Во имя святыя и живоначалныя Троица Отца и Сына и святого Духа. Се язъ грешный худый рабъ Божей Михайло Андреевичь пишу сию грамоту духовную при своемъ животе, въ своемъ смысле и въ своемъ разуме. Что моя отчина Бело озеро, чемъ мя благословилъ отець мои Князь Андрей Дмитреевичь, и язъ благословилъ далъ есми ту свою вотчину Бело озеро своему Господину и Государю Великому Князю ИВАНУ ВАСИЛЬЕВИЧЮ всея Руси при своемъ животе, и съ волостьми и съ путми и съ селы и съ слободами и со всемъ, что къ Белу озеру изъ старины потягло, и съ своими прикупы и со всеми пошлинами, какъ было за мною. А что моя вотчина, чемъ мя благословилъ отець мой Князь Андрей Дмитреевичь жеребьемъ въ Москве и съ пошлинами и съ огородники и съ селы и съ деловыми деревнями, также и Ярославцемъ съ волостьми и съ путми и съ селы и съ слободами, и со всеми пошлинами и съ отъежжими месты, со всемъ, что къ Ярославцю изъ старины потягло: и язъ благословилъ далъ есми ту свою вотчину всю после своего живота своемужъ Господину Великому Князю Ивану Васильевичю всея Руси. А что мой дворъ на Москве внутри города у Лазаря святого, и тотъ мой дворъ после моего живота моемужъ Господину Великому Князю. А что Господинъ мой Князь Велики пожаловалъ мене своею вотчиною Вереею съ волостьми и съ путми и съ селы и съ слободами, и со всеми пошлинами и съ отъежжими месты, что взялъ въ своей вине у моего сына у Князя у Василья, а держати ми за собою до своего живота: ино после моего живота та вотчина Господина моего Великого Князя Верея со всемъ его и есть. А на поминокъ по своемъ роду и по своей души далъ есми при своемъ животе къ Пречистой въ Кириловъ манастырь на Беле озере въ Напорожье село Никольское зъ деревнями; а къ Пречистой въ Мартемьяновъ манастырь на Бележъ озере Липникъ да Маро озеро: а будутъ те села надобны моему Господину Великому Князю, и онъ те села возметъ себе; а въ Кириловъ манастырь дасть сто рублевъ, а въ Мартемьяновъ манастырь дастъ пятдесятъ рублевъ. А после своего живота даю къ живоначалной Троице въ Сергиевъ манастырь село Ивановское зъ деревнями въ Ярославце; а къ Арханилу на Москве село Якимовское зъ деревнями; а къ Пречистой къ соборной церкви на Москве село Татаренки въ Заечкове; а къ [78] Пречистой на Симаново село Богоявленское; а ко Взнесенью въ манастырь село Тарутинское; а къ Олексею святому въ манастырь деревня Нижнее: а далъ есми те села и зъ деревнями и со всемъ, что къ нимъ потягло. А будутъ те села и деревни надобе моему Господину Великому Князю: и Господинъ мои Князь Велики дасть за те села и за деревни къ Троици въ Сергиевъ манастырь восмьдесятъ рублевъ; а къ Арханилу на Москве сто рублевъ; а къ Пречистой къ соборной на Москвежъ шестьдесятъ рублевъ; а на Симаново въ манастырь пятдесятъ рублевъ; а ко Взнесенью пятдесятъ рублевъ; а къ Олексею святому двацать рублевъ. Да даю после своегожъ живота къ святому Спасу въ Ондрониковъ на Москве свое селцо Лучинское, опрочь тое земли Можжоелника, чемъ есми пожаловалъ своего Боярина Князя Василья Ромодановского, а къ Пречистой въ Пафнотьевъ манастырь даю свое селце Кукеновское зъ деревнями въ Ярославецкомъ уезде и съ хлебомъ и съ серебромъ, и со всемъ, что къ тому селцю и къ деревнямъ изъ старины потягло. А въ Ярославци къ Арханилу къ соборной церкви протопопу и священникомъ даю свою деревню Шубинскую, да Костинскую деревню, да мелницю свою въ Ярославце, да пошлины померное, да рогое ², да искунное, да венци повоженые; а держатъ ту мелницю и те пошлины протопопъ зъ братьею по моеи грамоте жаловалной. Да въ Ярославцежъ даю къ Николе деревню Романсково, а къ Спасу деревню Тураевьскую; а къ Пречистой Окуловьскую деревню Солопова; а къ Ивану святому Усищову деревню: а даю те деревни со всемъ, что къ нимъ потягло. А что есми далъ къ святому Георгию въ Ярославцежъ при своемъ животе деревню Прынеаковскую со всемъ, что къ ней потягло: ино та деревня святому Георгию и есть. Да послежъ своего живота даю брату своему Князю Ивану Юрьевичю свои селца Мишинское, да Олешковское, да Белые Колодязи того деля, что даровъ его за мною много, да и душу мою поминаетъ. Да пожаловалъ есми Боярина своего Князя Василья Ромодановского, далъ есми ему въ куплю въ Заечкове пустошь Лвовскую да пустошь Дмитреевскую со всемъ, что къ темъ пустошемъ изъ старины потягло; да на Москве далъ есми ему въ куплю землю Можжоелника своего селца Лучинсково земли. Да что есми сына своего деля Князя Ивана пожаловалъ Олександра Андожсково, далъ есми ему на Беле озере въ куплю Севесь старую, да Кенсуй, да Озерко; да пожаловалъ есми Дмитрея Тимофеева сына Пушечникова, далъ есми ему въ куплю пустошь Сухотинскую въ Ярославецкомъ уезде; да что есми взялъ у Федора у Карачарова и у его сына у Митрофанца куплю ихъ на Можайскомъ рубеже селцо Обакумовское, и язъ пожаловалъ сына его Митрофанца, далъ есми ему въ тое земли место въ куплю Всатыково и пустошь Рыловское, да пустошь Киликеиньское, да пустошь Волковское, да пустошь Лысцевское, да пустошь Микифоровское, да Титковской починокъ: а подавалъ есми имъ те земли со всемъ, что къ нимъ изъ старины потягло, и грамоты есмь имъ свои купчие и жаловалные на те земли подавалъ; и Господинъ бы мои Князь Великы пожаловалъ моего данья не порушилъ, а въ те бы земли у нихъ не вступился. А что есми въ своей вине взялъ у Ивашка у Селиверстова его вотчинку, отца его куплю, Селиверстовьское селце, да Новоселки, да Немцово: и язъ Ивашка Селиверстова пожаловалъ, отдаю ему после своего живота его вотчинку, отца его куплю, Селиверстовьское селцо, да Новоселки со всемъ, что къ нимъ изъ старины потягло, опрочь Немцова, и грамоты есмь ему жаловалные свои подавалъ; и Господинъ бы мой Князь [79] Велики пожаловалъ после моего живота у Ивашка въ те земли не вступился. А что моихъ людей приказныхъ, тиуновъ и посельскыхъ и ключниковъ, и кто ся будетъ женилъ у техъ, и страдные мои люди зъ женами и зъ детми: и те все мои люди на слободу. А что у страдныхъ у моихъ людей моя животина, и у кого что будетъ моей животины, тому то и есть. А что есми у Ивашка у Селиверстова взялъ въ своеи вине его робу Федоску зъ детми, да его холопа Гридку Онаньина зъ женою и зъ детми: и язъ нынеча пожаловалъ ту Федоску зъ детми и Гридку Онаньина зъ женою и зъ детми, отпустилъ ихъ на слободу и грамоты есмь имъ свои жаловалные отпускные подавалъ, или кому дамъ свою грамоту отпускную; а после моего живота Ивашку техъ людей въ робы ни въ холопи не искати. Да чтобы Господинъ мой Князь Велики пожаловалъ, после моего живота судовъ моихъ не посудилъ. А что есми давалъ зятю моему Князю Осифу за своею дочерью въ приданые; а тотъ есми списокъ велелъ подписати духовнику своему Ивану печатнику, и запечатати своею печатью. А что есми давалъ сыну своему Князю Василью, коли сынъ мой у мене былъ, и снохе своей Княгине Марье, а тотъ есми списокъ велелъ подписати духовникужъ своему Ивану печатнику, и запечатати своею печатью. А опосле моего живота Господинъ мой Князь Велики дасть дочери моей Княине Настасьи триста рублевъ. А благословляю своего Господина Великого Князя Ивана Васильевича всея Руси: икона Пречистая чюдотворная, обложена съ каменьемъ да зъ гривнами, да убрусъ саженъ, да пелена сажена жемчюгомъ, да крестъ животворящего древа обложенъ, да икона праздники Владычни, резана на перелефти, обложена серебромъ, да три чарки золоты, да круживо кожушное не цело зъ зарукавьемъ, да запушье подволочное сажено, да одеяло на отласе на сине шито серебромъ да золотомъ, да грива сажена. А сына Великого Князя, своего Господина Великого Князя Ивана Ивановича благословляю два ковшика золоты, одинъ съ камышкомъ да съ жемчюжки. А о прочь того, что ни останется после моего живота моей казны, и то все Господинъ мой Князь Велики роздастъ по моей души. А приказываю душу свою помянути, и долгъ заплатити и все розправити по своемъ животе своему Господину и Государю Великому Князю Ивану Васильевичю всея Руси; о всемъ положилъ есми на Бозе, да на немъ на своемъ Господине на Великомъ Князи. А где ми что долгу дати, ино тому списокъ за моею печатью и за подписью дьяка моего. А у сей грамоты у духовные были Игуменъ Аресенй Пафнотьева манастыря, да отець мой духовной попъ Иванъ, да Бояринъ мои Князь Василей Васильевичь Ромодановской, а грамоту сию духовну писалъ дьячишко мое постелное Неклюдець.

На подлинной подписано:

+ Смирены Героньтий Митрополитъ всеа Руси.

И на обороте Грамоты подписано также:

+ Смирены Героньтий Митрополитъ всеа Руси.

К сей Грамоте привешена на черном шелковом снурке восковая печать: другая же приложенная утратилась.

(Перепечатано из С. Г. Г. и Д., т. I, № 121, стр. 299-302).

Комментарии

1. Сей Князь (брат Кн. Ивана Андреевича Можайского, лишенного в 1451 году Вел. Княземъ Василием Васильевичем за побег свой в Литву всех своих владений) зделав сие завещание, на третей недели после Пасхи 1486 года скончался, и погребен в Боровском Пафнутьеве монастыре.

2. В трех копиях с сея Грамоты написано: да роговое.