Духовная Грамота (в копии) Князя Андрея Василиевича менъшего ¹: о разделе движимого и недвижимого его имения братьям своим Великому Князю ИОАННУ ВАСИЛИЕВИЧУ и Князю Андрею Василиевичу болъшому, и племянникам своим Князю Ивану, Князю Василию и Князю Юрию Ивановичам; о даче некоторых волостей в разные монастыри, и о уплате долгов некоторым Боярам.— Писана около 1481 года.

+ Во имя святыя и живоначалныя Троица Отца и Сына и святаго Духа. Се язъ многогрешный худый рабъ Божий Андрей, при своемъ животе, въ своемъ смысле пишу сию грамоту духовную, кому ми что дати, и у кого ми что взяти. Дати ми своему Господину своему брату старейшему Великому Князю ИВАНУ ВАСИЛЬЕВИЧЮ тритцать тысячь рублевъ, что за меня въ Орды давалъ и въ Казань и въ городокъ Царевичю, и что есми у него собе ималъ. Дати ми Григорью Бобыне полтретья ста рублевъ; а заложено у него въ техъ денгахъ чепь золота, да поясъ золотъ, да ковшъ золотъ, что мя пожаловала тою чепью и поясомъ и ковшемъ мати моа Великаа Княгини. Дати ми Ивану Фрязину полчетверта ста рублевъ; а заложено у него въ техъ денгахъ чепь золота медведки, да чепь золота малая, да два ковша золоты, да чарка золота, что мя пожаловалъ далъ ми те чепи и ковши и чярку Господинъ мой и братъ мой старейший Князь Велики; да въ техъ же денгахъ у него заложено чепь золота болшаа, да двенатцать мисъ соребряныхъ, что мя пожаловала тою чепью и мисами мати моа Великаа Княгини, а темъ закладнымъ чепемъ и поясу и судомъ золотымъ и серебрянымъ весъ написанъ на опришнемъ списку, а тотъ списокъ подписанъ моею рукою. Дати ми Гаврилу Салареву триста рублевъ. Дати ми Ондрею Чяшникову сто рублевъ да пятнатцать рублевъ. Дати ми Ине Парунову дватцать рублевъ да два рубля, да четыре алтыны безъ дву денегъ. Дати ми Ивану Сыркову восмьдесятъ рублевъ да полтора рубля. Дати ми Володимеру Григорьевичю полпятадесятъ рублевъ. Дати ми Володимеровымъ детемъ Ивану Голове да Дмитрею дватцать рублевъ да четыре рубли безъ гривны. Дати ми . . . . Фарину сто рублевъ. Дати ми Данилу Бебеху пятнатцать рублевъ. Дати ми Дмитрею Чяшникову дватцать рублевъ да полсема рубля. Дати ми Михайлу Раку дватцать рублевъ. Дати ми Сенке Броннику пятдесятъ рублевъ съ рублемъ. А что моя вотчина, чемъ мя благословилъ отецъ мой Князь Велики Василей, годъ Княжъ Петровской Дмитреевича, да Вологда и съ Кубеною и съ Заозерьемъ, со всемъ, что къ Вологде и хъ Кубене и къ Заозерью потягло, и съ пошлинами, да Иледамъ съ Обнорою и съ Комелою и съ Волочкомъ, да Авнега, да Шиленга, да Пелшма, да Бохтюга, да Ухтюшка, да Сяма, да Тошня, да Янгосаръ, и со всемъ съ темъ, что къ темъ волостемъ потягло: и та моя вотчина вся Господину моему брату моему старейшему Великому Князю Ивану Васильевичю. А Иледамъ за моею матерью за Великою Княгинею до ее живота; и та [76] волость Иледамъ, после матери моей Великой Княгини живота, Господину моему брату моему старейшему Великому Князю. А Великого Князя сыну Великому Князю Ивану Ивановичю даю крестъ золотъ съ чепью съ золотою съ меншою, что мя пожаловала темъ крестомъ и чепью мати моа Великаа Княгини, да ковшъ золотъ две гривенки, что мя пожаловала имъ мати же моа Великаа Княгини, да мамай золотъ. А брату своему старейшему Князю Андрею Васильевичю даю свою волость, чемъ мя благословилъ отецъ мой Князь Велики, Раменейцо у Москвы со всемъ, какъ было за мною. А брату своему Князю Борису Васильевичю даю свое село Ясеневское у Москвы. А Великого Князя сыну Князю Василью даю крестъ золотъ съ чепью зъ болшою, да поясъ золотъ на черне ремени, что мя пожаловала мати моа Великаа Княгини темъ крестомъ и чепью и поясомъ; да емужъ даю село свое Танинское у Москвы. А котораа земля у насъ въ споре зъ братомъ со Княземъ зъ Борисомъ Танинского села съ Шараповскимъ селомъ; и Господинъ бы мой Князь Велики пожаловалъ въ ту землю въ спорную у брата моего у Князя у Бориса не велелъ вступатися. А Великаго Князя сыну Князю Юрью даю икону Пречистые на деманиде, что мя ею благословилъ отецъ мой Князь Велики, да поясъ золотъ болшой, да ковшъ золотъ две гривенки, что ми тотъ поясъ и ковшъ дала мати моа Великаа Княгини. А ко святой Троице вь Сергиевъ манастырь, на поминокъ своему роду и своей душе, даю на Вологде изъ Сямские волости сорокъ деревень волостныхъ къ ихъ селомъ къ манастырскимъ, что на Сяме; и Господинъ мой и братъ мой старейшии Князь Велики велитъ имъ отвести сорокъ деревень волостныхъ, которые деревни пришли къ ихъ землямъ къ манастырскимъ. А которые есми земли подавалъ въ своей вотчине манастыремъ и церквемъ Божиимъ села и деревни; и Господинъ бы мой Князь Велики пожаловалъ техъ моихъ грамотъ не порушилъ. А что мой манастырь Спасъ святы на Каменомъ, и которые земли того манастыря, села и деревни въ моей вотчине моего данья и не моего данья; и Господинъ бы Князь Велики пожаловалъ техъ земель манастырскихъ Спаскихъ всехъ писцомъ писати и дани съ нихъ имати не велелъ. А что есми въ своеи вотчине на Вологде въ городе прибавилъ пошлинъ въ тамзе и въ иныхъ пошлинахъ, или будутъ мои пошлинъники что прибавили пошлинъ; и Господинъ бы мой Князь Велики пожаловалъ учинилъ пошлины все по старине, какъ было при моемъ отце при Великомъ Князи. А что въ моихъ селехъ на Вологде и въ Торусе на христианехъ мое серебро изделное и ростовое, и мое жито на нихъ заемное и оброчное, и которые мои села и деревни за моими детми Боярскими съ моимъ серебромъ; и язъ то свое серебро и жито все отдалъ христианомъ. А что моихъ людей полныхъ и кабалныхъ и приказныхъ людей, которые отъ меня прибытки мои ведали, те все на слободу. А приказываю душу свою помянути, и долгъ заплатити и все розправити по своемъ животе Господину своему брату своему старейшему Великому Князю ИВАНУ ВАСИЛЬЕВИЧЮ; положилъ есми о всемъ на Бозе, да на немъ на своемъ Господине. А у сее духовные грамоты сидели: Архиепископъ Ростовской Касьянъ, да Троицкий Сергиева манастыря игуменъ Пасей, да отецъ мой духовный попъ Микита, да Великого Князя Бояринъ Князь Иванъ Юрьевичь. А сю грамоту духовную писалъ дьякъ мой Василей Ухтомъской.

На обороте Грамоты написано:

Списокъ зъ духовной Великого Князя Андрея Васильевича меншого.

(Перепечатано из С. Г. Г. и Д., т. I, № 112, стр. 270-272).

Комментарии

1. Сей Князь был самой меньшой брат Великого Князя ИОАННА ВАСИЛИЕВИЧА. Он во всю свою жизнь, при всех несогласиях других своих братьев, ненарушимую всегда сохранял дружбу и любовь к старшему своему брату Великому Князю, коего и учинил наследником всех почти своих земель.— Скончался он на 28 году от рождения своего, 5 Июля 1481 года, и в Московском Архангельском Соборе погребен.