Духовная Грамота Князя Бориса Василиевича Волоцкого ¹: о разделе движимого и недвижимого его имения сыну своему Князю Феодору и Княгине своей.— Писана около 1477 года.

+ Во имя святыя и живоначалныя Троица Отца и Сына и святаго Духа. Се язъ многогрешный рабъ Божый Борисъ, сынъ Великого Князя Василья Васильевича, пишу сию грамоту душевную, идучи на дело своего Господина и брата старешего Великого Князя ИВАНА ВАСИЛЬЕВИЧА къ Великому Новугороду; даю указъ своей Княгине и своему сыну Федору. Благословляю своего сына Федора крестъ золотъ съ чепью, да поясъ золотъ, что мя благословила мати моя Великая Княгини Марья; да благословляю своего сына Федора своею отчиною, чемъ мя благословилъ отець мой Князь Велики Василей Васильевичь, Волокомъ съ волостми и съ пути и съ селы и со всеми пошлинами, и съ мытомъ съ Войницкимъ, что у Спаса на Всходне, да Ржовою съ волостми и съ пути и съ селы и зъ бортью и со всеми пошлинами, да Рузою съ волостми и съ пути и съ селы и со всеми пошлинами. Да что мя благословилъ отець мои Князь Велики бабы моее селы Марьинскими, и язъ теми селы благословляю сынажъ своего Федора, на Коломне Проскурниковскими селы, да Веденскимъ, да Кишкинымъ и Вельяминовскимъ, и иные селца и зъ деревнями, и на Городне деревня, и на Москве за Похрою Розсудовские села Зверевское и Барановское, и иные селца зъ деревнями и съ пустошми, и въ Володимере Симизинские села и Лазарьское и Котезино, и что къ темъ селомъ потягло, какъ было за Марьею; да у города у Володимеря Евнутьевское селцо; да на Костроме на Волзе Нижняя слобода со всеми деревнями, да Базеевское, да Мануиловское зъ деревнями; да на Вологде Турондаевское, да Понизовное, да Кобылинское, да Горка, да на Шоме деревни; да у Москвы село Шараповское зъ деревнями, да Лошаково зъ деревнями, да лугъ на Москве на реце подъ Крутицею, да въ Берендееве село Ростовецкое зъ деревнями, да въ Кинеле село Тимофеевское, да Микульское, да Суровцово зъ деревнями. Да что мя пожаловалъ Господинъ мой и братъ старешей Князь Велики Иванъ Васильевичь Вышегородомъ съ волостми и съ пути и съ селы и со всеми пошлинами, да и Шопковою слободкою въ вотчину, и въ докончалную ми грамоту написалъ; и язъ то даю сынужъ своему Федору со всемъ съ темъ, что къ нему потягло изъ старины, какъ было за мною. Да даю сыну своему Федору въ Москве годъ ² Княжъ Ивановской Можайского, по духовной грамоте отца своего Великого Князя; да даю сынужъ своему Федору дворъ свой на Москве внутри города и зъ дворы зъ городцкими, да и на посаде дворы бабы моее Марьинские; да даю сынужъ своему Федору половину трети тамги Московские, по духовной грамоте отца своего Великого Князя. А Княгине своеи даю во Ржеве Осеченъ, да Рясну и съ Кочковымъ и зъ Боронкинымъ, и съ своимъ прикупомъ, [74] что есмь купилъ у Ивана у Ромейкова у головы, да Кличенъ и зъ слободками, которые на Кличенской земле сели, да Елецкое село зъ деревнями, да Красное зъ деревнями, да Резанцово зъ деревнями; а на Волоце даю своеи Княгине село Спаское, да Щитники зъ деревнями, да Рюховское зъ деревнями, и съ Оленинскимъ и съ Холчниковымъ, да село Пороховское зъ деревнями; а въ Рузе даю своеи Княгине слободу Юрьеву, да село Табалово зъ деревнями; а въ Вышегороде даю своей Княгине село Волченку, да Купелици и зъ Самородомъ, да селцо Петровское, да Филимоновское, да Коровинское, да село Дубровское зъ деревнями и зъ бортью, и со всемъ съ темъ, что къ темъ волостемъ и къ селомъ ко всемъ потягло изъ старины, какъ было за мною. Да даю своей Княгине своихъ холоповъ Митко Чиркинъ зъ жоною и зъ детми, Епишъ зъ жоною и зъ детми, Василей Кляпуновъ зъ женою и зъ детми, Кашкаръ Исаковъ зъ жоною и зъ детми, да братья его Рубець, голова Синей, Гридя Олексеецъ, Митя соколникъ, Сидко поваръ Взвернигуба, Гридя Плешко, Микифорикъ Аргамаковъ, а хлебниковъ Калистъ, Батылъ, Нагиба, Осташъ посельской, Кононъ Спаской, Сенка Пантелеевъ съ женами и зъ детми. А хто будетъ держалъ села отъ моее Княгини на ее имя, или хто будетъ понялъ ее приданую, и те люди ее и есть. А кого есмь не написалъ своихъ холоповъ въ сю душевную, или кому есмь далъ свою грамоту жаловалную на ихъ дочери, и те все на слободу. А Княгини моя живетъ съ моимъ сыномъ за одинъ; а мой сынъ изъ ее воли не вымается. А что мои дочери, и за кемъ велитъ Богъ имъ быти; и моя Княгини и мой сынъ возмутъ съ отчины, да темъ ихъ отдадутъ. А что есмь пожаловалъ Бояръ своихъ Князя Андрея Федоровича и Князя Петра Микитича, подавалъ есмь имъ отчину въ ихъ отчины место, далъ есмь Князю Андрею Федоровичю Скирманово, да Фроловское, да Кореневское зъ деревнями, а Князя Петра Микитича пожаловалъ есмь Шорсною зъ деревнями, доколе служатъ мне и моимъ детемъ и ихъ дети, и учнутъ служити моему сыну и ихъ дети, ино то имъ и есть; а не имутъ служити моему сыну, ино ихъ отчина моему сыну: а возметъ Богъ моего сына Федора, ино то мое жалованье имъ въ отчину въ ихъ отчины место. А что есмь поотоималъ въ своей вине села у Федора у Полева, и у его сына у Василья, и у Ондрея у Еропкина, и у Ивана у Бибикова, и у Давыдовыхъ детеи Бибикова у Василъя и у Володи ихъ отчины: и те ихъ села имъ и есть; а мой сынъ и моя Княгини въ те ихъ села не вступаются, а они ведаютъ свои отчины по старине. А что есмь взялъ у Ильи у Олександрова сына Ловчего его отчину Кочково: и язъ ему далъ въ то место во Ржеве свою волость Телицю со всемъ, что къ ней потягло изъ старины, какъ было за нимъ жо, ему въ отчину въ его отчины место. А приказываю своему Господину и Осподарю и брату старешому Великому Князю ИВАНУ ВАСИЛЬЕВИЧЮ, его сыну, своему Господину Великому Князю Ивану Васильевичю ³, какъ имъ Богъ положитъ на сердце, жаловати и печаловатися моимъ сыномъ Федоромъ, и моею Княгинею и моими детми. А у сее духовные седели мои Бояре: Князь Андрей Федоровичь, да Князь Петръ Микитичь, да Данило Ивановичь, да отецъ мой духовной попъ Иванъ. А духовную писалъ дьякъ мой Оладья; а запечаталъ сю духовную отець мой духовной попъ Иванъ своею печатью.

К сей Грамоте приложена восковая печать.

(Перепечатано из С. Г. Г. и Д., т. I, № 105, стр. 251-253).

Комментарии

1. Сей Князь был родной брат Вел. Князя ИОАННА ВАСИЛИЕВИЧА; — писалъ он сию грамоту духовную, идучи в 1477 году войною на Новгородцев, бунтовавших тогда противу Великого Князя. — Скончался он въ городе своем Волоколамске 1494, в Маие месяце; тело его привезено в Москву 9 Мая, и погребено в Архангельском Соборе.

2. То есть: годовых доходов из Москвы ту часть, которую прежде того получал Князь Иван Андреевич Можайской.

3. В подлиннике ошибка, вместо Ивану Ивановичу.