Духовная Грамота (в копии) Князя Володимера Андреевича: о поручении Великому Князю ВАСИЛИЮ ДИМИТРИЕВИЧУ своей Княгини и детей своих; о разделе движимого и недвижимого имения сынам и Княгине своей, и о даче съ земель Великому Князю дани для Ордынского выхода. — Писана 1410 года.

+ Во имя Отца и Сына и святого Духа. Се язъ грешный худый рабъ Божий Володимеръ Ондреевичь пишу грамоту душевную при своемъ животе, целымъ своимъ умомъ; даю рядъ сыномъ моимъ и Княгине моей. Приказываю брату своему старейшому Великому Князю ВАСИЛИЮ ДМИТРИЕВИЧЮ Княгиню свою и дети свои, на Бозе и на тебе, брате старейшой Князь Великий, что бы ся еси ими печаловалъ; такъже и Бояръ своихъ приказываю брату своему старейшому Великому Князю, которыи Бояре имутъ служити моей Княгине и моимъ детемъ. А что ся учинитъ межи моихъ детей, ини отошлютъ своихъ Бояръ; а о чемъ сопрутся ихъ Бояре, ини идутъ передъ мою Княгиню, и Княгини моя на которого сына помолвитъ и обвинитъ, и ты, брате старейшей Князь Великии, на томъ то доправи, а вотчиие бы ихъ было и ихъ уделомъ безъ убытка, по сей по моей по грамоте по душевной. Такъже приказываю дети свои Княгини своей: а вы, дети мои, живите за одинъ, а матерь свою чтите и слушайте. А приказываю вотчину свою Москву, свою треть, чемъ мя благословилъ Отецъ мой, детемъ своимъ, сыну Князю Ивану, Князю Семену, Князю Ярославу, Князю Ондрею, Князю Василью, ведаютъ по годомъ. А сына Князя Ивана благословляю, на старейшей путь ему въ Москве и въ станехъ конюшой путь, борътници, садовници, псари, бобровники, бараши и делюи; а техъ борътниковъ, или садовниковъ, или псарей, или бобровниковъ, или барашовъ, делюевъ не въсхочетъ жити на техъ земляхъ, инъ земли [65] лишенъ, пойди прочь, а сами сыну Князю Ивану не надобе, на которого грамоты полные не будетъ, а земли ихъ сыну Князю Ивану. А треть численыхъ своихъ людей въ Москве и въ станехъ далъ есмь детемъ своимъ, сыну Князю Ондрею, Князю Василью на иолы; а жене своей Княгине Олене далъ есмь свою треть тамги Московьские и восмничее, и гостиное, и весчее, и пудовое, и пересудъ, и серебреное литье, и все пошлины Московьские. А благословилъ есмь сына Князя Ивана, далъ есмь ему Серпоховъ съ тамгою и съ мыты, и съ селы и зъ бортью и со всеми пошлинами; а къ Серпохову волости: Городець, Нарьское, Нивна, Темна, Синилища, Гомонинъ, Ярославля слободка, Мокрая слободка, Дягилева слободка, Лвова, верхъ Москвицъ слободка. А рубежъ сыну Князю Ивану зъ братомъ съ Ярославомъ, отъ Оки отъ реки по верхъ Хрепилева озера, отъ верхъ озера къ Максимкову дворищу, а отъ Максимкова поперекъ Будина бору, а отъ Будина поперекъ Литовьского пути; а Круглая и Остапкова слободка, а то къ Серпохову. А изъ Московьскихъ селъ сыну Князю Ивану: Микулиньское село, Губкино село, Немцово, Поповьское на Коломенке съ мелницею, Туловьское село со всеми деревнями. А что сынъ Князь Иванъ купилъ село у Ортема въ Ростунове слободке, въ уделе брата своего Князя Ярослава, и то село сыну Князю Ярославу; а на то место далъ есмь сыну Князю Ивану Сеситрово ¹ село, да Струпиково. А благословилъ есмь сына Князя Семена, далъ есмь ему Боровескъ съ тамгою и съ мыты, и съ селы и зъ бортью и со всеми пошлинами; а къ Боровьску волости: Голичици, Хопилева слободка, Истья съ слободкою, Мушковы треть, половина Щитова. А рубежъ Щитову сыну Князю Семену зъ братомъ съ Васильемъ, по Ондрееву розъезду по Горохову, отъ городка отъ Щитова по Наре вверхъ до Усищова двора, по Кремичну вверхъ да ко Воскресенью, а отъ Воскресенья по задней верхъ подъ Якимовъ дворъ, а отъ Якимова двора на верхъ Мочи къ Сохоньскому рубежу. А изъ Московьскихъ селъ сыну Князю Семену: Выпряжково на Студенце зъ деревнями, Колычевьское, на Неглимне мелница; а въ Юрьеве въ Польскомъ сыну Князю Семену четыре села, Варварское, Богоявленьское, Поеловское, Федоровское. А благословилъ есмь сына Князя Ярослава, далъ есмь ему Ярославль съ Хотунью, съ тамгою и съ мыты, и съ селы и зъ бортью и со всеми пошлинами, Вихорну, Полянки, Ростунову слободку, Мошневскую слободку. А изъ Московьскихъ селъ сыну Князю Ярославу: Сарыевьское, да Кирьясово съ луги, да на устьи Мьстица мелница; а розъездъ Ногатиньскому съ Кирьясовымъ, съ Великие Княгини луга путомъ къ воротцемъ. А благословилъ есмь сына Князя Ондрея, далъ есмь ему Радонежъ съ тамгою и съ мыты, Бели, Черноголовль съ числеными людьми на Кержаче и съ селы и зъ бортью и со всеми пошлинами, Яковля слободка, Кишкина слободка, Тухачевъ. А изъ Московьскихъ селъ сыну Князю Ондрею: Михайловьское село съ мелницею, Калиткиново село, на Учи Поповьское, да Илья святый, да Дмитреевъское селцо Воронина, на Любосивли Четрековьское, Мосейково на усть Любосивли, да Сокова деревня. А благословилъ есмь сына Князя Василья, далъ есмь ему Перемышль съ тамгою и съ мыты и съ селы изъ бортью, псари и садовници, и со всеми пошлинами, Растовецъ, половина Щитова по Ондрееву розъезду по Горохову, треть Добрятиньскую; а изъ Московьскихъ селъ сыну Князю Василью, Ясиновьское зъ деревнями, да Паншина гарь. А благословилъ есмь сына Князя Ивана, далъ есмь ему Князя Великого удела ВАСИЛЬЯ ДМИТРИЕВИЧА Козелескъ со всеми пошлинами, Гоголь, Олексинъ, куплю Лисинъ; а отъимется [66] какими делы Козелескъ, и въ Козельска место, сыну Князю Ивану Любутоскъ съ волостми; а отъимется отъ сына ото Князя отъ Ивана Любутескъ и Козелескъ, и сыну Князю Ивану Рожалово да Боженка. А благословилъ есмь сына Князя Семена, Князя Ярослава, далъ есмь имъ Великаго Князя удела ВАСИЛЬЯ ДМИТРИЕВИЧА Городець на Волзе, оприснь мыта и тамги; а мытъ и тамгу далъ есмь жоне своей Княгине Олене на Городце, по старой пошлине, какъ было и переже сего; а городъ детемъ моимъ и станы на полы, и со всеми пошлинами; а сыну Князю Семену станы на сей стороне Волги, пониже Городца, да Белогородье; а сыну Князю Ярославу станы на оной стороне Волги, повыше Городца, да Юрьевецъ. А станы дети мои поделятся на полы ровно; а у которого будетъ боле въ станехъ, и тотъ тому съступится. А будетъ Белогородье боле Юрьевца и Черняковой, и сынъ Князь Семенъ Коряковой придастъ брату Князю Ярославу; а будетъ Юрьевецъ и Чернякова боле Белогородья, ино по томужъ; а Корякову дети мои Князь Семенъ, Князь Ярославъ розделятъ себе на полы и слободки. А езъ дети мои подъ Городцомъ затепутъ съ одиного, а делятъ себе на полы; а во чьемъ уделе которое село мое будетъ и пути, ино тому сыну и те села и пути. А сыну Князю Семену далъ есмь ему, оприснь делу, на Городце Пороздну. А на мытниковъ и на таможниковъ дети мои на Городецьскихъ матери своей приставовъ своихъ не даютъ, ни судятъ ихъ, мытниковъ своихъ и таможниковъ судитъ ихъ Княгини моя; а въ мытъ и тамгу дети мои не въступаются никаковыми делы. А Бояромъ на Городце волнымъ воля. А судомъ и данью потянути по уделомъ, где хто живетъ. А хто будетъ подъ дворьскимъ слугъ и отъ сотниковъ, техъ дети мои промежы собя не приимаютъ во свои уделы. А розмыслитъ Богъ о Княгине о моей, по ее животе, мытъ и тамга детемъ моимъ, сыну Князю Семену, Князю Ярославу на полы; а отъимется Городецъ отъ детей отъ моихъ, и на то место сыну Князю Семену, Князю Ярославу Тошня на полы. А благословилъ есмь сына Князя Ондрея, Князя Василья, далъ есмь имъ Углече поле на полы, съ селы и со всеми станы и со всеми пошлинами. А жоне своеи Княгине Олене далъ есмь ей Лужу и со всеми слободами и съ волостьми и съ околицами и съ селы и зъ бортью, съ тамгою и съ мыты и съ озеры и со всеми пошлинами, и что въ Луже села за слугами и въ слободахъ, и те села все Княгине моей, Козловъ бродъ зъ бортью и съ селы и съ оброчники и со всеми пошлинами, Бадееву слободку; а слободы Лужевъские и волости Княгине моей: Ловышина, Ярьцева слободка, Сосновецъ, Турьи горы, Буболь, Вепрейка, Якимова слободка, Маковець, Сетунка, Терехова, Спиркова, Ортемова слободка, Скомантова, Гриди Ярцева, Михалкова Степана Осипова Дынка Мосолова, Гриди Федотова Лукина. А изъ Московьскихъ селъ далъ есмь Княгине своей: Коломеньское село со всеми луги и зъ деревнями, Ногатиньское со всеми луги и зъ деревнями, Таниньское село съ Кореевымъ, Косино съ треми озеры, Обухово; а въ Косиньскомъ селе и въ Обухове Княгини моя волна которому сыну дати, а дети мои въ те села не въступаются; да мелница Княгини моей на усть Яузы, а въ мелнице Княгини моя волна, которому сыну дастъ, то тому и есть, а дети мои въ мелницу не въступаются. А изъ уделовъ детей моихъ подавалъ есмь села Княгине своей: изо Княжа удела Иванова Всходское село зъ деревнями, да Тетково озеро; а изо Княжа удела Семенова Омутьское село зъ деревнями и съ луги; а изо Княжа удела изъ Ярославля Бовыкино зъ деревнями и съ луги, да Долгое озеро на усть Лопастны; а изо Княжа удела Ондреева Вороновьское съ деревнями, да Ковезиньское село съ деревнями и съ луги, и Радонежьские бортники съ деревнями и зъ бортью; а изо Княжа [67] удела Васильева Битягово со всеми деревнями и съ луги, да Домодедово со всеми луги. А на Углечи поли далъ есмь Княгине своей село Богородицьское со всеми деревнями и съ луги и съ лесомъ; а дети мои Князь Ондрей, Князь Василей въ то село не въступаются, ни приставовъ своихъ не всылаютъ, ни судовъ не судятъ, ни дани но емлютъ, судитъ то село Княгини моя, и дань емлетъ. А розмыслитъ Богъ о Княгине о моей, по ее животе Коломеньское село и съ зарецскими луги сыну Князю Ивану, а Ногатиньское зъ деревнями и со всеми луги сыну Князю Семену, а Таниньское село съ Кореевымъ сыну Князю Василью; а Коломеньскому селу розъездъ съ Ногатиньскимъ отъ заборья на усть Ногатиньской заводи. А дети мои братъ въ братень уделъ и въ матери своей уделъ не въежжаютъ на свою утеху, опроче того, аже ся путь получитъ поперекъ удела ехати, ни приставовъ своихъ не всылаютъ братъ въ братень уделъ, и не въступаются никаковыми делы, ни судовъ имъ не судити, ни грамотъ имъ жаловальныхъ не давати, ни дани не имати брату на братне уделе: такъже дети мои въ материнъ уделъ и въ села, и что изъ уделовъ села подавалъ есмь своей Княгине, не въступаются никаковыми делы, и въ Медкино село съ деревнями, и въ Дьяковьское село съ деревнями ни приставовъ своихъ не всылаютъ, ни судовъ имъ не судити, ни закладней имъ не держати, ни грамотъ имъ жаловальныхъ не давати. А дани детемъ моимъ на матерне уделе и на селехъ не имати; а дань емлетъ Княгиня моя съ удела своего и съ селъ, и что изъ уделовъ села подавалъ есмь детей моихъ села Княгине своей, и съ Медкина и съ техъ селъ дань емлетъ сама; а судитъ Княгини моя уделъ свой и те села и Бояре свои сама, а дети мои въ то не въступаются. А выйдетъ дань Великого Князя ко Орде дати, и дети мои и Княгини моя возьмутъ дань кто же на своемъ уделе по уроку, что въ сей грамоте писано; а взявъ дань кто же на своемъ уделе, и пошлютъ кто же своего Боярина за своимъ серебромъ вместе ко казне Великого Князя, и отдадутъ серебро вместе. А детемъ моимъ брату въ братне уделе селъ не купити, такъже и ихъ Бояромъ селъ не купити въ уделе детей моихъ, безъ повеленья детей моихъ; чей будетъ уделъ сына моего; такъже детемъ моимъ въ матерне уделе селъ не купити, по томужъ детей моихъ Бояромъ селъ не купити въ уделе Княгини моей, безъ повеленья Княгини моей. А Бояромъ и слугамъ, кто будетъ не подъ дворьскимъ, волнымъ воля. А судомъ и данью потянути по уделомъ, где кто живетъ. А кто будетъ подъ дворьскимъ слугъ, техъ дети мои промежи себе не приимаютъ, ни отъ сотниковъ; а кто техъ выйдетъ изъ уделовъ детей моихъ и Княгини моей, инъ земли лишенъ, а земли ихъ сыну моему, чей будетъ уделъ. А по грехомъ отъиметь Богъ сына которого изъ сыновъ моихъ, а останется его жена, а не пойдетъ за мужъ, и сноха моя съ своими детьми сидитъ въ мужа своего уделе до своего живота, а дань даетъ ко казне Великого Князя по уроку, что въ сей грамоте писано: а розмыслитъ Богъ о сносе о моей, и тотъ уделъ сыну ее, а моему внуку; а не будетъ сына, а останется дчи, и дети мои вси брата своего дчерь выдадутъ за мужъ, а брата своего уделомъ поделятся вси ровно. А коли выйдетъ дань Великого Князя ко Орде въ пять тысячь рублевъ, имется дани детемъ моимъ и Княгине моей и ихъ уделомъ триста рублевъ и дватцать рублевъ, оприснь Городца и Углеча поля; и Княгини моя возметъ дань съ Лужы и со всего своего удела, и съ Лужевьскихъ волостей и слободъ и околицъ и селъ, и съ Козлова броду, и зъ Бадеевы слободки восмьдесятъ рублевъ и восмь рублевъ; а сынъ Князь Иванъ возметъ дани съ Серпохова и со всего съ своего удела пятьдесятъ рублевъ безъ полутора рубля; а сынъ Князь Семенъ возметъ дани зъ Боровьска и со всего [68] съ своего удела тритцать рублевъ и три рубля; а сынъ Князь Ярославъ возметъ дани на Ярославли и со всего своего удела семьдесятъ рублевъ и шесть рублевъ; а сынъ Князь Ондрей возметъ дани на Радонеже и со всего своего удела сорокъ рублевъ и два рубля; а сынъ Князь Василей возметъ дани на Перемышле и со всего своего удела сорокъ рублевъ и рубль; а сынъ Князь Семенъ, Князь Ярославъ возмутъ дани зъ Городца и зъ Городецьскихъ волостей въ Новгородской выходъ въ полторы тысячи рублевъ возмутъ сто рублевъ и шестьдесятъ рублевъ, по нашему докончанью, оприснь Пороздны, а съ Пороздны сынъ Князь Семенъ возметъ дани въ тожъ серебро по розочту; а сынъ Князь Ондрей, Князь Василей возмутъ дани съ Углеча поля сто рублевъ и пять рублевъ: а то возмутъ дети мои и Княгини моя дань съ уделовъ своихъ и зъ Городца и зъ Городецьскихъ волостей и съ Углеча поля въ шесть сотъ рублевъ безъ пятинатцати рублевъ; а прибудетъ дани боле или меньши, ини возмутъ дань по томужъ розочту. А переменитъ Богъ Орду, и Князь Великий не иметъ выхода давати во Орду, и дети мои; а что возмутъ дани на Московьскихъ станехъ и на городе на Москве, и на численыхъ людехъ, и дети мои возмутъ свою треть дани на Московьские и численыхъ людей, а поделятся дети мои съ матерью вси ровно по частемъ. А которой сынъ мой возметъ дань на своемъ уделе, и та дань тому и есть: а что возметъ дани Княгини моя на своемъ уделе и на селехъ, что есмь подавалъ своей Княгине изъ уделовъ детей моихъ села и Московьские села, и съ Медкина и зъ Бубольского и зъ Бенитского, а что возметъ дани, и те дани ей и есть; а дети мои въ то не въступаются. А учинится въ Луже душегубство или въ волостехъ въ Лужевьскихъ и въ слободахъ и въ околицахъ удела Княгини моей, и те душегубства потянутъ къ Луже; а дети мои въ те душегубства не въступаются. А что есмь изъ уделовъ села подавалъ Княгине своей, и во чьемъ уделе детей моихъ которое село будетъ, и Княгини моя тому сыну то село и дастъ по своемъ животе. А розмыслитъ Богъ о Княгине о моей, по ее животе Козловъ бродъ сыну Князю Ивану зъ братомъ съ Ярославомъ на полы, и Бадеева слободка; а Лужа и все волости Лужевьские и слободы и околици и селы зъ бортью и со всеми пошлинами сыномъ моимъ, сыну Князю Семену, Князю Ондрею, Князю Василью на трое, оприснь Бубольского села зъ деревнями, и Бенитьского села зъ деревнями, и Медкина села зъ деревнями, и Дьковьского села зъ деревнями: те села Княгини моей оприснь делу, въ техъ селехъ Княгини моя волна, которому сыну дастъ, то тому и есть; а дети мои въ те села не въступаются. А кто учнетъ Бояръ служити моей Княгине, а техъ Бояръ дети мои блюдите съ одиного. А что мои ключники некуплеиые, а покупили деревни за моимъ ключемъ, сами ключники детемъ моимъ не надобе, а деревни ихъ детемъ моимъ, во чьемъ будутъ уделе. А что мое стадо седелное, кони и лошаки и жеребьци и кобылье стадо, а то далъ есмь Княгине своей; а дети мои въ то не въступаются. А что есмь стада подавалъ детемъ своимъ, и те стада детемъ моимъ; а братъ въ братне стадо и въ матери своей стадо не въступаются. А сыну Князю Ивану далъ есмь ему на Москве Зворыкинъ дворъ, да Игнатьевъ дворъ, да Бутовъ садъ; а сыну Князю Семену, Князю Ярославу далъ есмь имъ на полы Княгини Великое Марьинъ дворъ; а сыну Князю Семену за Неглимною Тереховъ садъ; а Княгине моей съ меншими детьми, со Княземъ съ Ондреемъ, со Княземъ съ Васильемъ далъ есмь имъ дворъ свой болшой Московьской на полы; а сыну Князю Ярославу, Князю Ондрею, Князю Василью далъ есмь имъ Чичаковъ садъ на трое. А что есмь подавалъ. своей Княгине пошлины Московьские, по ее животе чей будетъ годъ Москва [69] ведати сына моего, тотъ и те пошлины ведаетъ. А соль на Городце дети мои Князь Семенъ, Князь Ярославъ ведаютъ съ одиного, а делятъ себе на полы, оприснь Федоровъские варници; а иной не въступается никто въ Городецьские варници, безъ повеления детей моихъ. А въсхочетъ сынъ Князь Семенъ езъ себе забити на Волзе, инъ себе езъ затепетъ ниже Городца; а сынъ Князь Ярославъ въсхочетъ себе езъ забити на Волзе, инъ себе езъ затепетъ выше Городца подъ Юрьевъцомъ. А что есмь чемъ благословилъ которого сына, что есмь имъ подавалъ, а то у нихъ и есть у моихъ детей; а оприснь того, что ни будетъ въ моей казне, или что ми на комъ взяти, а то все Княгине моей по моей душе; а дети мои въ то не въступаются. А отъиметъ Богъ которого сына исъ сыновъ моихъ, и жена его не пойдетъ за мужъ, а не будетъ у нее детей, и сноха моя сидитъ въ мужа своего уделе до своего живота, по сей по моей грамоте, а поминаетъ нашу душу; а дети мои до ее живота въ брата своего уделъ не въступаются никаковыми делы. А писалъ есмь сю грамоту передъ отци своими, передъ Игуменомъ передъ Никономъ Радонежъскимъ, передъ Игуменомъ передъ Савою Спасьскимъ; а туто были Бояре мои: Костянтинъ Ивановичь, Михайло Ивановичь, Олексей Григорьевичь, Ондрей Борисовичь, Григорей Михайловичь. А грамоту писалъ Мещеринъ.

На обороте сей Грамоты написано:

Списокъ зъ духовной Князя Володимера Андреевича.

(Перепечатано из С. Г. Г. и Д. т. I, № 40, стр. 74-79.)

Комментарии

1. В другой копии с сей грамоты написано: Сесипетрово.