Духовная Грамота (в копии) Великого Князя ИОАННА ВАСИЛИЕВИЧА: о разделе, по смерти его, всего движимого и недвижимого имения детям своим, Князьям: Василью, Юрью, Дмитрию, Семену и Андрею, — съ изъяснением прав, каковые кому в данных им областях иметъ; где делать монету, и по чему каждому изъ них платить въ Татарские выходы; также где производить торги и собирать пошлину; и наконец о заклинании меньших детей, почитать старшего своего брата вместо отца.— Писана около 1504 года.

Во имя святыя и жывоначяльныя Троица Отца и Сына и святаго Духа, и по благословению отца нашего Симона Митрополита всеа Русии. Се язъ многогрешный и худый рабъ Божий ИВАНЪ, при своемъ жывоте, въ своемъ смысле, пишу сию грамоту душевную; даю рядъ своимъ сыномъ, сыну своему Василью и меншимъ своимъ детемъ Юрью, Дмитрею, Семену, Андрею. Приказываю детей своихъ меншихъ Юрья зъ братьею сыну своему Василью, а ихъ брату старейшему; а вы дети мои Юрьи, Дмитрей, Семенъ, Андрей, дръжыте моего сына Василья, а своего брата старейшаго, въ мое место своего отца, и слушайте его во всемъ; а ты сынъ мой Василей дръжы свою братью молодшую Юрья зъ братьею во чти безъ обиды. Благословляю сына своего старейшаго Василья своею отчиною Великими Княжствы, чемъ мя благословилъ отецъ мой, и что ми далъ Богъ. А даю ему городъ Москву съ волостьми и съ путми и зъ станы и зъ селы, и зъ дворы зъ городцкими со всеми и зъ слободами, и съ тамъгою и съ пудомъ и съ помернымъ, и съ торги и съ лавъками и зъ дворы зъ гостиными, и со всеми пошлинами, и зъ Добрятинскимъ селомъ, и зъ бортью и съ Васильцовымъ стомъ, да числяки и Ординцы; а мои дети Юрьи, Дмитрей, Семенъ, Андрей у моего сына у Василья, а у своего брата у старейшаго, въ числяки и въ Ординцы не въступаются ни во что, ни въ земли ихъ ни въ воды не въступаются, и не обидятъ ихъ ничемъ. Да емужъ даю селцо Семчиньское и зъ дворы зъ городцкими и зъ Самъсоновымъ лугомъ, да село [34] Воробьево и съ Володимеровскимъ, и зъ Семеновскимъ, и съ Воронцовскимъ, и съ Кадашовымъ и зъ деревнями, какъ было при мне; да емужъ даю селцо Воронцовсвое на Яузе, где мой дворъ, и зъ дворы зъ городцкими со всеми по обе стороны Яузы, и съ мелницами, какъ было при мне; да монастырь Лыщыково и зъ дворы, да Ильинскую слободку со всемъ по тому, какъ есми выменилъ у Андронникова монастыря. А сынъ мой Василей дръжытъ на Москве болшего своего Наместника по старине и какъ было при мне, а другово своего Наместника дръжытъ на Москве на Княжь Володимеровской трети Андреевича, что была дана братие моей Юрью да Андрею. А что которые мои дворы внутри города на Москве и за городомъ на посадехъ, и сады мои все, и пустые мои места по посадомъ: то все сыну моему Василью. А что которые мои дворы внутри города на Москве, и за городомъ за моими Бояры и за Князьми и за детми за Боярскими, и за дворяны за моими, и за дворцовыми людми и за конюхи и за мастеры за моими: и те все дворы сыну же моему Василью. А у кого будутъ у Бояръ и у Князей и у детей у Боярскихъ внутри города на Москве и за городомъ на посадехъ дворы, ихъ отчины и купли, или кому буду далъ на Москве внутри города и за городомъ по посадомъ на дворы грамоты свои жаловальные прочные: и сынъ мой Василей въ те дворы у нихъ не въступается. Да что были къ Дмитрову приданы волости Московские Рогожь, Воря, Корзенево, Шерна городокъ, Сулишинъ и съ Новымъ селомъ: и язъ те волости даю въ Москве со всемъ по старине сыну своему Василью. Да емужъ даю волости Сурожыкъ, да Лучиньское, да Радонежъ съ волостьми и зъ путми и зъ селы и со всеми пошлинами, да треть Мушкову съ мытомъ съ Лопьскимъ; да даю ему городъ Коломну съ волостьми и зъ путми и зъ селы и со всеми пошлинами; городъ Кошыру съ заречьемъ, что за рекою за Окою; Тешиловъ, и Рославль, и Веневъ и Мъстиславль, и иные места по Рязанской рубежъ, и съ волостьми и съ путми и зъ селы и со всеми пошлинами, и съ Елчемъ и со всеми Елечскими месты; городъ Серпоховъ, да Хотунь и съ волостьми и съ путми и зъ селы и со всеми пошлинами; городъ Торусу зъ Городцомъ, и съ Исканью и съ Мышегою и съ Колодною, и со Княгининьскою вотчиною Овдотьиною; городъ Мченескъ съ волостьми и зъ селы и со всеми пошлинами, со всемъ, что въ нему потягло; да емужъ даю городъ Воротынескъ, и съ Лагинскомъ, и съ Крайшинымъ, и съ иными месты, со всемъ съ темъ, какъ былъ за Воротынскими. А что есми променилъ Князю Михайлу Мезетцкому на его жеребей на Месческъ въ Стародубе Олексинъ, и онъ дръжытъ по меновной грамоте; а судъ и дань сына моего Васильево. А Князи Новосильские Одоевские и Белевские и зъ своими детми и зъ своими вотчинами, и что къ ихъ вотчинамъ потягло, сыну же моему Василью къ нашему Великому Княжству. Да сыну же своему Василью даю городъ Боровескъ съ волостьми и съ путми и зъ селы и со всеми пошлинами, и зъ Суходоломъ, и съ Истьею, и съ Истервою, и съ Краснымъ селомъ, и съ Кременцомъ, и съ Песочною зъ болшею, и зъ слободкою со Осны на Шане, что садилъ Василей Карамышевъ; городъ Ярославецъ съ волостьми и съ путми и зъ селы и со всеми пошлинами, со всемъ съ темъ, какъ былъ за Княземъ Михайломъ Андреевичемъ; городъ Медынь, и Радомль и съ Вешками по Угру, да на Шане слобода, что Товарковъ садилъ по Угружъ, и съ Песочною съ меньшею, и зъ слободами, что садили Андрей Картъмазовъ, да Митя Загрязской да Ивашко Гладкой. А что Филиповыхъ детей Полтева села и деревни на сей стороне Угры: и те села и деревни со всемъ, что къ нимъ потягло, къ Медыни сыну же моему Василью. Да емужъ даю городъ Можаескъ съ волостьми и съ путми и зъ селы и со всеми [35] пошлинами, и зъ Чягощъю, и съ Турьевымъ, и съ Ореховною, и съ Могилномъ, и съ Миченками, и съ Шатшею, и зъ Сулидовымъ, и зъ Дмитровцомъ по обе стороны Угры, и съ иными месты, что въ нимъ потягло; городъ Вязму, и Козловъ съ волостьми и зъ селы и со всеми пошлинами, со всемъ съ темъ, что къ Вязме и хъ Козлову и ко всемъ Вяземскимъ местомъ потягло, какъ было при мне. Да сынужъ своему Василью даю городъ Дорогобужъ съ волостьми и зъ селы и со всеми пошлинами, со всемъ, что въ нему потягло; да волости Дорогобужские: Погорелая, Негомле, Хотомичи, Холмъ, Бятино, Прость, селцо Заопье, Водоса, Некрасова, Селечна, Кремена, Редынь, по реце по Уже устье, Косково, Рехты, Хомчичи, Вышково, Василево, Ескино село Климова, слободка Владычня въ Чертъкове, селцо Путятино зъ деревнями, Игумнова, Мъстиславецъ, Ощытовъ, Жулинъ, Мошкова гора, Лучинъ городокъ, Великое поле, Лопатино, Копылеа и Ужыца, Ведрошь и Озерища, Сверковы Луки, со всемъ съ темъ, что къ Дорогобужу и къ темъ волостемъ и селомъ потягло, какъ было при мне. Да сынужъ своему Василью даю городъ Переаславль съ волостьми и съ путми и зъ селы, и со всеми пошлинами и зъ солью; да что были въ Дмитрову приданы волости Переаславльские Серебожь, Рожественое, Бускутово, и язъ те волости даю къ Переяславлю со всемъ по старине сыну своему Василью. Да емужъ даю городъ Володимеръ съ волостьми и съ путми и зъ селы и со всеми пошлинами, и съ Муромскимъ селцомъ, и зъ Шатуромъ, и съ Колушкою, и съ Вышелесомъ и съ Островомъ; городъ Юрьевъ съ волостьми и съ путми и зъ селы, и съ великою Солью, и со всеми пошлинами; городъ Суздаль съ волостьми и съ путми и зъ селы и со всеми пошлинами, да Солцу малую обе половины; городъ Ростовъ съ волостьми и съ путми и зъ селы, и со всеми пошлинами и зъ солью; городъ Ярославль съ волостьми и съ путми и зъ селы и со всеми пошлинами, и съ Ухрою, и зъ селомъ съ Петровскимъ и зъ деревнями, и слободку Охлябининьскую и съ мытомъ, и Княжъ Васильевъскую вотчину Щетинина Касть со всемъ; да Инопажъ и съ селцомъ и съ езомъ, что на Волзе подъ Рыбною слободою противу Инопажа и селца: а Бояромъ и детемъ Боярскимъ Ярославскимъ съ своими вотчинами и съ куплями отъ моего сына отъ Василья не отъехати никому никуде; а хто отъедетъ, и земли ихъ сыну моему; а служатъ ему, и онъ у нихъ въ ихъ земли не въступается, ни у ихъ жонъ, ни у ихъ детей; городъ Романовъ городокъ съ волостьми и съ путми и зъ селы и со всеми пошлинами. Да сыну же своему Василью даю усть Шокъстны по обе стороны погосты и зъ деревнями Княжъ Васильевъские и Княжъ Семеновъские Шохонскихъ, и съ езы и съ рыбною ловлею и со всеми пошлинами, по тому какъ было за моею матерью за Великою Княгинею; да волости Заволжъские по обе стороны реки Шокстны Княжъ Ивановъские Андреевича, и села и деревни, что были за моею матерью за Великою Княгинею; а волости Шохонские: Луковесь, Арбужовесь, Машкома, Веретея большаа, городокъ Княжычи, Песье село, Всесвятцкое, Волское, и съ Окишовскимъ селомъ и съ Вонгуемъ, Патробалъ, Рунай, и съ Шагатью, и зъ слободками съ Кештомою и съ Шелшедамомъ, Белое село, Шыгорашъ, и съ иными волостьми и зъ селы и зъ деревнями, и съ езы и съ рыбною ловлею и со всеми пошлинами, со всемъ съ темъ, какъ было за моею матерью за Великою Княгинею, и съ Петровскими Костянтиновича селы и зъ деревнями, и что были въ Шокстнежъ волости бабы моее Великие Княгини Софьи, усть Углы, да Веретейка малая: и те волости и съ езы и съ рыбною ловлею и со всеми пошлинами сынужъ моему Василью. Да сыну же своему Василью даю городъ Бело озеро съ волостьми и [36] съ путми и зъ селы и со всеми пошлинами, со всемъ съ темъ, какъ было при мне; городъ Вологду съ волостьми и съ путми и зъ селы и со всеми пошлинами; да Заозерье и съ Кубеною, и съ волостьми и съ путми и зъ селы и со всеми пошлинами; городъ Устьюгъ и съ волостьми и съ путми и зъ селы и со всеми пошлинами, да Вычегду, и Вымь, и Удору и Сысолу, и со всеми ихъ месты; да въ Заволотцкой земле Ростовщину, Пинега, и Кегрола, и Чякола, Прьмъские, Мезень, Немъюга, Пильигоры, Пинешка, Выя, Тойма, Кирьигоры, Емъскаа гора на Вазе со всемъ, и Онтонова Перевара, Корбольской островъ, Шогогора, Керчела, Сурапоганаа, Лавела и съ иными месты, что къ темъ волостемъ потягло; да Югру и Печеру со всемъ, да Пермь Великую со всемъ, да городъ Кострому и съ Плесомъ, и съ Нерехтою и съ Иледамомъ, и съ волостьми и съ путми и зъ селы и со всеми пошлинами; городъ Галичь съ волостьми и съ путми и зъ селы и со всеми пошлинами, и зъ Солью, и съ Унжею и съ Чюхломою, и со всемъ, что къ Галичю и къ Унже и къ Чюхломе изъ старины потягло; да Новгородъ Нижней съ волостьми и съ путми и зъ селы и со всеми пошлинами, и съ Мордвами и съ Черемисою, что къ Новугороду потягло. А которые села и деревни въ Новегороде въ Нижнемъ за моими Князьми и за Бояры и за детми за Боярскими, за кемъ ни буди: и то все сыну же моему Василью. Да емужъ даю городъ Муромъ съ волостьми и съ путми и зъ селы и со всеми пошлинами, и съ Мордвами и съ Черемисою, что къ Мурому потягло; да Мещера съ волостьми и зъ селы и со всемъ, что къ ней потягло, и съ Кошковымъ; да Князи Мордовские все и зъ своими отчинами сыну же моему Василью. Да сыну же своему Василью даю Вятцкую землю всю, городы и волости, и со всемъ, что къ ней потягло, и съ Арскими Князьми, какъ было при мне. А что есми пожаловалъ Князя Федора Ивановича Белского, далъ есми ему въ вотчину городъ Лухъ съ волостьми, да волости Вичюгу, да Кинешму, да Чихачевъ: и Князь Федоръ и его дети служатъ сыну моему Василью, а ту свою вотчину дръжатъ по тому, какъ было при мне; а отъедетъ Князь Федоръ, или его дети отъ моего сына отъ Василья къ моимъ детемъ къ меншимъ, или хъ кому ни буди, и та его вотчина Лухъ и съ теми волостьми сыну моему Василью. Да сына же своего Василья благословляю своею отчиною Великимъ Княжствомъ Тферскимъ, даю ему городъ Тферь и Городень съ волостьми и съ путми и зъ селы и со всеми пошлинами, по тому, по каа места писалъ ко Тфери писецъ нашъ Князь Федоръ Алабышъ; городъ Клинъ съ волостьми и съ путми и зъ селы и со всеми пошлинами, по тому, по каа места писалъ писецъ нашъ Петръ Лобанъ Заболотцкой, опричь того, что есми променилъ своимъ братаничемъ Борисовымъ детемъ Федору да Ивану отъ Тферские земли Буйгородъ да Колпь: и въ то сынъ мой Василей не въступается. А которые Князи служебные въ Московской земле и во Тферской земле: и те Князи все служатъ сыну моему Василью, а вотчины свои дръжатъ по тому, какъ было при мне; а кто техъ Князей служебныхъ отъ моего сына отъ Василья отъедетъ къ моимъ детемъ къ меньшимъ, или хъ кому ни буди, и техъ Князей вотчины сыну моему Василью. Да сына же своего Василья благословляю своею отчиною Великимъ Княженьемъ Новогородскимъ, даю ему Великий Новгородъ со всемъ съ пятью пятинами, съ волостьми и съ погосты, и съ путми и зъ селы и со всеми пошлинами, и зъ городы, Ивань городъ, Яма городъ, Копорья городъ, Орешокъ городъ, Ладога городъ, Деманъ городъ, Куръ городъ, Порховъ городъ, Высокой городъ, Кошкинъ городъ, Руса городъ; а далъ есми ему те городы все съ волостьми и съ погосты, и съ путми и зъ селы и со всеми пошлинами; да городъ Торжокъ съ волостьми [37] и съ путми и зъ селы и со всеми пошлинами; да въ Новогородской же земле даю ему городъ Холмъ, и Велилю, и Буецъ, и Лопастици и съ иными месты, со всемъ, что къ нимъ потягло; да городъ Луки Великие съ волостьми и съ погосты и со всеми пошлинами; да Лутцкиежъ волости Пуповичи, Вязъ, Чяспла, Коротай, Дубно, Комша и съ иными месты, что къ нимъ потягло; да Ржеву пустую съ волостьми и съ погосты и со всеми пошлинами; да Корельскую землю всю, Корельской городъ съ волостьми и съ погосты и со всеми пошлинами, со всемъ съ темъ, что хъ Корельской земле потягло, и съ Лопью съ лешею и съ дикою Лопью. Да сыну же своему Василью даю Заволотцкую землю всю, Онего, и Каргополе, и все Поонежье, и Двину, и Вагу, и Кокшенгу, и Вельской погостъ, и Колмогоры, и всю Двинскую и Заволотцкую землю. Да сына же своего Василья благословляю своею отчиною, даю ему городъ Пъсковъ и зъ городы и съ волостьми и зъ селы, и всю землю Пъсковскую. Да сыну же своему Василью даю городъ Торопецъ съ волостьми и съ погосты и зъ селы и со всеми пошлинами, со всемъ, что къ нему потягло; да волости Данково, Любута, Дубна, Рожна, Тура, Биберево, Старцева, Нежелскаа, Велижскаа, Плавеетцкаа, Жыжетцкаа, Озерскаа, Казариновскаа; да емужъ даю городъ Острее съ волостьми и со всемъ, что къ нему потягло; а волости Березай, Невле, Усвай, Ловцо, Веснеболого, со всемъ съ темъ, что къ Торопцу и къ Острею и къ темъ волостемъ потягло, какъ было при мне. А что ми далъ сестричичь мой Князь Федоръ Василъевичь Рязанской свою отчину, на Рязани въ городе и на посаде свой жеребей, и Старую Рязань, и Перевитескъ съ волостьми и съ путми и зъ селы, и зъ бортью и съ тамгою и со всеми пошлинами, по тому, какъ ся делилъ съ своимъ братомъ со Княземъ съ Иваномъ: и язъ ту его вотчину, жеребей въ городе на Рязани и на посаде, и Старую Рязань и Перевитескъ съ волостьми и съ путми и зъ селы, и зъ бортью и зъ тамгою и со всеми пошлинами, со всемъ по тому, какъ было за Княземъ за Федоромъ, даю сыну своему Василью. Да благословляю сына своего Василья, и детей своихъ меньшихъ Юрья, Дмитрея, Семена, Андрея въ Москве годомъ Княжъ Костянтиновскимъ Дмитреевича, что былъ данъ брату моему Юрью, да годомъ Княжымъ Петровскимъ Дмитреевича, что былъ данъ брату моему Андрею меньшому, да годомъ Княжъ Михайловскимъ Андреевича; а дръжытъ сынъ мой Василей, и мои дети меньшие Юрьи зъ братьею на техъ годехъ на Москве своихъ Наместниковъ, переменяя пять летъ, по годомъ. А что былъ данъ брату моему Борису въ Москве годъ Княжъ Ивановской Андреевича, и тотъ годъ приходилъ брата моего Борисовымъ детемъ обема дръжати на Москве своего Наместника на шостой годъ, и братаничь мой Иванъ ту полгоду далъ мне; и язъ ту полгоду даю сыну своему Василью, и братаничь мой Федоръ съ сыномъ съ моимъ съ Васильемъ тотъ шостой годъ дръжатъ по полугоду: сынъ мой Василей дръжытъ своего Наместника полгоду, а братаничь мой Федоръ дръжытъ своего Наместника полже году. Да детемъ своимъ меньшимъ Юрью зъ братьею даю дворы внутри города ¹ у Рождества Христова, Петровской да Ивановской да Микитинской Костянтиновичевъ, да Княжъ Александровской дворъ Оболенского, да Васильевъской дворъ Сабурова, да Княжъ Васильевъской дворъ да Княжъ Федоровской Княжъ Васильевыхъ детей Оболенского, да Княжъ Ивановской дворъ Стригинъ, да Ивановской дворъ Борисова, да дву Ивановъ Володимеровыхъ детей Семенова, да Ивановъ Михайлова сына, Семенова, да Григорьевской дворъ Бабинъ, [38] да Васильевъской дворъ Тучковъ; да где мои портные мастеры живутъ Ноздря, да Кузнецовъ, да Ушакъ по новую улицу, что идетъ улица отъ площади къ Фроловскимъ воротомъ, а отъ площади по каа места колье бито: а дети мои Юрьи зъ братьею те места межъ собя поделятъ поровну. Да сыну своему Юрью даю на Москве селцо Сущово зъ дворы зъ городцкими съ посадными; а по котораа места далъ есми ему те дворы городные, и язъ ему далъ списокъ ² за своею печатью и за дьяка своего подписью; а изъ Московскихъ селъ даю ему село Лыткино зъ деревнями. А сыну своему Дмитрею даю на Москве селцо Напрудцкое зъ дворы зъ городцкими съ посадными; а по котораа места далъ есми ему те дворы городные, и язъ ему далъ списокъ ³ за своею печатью и за дьяка своего подписью; а изъ Московскихъ селъ даю ему Озеретцкие села старое да новое зъ деревнями. А сыну своему Семену даю на Москве селцо Луциньское и съ мелницею и со псарнею, да слободку Княжъ Васильевъскую Ромодановского; а по котораа места далъ есми ему ту слободку и селцо, и язъ ему далъ списокъ ⁴ за своею печатью и за дьяка своего подписью; а изъ Московскихъ селъ даю ему Розсудовские села за Похрою, Зверево да Бораново зъ деревнями, что есми выменилъ у братнихъ детей у Борисовыхъ. А сыну своему Андрею даю на Москве за рекою слободку Колычевскую, да монастырь Рожество Пречистые на Голутвине; а по котораа места далъ есми ему ту слободку и монастырь, и язъ ему даль списокъ ⁵ за своею печатью и за дьяка своего подписью; а изъ Московъскихъ селъ даю ему село Ясенево, да село Сарыево, да Юдино зъ деревнями. А изъ тамги изъ Московские и изъ всехъ пошлинъ сынъ мой Василей даетъ детемъ моимъ, а своей братье молодчей, Юрью зъ братьею на всякой годъ по сту рублевъ: Юрью сто рублевъ, Дмитрею сто рублевъ, Семену сто рублевъ, Андрею сто рублевъ. А что есми далъ детемъ своимъ Юрью, Дмитрею, Семену, Андрею въ Москве годы, какъ имъ своихъ Наместниковъ дръжати, и дворы имъ внутри города; и что есми имъ далъ селца у Москвы и дворовъ городцкихъ, и денегъ исъ тамги, и селъ въ Московскихъ станехъ: и они то ведаютъ, какъ имъ въ сей духовной грамоте писано. А опричь того у моего сына у Василья, а у своего брата у старейшаго, на Москве въ дворы въ городные, и на посадехъ въ дворы, и въ тамгу во всю, и въ пошлины во все, также и въ станы и въ волости, и въ пути и въ села въ Московские во все не въступаются ни во что; а ведаютъ то по тому, какъ имъ въ сей духовной грамоте писано. Да благословляю сына своего Юрья, даю ему городъ Дмитровъ съ волостьми и съ путми и зъ селы и со всеми пошлинами, опричь Переаславскихъ волостей Серебожа, Рожественого, Бускутова, что есми далъ сыну Василью къ Переаславлю, и опричь за-Московскихъ волостей, что есми ихъ далъ сыну же своему Василью къ Москве: и въ те волости сынъ мой Юрьи у моего сына у Василья, а у своего брата у старейшаго, не въступается ничемъ. А что въ Дмитровскомъ уезде въ Инобаже деревни Тешиловские за моимъ дьякомъ за Одинцомъ, и те деревни сыну же моему Юрью къ Дмитрову; а сынъ мой Василей въ те деревни въ Тешиловские въ Инобаже у сына у моего у Юрья не въступается, и не тянетъ ихъ къ Тешилову ничемъ. Да сыну же своему Юрью даю къ Дмитрову исъ Переаславскихъ волостей Юлку и зъ бортнымъ [39] станомъ, и въ те волости сынъ мой Василей у моего сына у Юрья не въступается ничемъ; да емужъ даю городъ Звенигородъ съ волостьми и съ путми и зъ селы и со всеми пошлинами, да волость Шопъкову со всемъ. Да сыну жо своему Юрью даю во Тферской земле городъ Кашинъ съ волостьми и съ путми и зъ селы и со всеми пошлинами, по тому, по каа места писалъ хъ Кашину писецъ нашъ Василей Карамышевъ. А что ми далъ братаничь мой Князь Иванъ Борисовичъ свою отчину городъ Рузу съ волостьми и съ путми и зъ селы и со всеми пошлинами, и съ теми волостьми и зъ станы, что ся делилъ зъ братомъ съ своимъ съ Федоромъ отъ Волока, опричь Рюховского села зъ деревнями, что далъ братаничь мой Иванъ брату своему Федору: и язъ городъ Рузу съ волостьми и съ путми и зъ селы и со всеми пошлинами, и съ теми волостьми и зъ станы, что ся делилъ зъ братомъ своимъ съ Федоромъ отъ Волока, даю сыну своему Юрью со всемъ съ темъ по тому, какъ было за моимъ братаничемъ за Иваномъ, опричь Рюховского села зъ деревнями. Да сыну же своему Юрью даю городъ Брянескъ съ волостьми и съ погосты, и зъ селы и со всеми пошлинами, со всемъ, что въ Брянску потягло; да волости Соловьевичи, Прикладни, Пацынъ, Федоровскаа, Осовикъ, Покиничи, Сухарь, Всеславль, Вороница, Жерынь, Батогова, Хвощна, Пиянова, Волконескъ. Да емужъ даю городъ Серпеескъ съ волостьми и со всемъ, что къ нему потягло; а волости Замошье, Тухачевъ, Дегна, Фоминичи, Погостище, Ковылна, Ближевичи, Любунъ, Снопотъ, Даниловичи, Шуя, Демена, Ужеперетъ, Чернятици, Городечна, Мощынъ, да Гнездилово, что была вотчина Князя Александра Княжъ Иванова сына Гнездиловского, со всемъ сътемъ, что къ Брянску и къ Серпейску и къ темъ волостемъ потягло, какъ было при мне. Да благословляю сына своего Дмитрея, даю ему городъ Углече поле съ волостьми и съ путми и зъ селы и со всеми пошлинами, и съ Устюжною, и съ Рожаловымъ, и съ Велетовымъ, и съ Кистьмою, и со всемъ съ темъ, что къ Углечю и къ темъ волостемъ потягло; городъ Мологу и зъ Глебовыхъ вотчиною, и съ езы на Волзе и на Молозе, со всемъ по тому, какъ было при мне. А что есми свелъ торгъ съ Холопья городка на Мологу, и тотъ торгъ торгуютъ на Молозе съезжаяся, какъ было при мне; а сынъ мой Дмитрей емлетъ пошлины, какъ было при мне, а лишнихъ пошлинъ не прибавливаетъ ничего; а сынъ мой Василей и мои дети того торгу на свои земли не сводятъ, ни заповеди въ своихъ земляхъ не чинятъ къ тому торгу ездити. Да емужъ даю городъ Хлепенъ, и съ Рогачевымъ и съ Негомиремъ, съ волостьми и съ путми и зъ селы и со всеми пошлинами; да въ Тферской земле даю ему городъ Зубцовъ съ волостьми и съ путми и зъ селы и со всеми пошлинами; городъ Опоки съ волостьми и съ путми и зъ селы и со всеми пошлинами, по тому, по каа места писалъ къ Зубцову и къ Опокамъ писецъ нашъ Дмитрей Пешковъ. А что ми далъ братаничь мой Князь Иванъ Борисовичь свою отчину, половину Ржевы съ волостьми и съ путми и зъ селы и со всеми пошлинами, по тому, какъ ся делилъ съ своимъ братомъ съ Федоромъ: и язъ половину Ржевы съ волостьми и съ путми и зъ селы и со всеми пошлинами даю сыну же своему Дмитрею, со всемъ по тому, какъ было за моимъ братаничемъ за Иваномъ. Да сыну же своему Дмитрею даю городъ Месческъ съ волостьми и съ погосты и зъ селы и со всеми пошлинами, со всемъ, что къ нему потягло, какъ былъ за Мезетцкими Князьми; городъ Опаковъ со всемъ, что къ нему потягло; да волости Залидовъ, Недоходово, Лычино, Бышковичи по Угру, со всемъ съ темъ, что къ Опакову и къ темъ волостемъ потягло, какъ было при мне. Да благословляю сына своего Семена, даю ему городъ Бежытцкой верхъ съ волостьми [40] и съ путми и зъ селы и со всеми пошлинами; городъ Колугу съ волостми и съ путми и зъ селы и со всеми пошлинами. Да сыну же своему Семену даю городъ Козелескъ съ волостми и зъ селы; а волости Козельские: Серенескъ, да Людимескъ, да Коробки и Вырки, на Выре на реке волости Сенища, да Сытичи, да Выино и съ иными месты, да Липици, да Възбыновъ, да верхъ Серена, да Лугань, да Местилово, да Къцынь, да Хвостовичи, да Порыски, да Борятинъ, да Орень, да Хостьци, да Жереминь, да Сныхово, да Ивановское Бабина село Незнаново, и съ иными месты, со всемъ съ темъ, что къ темъ волостемъ и селомъ потягло. Да благословляю сына своего Андрея, даю ему городъ Верею съ волостми и съ путми и зъ селы и со всеми пошлинами; городъ Вышегородъ съ волостьми и съ путми и зъ селы и со всеми пошлинами; городъ Олексинъ съ волостми и съ путми и зъ селы и со всеми пошлинами, и съ Волконою, и съ Конинымъ, и зъ Гордеевымъ, и съ Нюховою, и со всемъ съ темъ, что къ темъ местомъ потягло; да емужъ даю городъ Любутескъ съ волостми и со всеми пошлинами, и со всемъ, что къ нему потягло, какъ было при мне, и съ Вепринымъ, что за Одоевскими Князьми. Да сыну же своему Андрею даю у Москвы Гжелю да Раменейцо со всемъ, что къ нимъ потягло; да что были къ Дмитрову приданы волости Московские, Селна, Гуслица, Загарье, Вохна, Куней: и язъ те волости со всемъ даю сыну своему Андрею; а сынъ мой Юрьи въ те волости у него не въступается ничемъ. А что въ Селне деревни деловые бортные Василцова ста, Бекренево, Беляницино, новое Беляницино, Харитоновское, Деденево, Нероново, Враниково, Якимовское, новое Якимовское, да пустоши Лопаково, Исачково, Грибачево: и язъ те деревни и пустоши со всемъ даю сыну же своему Андрею; а сынъ мой Василей у него въ то не въступается. Да въ Тферской земле даю ему городъ Старицу съ волостми, и съ путми и зъ селы и со всеми пошлинами, по тому, по каа места писалъ къ Старице писецъ нашъ Борисъ Кутузовъ; да даю ему Холмъскихъ вотчину Холмъ и Новой городокъ, да волость Олешню, да волость Синюю, и иные волости и пути и села со всеми пошлинами, по тому, по каа места те отчины и волости и пути и села писалъ писецъ нашъ Андрей Карамышевъ. А что есми далъ детемъ своимъ меньшимъ Юрью, Дмитрею, Семену, Андрею городовъ и волостей и селъ: и они то и ведаютъ по тому, какъ имъ въ сей духовной грамоте писано; а опричь того, у сына у моего у Василья ни во что не въступаются. А сынъ мой Юрьи зъ братьею по своимъ уделомъ въ Московской земле и въ Тферской денегъ делати не велятъ; а деньги велитъ делати сынъ мой Василей на Москве и во Тфери, какъ было при мне. А откупъ ведаетъ сынъ мой Василей, а въ откупъ у него мои дети Юрьи зъ братьею не въступаются. А что есми подавалъ детемъ своимъ селца у Москвы зъ дворы зъ городцкими на посадехъ: и дети мои въ техъ дворехъ торговъ не дръжатъ, ни жытомъ не велятъ торговати, ни лавокъ не стявятъ, ни гостей съ товаромъ иноземцовъ, и изъ Московские земли и изъ своихъ уделовъ въ своихъ дворехъ не велятъ ставити; а ставятся гости съ товаромъ иноземци, и изъ Московские земли и изъ ихъ уделовъ на гостиныхъ дворехъ, какъ было при мне; а дети мои у моего сына у Василья въ те дворы въ гостиные и въ те пошлины не въступаются. А кто учнетъ въ детей моихъ селцехъ и въ дворехъ въ городныхъ торговати сьестнымъ товаромъ: и сынъ мой Василей техъ торговъ не велитъ сводити, а пошлину полавочную съ нихъ беретъ сына моего Васильевъ приказщикъ, какъ было при мне. А что есми далъ детемъ своимъ Юрью зъ братьею у города у Москвы селца зъ дворы зъ городцкими, и учинится въ техъ селцехъ и въ дворехъ въ городныхъ душегубство [41] или поличное: и то судитъ Наместникъ болшей сына моего Васильевъ. А что есми далъ детемъ своимъ Юрью зъ братьею села въ станехъ въ Московскихъ, и надъ теми селы судъ и дань моихъ детей; а душегубствомъ и поличнымъ те села тянутъ къ городу къ Москве по старине, опричь того поличного, что будетъ въ техъ селехъ промежъ ихъ крестьянъ, то судятъ ихъ приказщики, а докладываютъ Наместника Московского болшего сына моего Васильева; а грамоты полные и докладные на Москве пишетъ дьякъ Ямъской сына моего Васильевъ, какъ было при мне; а опричь того, на Москве грамотъ полныхъ и докладныхъ не пишетъ нихто. А которые есми городы и волости подавалъ детемъ своимъ Юрью зъ братьею въ вуделы, а тянули душегубствомъ къ городу къ Москве: и те городы и уезды, и волости техъ городовъ тянутъ душегубствомъ къ городу къ Москве по старине; а дети мои Юрьи зъ братьею въ то не въступаются. А сынъ мой Василей у моихъ детей, а у своей братьи, въ ихъ уделехъ земель не купитъ ни дръжытъ, ни закладней не дръжытъ; а мои дети у сына моего у Василья въ Москве и въ всемъ его въ Великомъ Княжстве земель не купятъ ни дръжатъ, ни закладней не дръжатъ. А что есми давалъ свои села Бояромъ своимъ и Княземъ и детемъ Боярскимъ, и грамоты есми имъ свои жаловальные подавалъ на те села прочно имъ и ихъ детемъ, или кому буду въ куплю далъ свои грамоты: и въ те села сынъ мой Василей и мои дети у нихъ не въступаются. А дети мои Юрьи зъ братьею даютъ сыну моему Василью съ своихъ уделовъ въ выходы въ Ординские, и въ Крымъ, и въ Азтархань, и въ Казань, и во Царевичевъ городокъ, и въ иные Цари и во Царевичи, которые будутъ у сына моего у Василья въ земле, и въ послы въ Татарские, которые придутъ къ Москве, и ко Тфери, и къ Новугороду къ Нижнему, и къ Ярославлю, и къ Торусе, и къ Рязани къ Старой и къ Перевитску, ко Княжь Федоровскому жеребью Рязанского, и во все Татарские проторы въ тысячю рублевъ сынъ мой Юрьи даетъ съ своего удела со всего и съ Кашина восмьдесятъ рублевъ и два рубля безъ гривны; а сынъ мой Дмитрей даетъ съ своего удела со всего, и зъ Зупцова и съ Опокъ пятьдесятъ рублевъ и восмь рублевъ съ полтиною и семь денегъ; а сынъ мой Семенъ даетъ съ своего удела со всего шестьдесятъ рублевъ и пять рублевъ безъ десяти денегъ; а сынъ мой Андрей даетъ съ своего удела со всего, и зъ Старици, и зъ Холмъскихъ вотчины съ Холму, и съ Нового городка, и съ Олешни, и съ Синие, и съ иныхъ волостей съ Тверскихъ, что ему дано, сорокъ рублевъ съ полтиною и полчетверты деньги; а сынъ мой Василей даетъ въ тужъ тысячю рублевъ съ Москвы и со всего Великого Княженьа Московские земли, и со Тфери и со всее Тферские земли, что ему дано, и съ Рязани съ Старые и съ Перевитска семь сотъ рублевъ и полосманатцата рубля и полтретьи деньги; а Борисовъ сынъ братень Федоръ даетъ сыну моему Василью въ ту же тысячю рублевъ съ своей отчины, и съ Колпи и зъ Буягорода тритьцать рублевъ и полосма рубля. А будетъ того боле или меньши Татарской проторъ: и сынъ мой Василей, и мои дети Юрьи зъ братьею, и братаничь мой Федоръ даютъ по розочту. А сынъ мой Василей въ своемъ Великомъ Княженье дръжытъ ямы и подводы на дорогахъ по темъ местомъ, где были ямы и подводы на дорогахъ при мне; а дети мои Юрьи зъ братьею по своимъ отчинамъ дръжатъ ямы и подводы на дорогахъ по темъ местомъ, где были ямы и подводы по дорогамъ при мне. А которого моего сына не станетъ, а не останется у него ни сына, ни внука: ино его уделъ весь въ Московской земле и въ Тферской земле, что есми ему ни далъ, то все сыну моему Василью; а братьа его у него въ тотъ уделъ не въступаются; а останутся у него дочери, и сынъ [42] мой Василей те его дочери наделивъ подаетъ за мужъ. А что дастъ своей Княгине волостей и селъ и казны, и въ то во все сынъ мой Василей у нее не въступается ни во что до ее жывота. А сына своего Васильа благословляю крестъ животворящее древо въ раце Цареградцкой, да крестъ Петровъ чюдотворцевъ; а сына своего Юрья благословляю крестъ золотъ Борисоглебъской; а сына своего Дмитреа благословляю крестъ золотъ Парамшина дела; а сына своего Семена благословляю крестъ золотъ Михайловъской Владычень; а сына своего Андрея благословляю икона золота Распятье, делана финифтомъ съ каменьемъ и зъ жемчюги. А что есми далъ своей казны своимъ детемъ Юрью, Дмитрею, Семену, Андрею; и язъ что далъ сыну своему Юрью своей казны, и то есми поклалъ въ ларци; а у техъ ларцовъ печати моа да сына моего Юрьева, а ключи техъ ларцовъ у сына у моего у Юрья; а те ларци стоятъ въ моей казне у моего казначея у Дмитреа у Володимерова, да у моего печатника у Юрья у Дмитреева сына у Грека, да у моихъ дьяковъ у Данилка у Мамырева, да у Тишка у Моклокова. А что есми далъ своей казны сыну своему Дмитрею, и то есми поклалъ въ ларци; а у техъ ларцовъ печати моа да сына моего Дмитреева; а ключи техъ ларцовъ у сына у моего у Дмитреа; а те ларци стоятъ въ моей казне у моего казначея у Дмитреа у Володимерова, да у моего печатника у Юрья у Дмитреева сына у Грека, да у моихъ дьяковъ у Данила у Мамырева, да у Тишка у Моклокова. А что есми далъ своей казны сыну своему Семену, и то есми поклалъ въ ларци; а у техъ ларцовъ печати моя да сына моего Семенова, а ключи техъ ларцовъ у сына у моего у Семена; а те ларци стоятъ въ моей казне у моего казначея у Дмитреа у Володимерова, да у моего печатника у Юрьа у Дмитреева сына у Грека, да у моихъ дьяковъ у Данилка у Мамырева, да у Тишка у Моклокова. А что есми далъ своей казны сыну своему Андрею, и то есми поклалъ въ ларци; а у техъ ларцовъ печати моа да сына моего Андреева, а ключи техъ ларцовъ у сына у моего у Андрея; а те ларци стоятъ въ моей казне у моего казначея, у Дмитреа у Володимерова, да у моего печатника у Юрья у Дмитреева сына у Грека, да у моихъ дьяковъ у Данилка у Мамырева, да у Тишка у Моклокова. А опричь того, что ни есть моей казны у моего казначея у Дмитреа у Володимерова, и у моихъ дьяковъ, и у моего дьяка у Семена у Башенина лаловъ и яхонтовъ, и иного каменья и жемчюгу и саженья всякого, и поясовъ и чепей золотыхъ, и судовъ золотыхъ и серебряныхъ и каменыхъ, и золота и серебра, и соболей, и шолковые рухляди, и иные всякие рухляди что ни есть; такъ же и въ моей казне въ постелной что ни есть иконъ и крестовъ золотыхъ, и золота и серебра, и платьа и иные рухляди; и что ни есть у моего дворетцкого у Петра у Васильева у Великого и у дьяковъ у дворцовыхъ моихъ судовъ серебряныхъ, и денегъ и иные рухляди; и что ни есть у моего конюшего, и у моихъ яселничихъ, и у моихъ дьяковъ и у моихъ приказщиковъ, у кого ни буди, моихъ денегъ и иные рухляди всякие; такъ же что ни есть у моего дворетцкого у Тверского и у дьяковъ у Тферскихъ, и у моихъ приказщиковъ, и въ Новегороде въ Великомъ у моего дворетцкого, и у казначеевъ, и у дьяковъ и у моихъ приказщиковъ, у кого ни буди, моихъ денегъ и иные рухляди всякие; да и на Беле озере и на Вологде моя казна, и где ни есть моихъ казенъ: то все сыну моему Василью; а мои дети Юрьи зъ братьею у моего сына у Василья ни во что не въступаются, опричь того, что есми имъ далъ своей казны. А приказываю свою душу, и детей своихъ меньшихъ Юрья, Дмитреа, Семена, Андрея сыну своему Василью: а вы, дети мои меньшие Юрьи зъ братьею, дръжыте сына моего [43] Василья, а своего брата старейшаго, въ мое место своего отца, и слушайте его во всемъ; а ты, сынъ мой Василей, дръжи свою братью меньшую Юрья, Дмитреа, Семена, Андрея въ братстве и во чти безъ обиды. А которой мой сынъ не учнетъ сына моего Васильа слушати во всемъ, или учнетъ подъ нимъ подъискивати Великихъ Княжствъ или подъ его детми, или учнетъ отъ него отступати, или учнетъ съсылатися съ кемъ ни буди тайно или явно на его лихо, или учнутъ кого на него подъимати, или съ кемъ учнутъ на него одиначитися: ино не буди на немъ милости Божией и пречистые Богоматери, и святыхъ чюдотворецъ молитвы, и родитель нашихъ и нашего благословения и въ сий векъ и въ будущий. А кто будетъ моихъ казначеевъ, или кто будетъ моихъ дьяковъ прибытки мои отъ меня ведали, или тиуни или поселские, или кто женился у техъ: те все ненадобе сыну моему Василью, и моимъ детемъ Юрью зъ братьею. А кто порушитъ сию мою грамоту; судитъ ему Богъ, и не буди на немъ моего благословениа. А у сее моей душевные грамоты сиделъ отецъ мой духовной Ондронниковской Архимандритъ Митрофанъ; а туто были Бояре мои Князь Василей Даниловичь, да Князь Данило Васильевичь, да Яковъ Захаръичъ, да казначей мой Дмитрей Володимеровичь. А сию мою душевную грамоту писалъ дьякъ мой Данилко Мамыревъ. ⁶

(Перепечатано из С. Г. Г. и Д., т. I, № 144, стр. 389-400).

Комментарии

1. Жалованную на дворы сии грамоту смотр. выше под № 135.

2. Список с данной грамоты на село Сущово и на дворы смотр. под № 136.

3. Списка с сея грамоты в Архиве Коллегии Иностранных дел не имеется.

4. Списка с упоминаемой грамоты не имеется.

5. Списка с сей грамоты также не имеется.

6. Великий Князь ИОАНН ВАСИЛИЕВИЧ, по приключившейся ему болезни на 67 году от рождения, преставился 27 Окт. 1505 года, и погребен в Московском Архангельском Соборе. Он оставил преемником Всероссийского Престола старшего своего сына, от Греческой Царевны Софии Фоминишны рожденного, Великого Князя ВАСИЛИЯ ИОАННОВИЧА, имевшего от роду 26 лет.