Две духовные Грамоты Великого Князя ВАСИЛИЯ ВАСИЛИЕВИЧА, первая: о разделе, по смерти его, всего движимого и недвижимого его имения сынам своим, Князьям: Ивану, Юрью, Андрею большому, Борису, Андрею меньшому, и Княгине своей Марье Ярославовне;— вторая приписная духовная Грамота его же Великого Князя: о даче, по его смерти, Княгине своей Марье Ярославовне некоторых сел и деревень, в прибавок к помянутым в большой духовной грамоте вотчинам, ей данным — обе грамоты за подписанием Московского Митрополита Феодосия. — Писаны 1462 года.

Первая.

+ Во имя святыя и живоначальные Троици Отца и Сына и святого Духа, и по благословленью отца нашего Феодосиа Митрополита всеиа Руси. Се язъ многогрешны худы рабъ Божей ВАСИЛЕЙ, при своемъ животе въ своемъ смысле пишю сию [28] грамоту душевную; даю рядъ своимъ детемъ и своей Княгине. Приказываю свои дети своей Княгине: а вы мои дети живите за одинъ, а матери своее слушайте во всемъ, въ мое место своего отца. А сына своего старейшого Ивана благословляю своею отчиною Великимъ Княженьемъ, а даю ему треть въ Москве и съ путми съ моими жеребьи, чемъ мя благословилъ Отець мой, и Добрятиньскимъ селомъ зъ бортью, и Василцовымъ стомъ, и числеными людми и Ординци, и Коломною съ волостьми и съ путми и съ селы и со всеми пошлинами, Володимеремъ съ волостми и съ путми и съ селы и со всеми пошлинами, Переяславлемъ съ волостми и съ путми и съ селы и со всеми пошлинами, Кострома съ волостьми и съ путми и съ селы и со всеми пошлинами, Галичь съ волостьми и съ путми и съ селы и съ Солью и со всеми пошлинами, Устюгъ съ волостми и съ путми и съ селы и со всеми пошлинами; да даю своему сыну Ивану землю Вятьскую, да даю ему Суздаль съ волостьми и съ путми и съ селы и со всеми пошлинами, да Новгородъ Нижний со всеми пошлинами и съ волостми и съ путми и съ селы, Муромомъ съ волостьми и съ путми и съ селы и со всеми пошлинами, Юрьевомъ и съ Великою Солью и со всеми пошлинами; да даю своему сыну Ивану Боровескъ со всеми волостьми и съ пути и съ селы и со всеми пошлинами, какъ было за Княземъ за Васильемъ, и Суходолъ съ Истьею и съ Истервою и съ Краснымъ селомъ, да Колугу и съ Олексинымъ и съ волостми и съ путми и съ селы и со всеми пошлинами, какъ было за Княземъ за Иваномъ за Можайскимъ; а изъ Московъскихъ селъ даю своему сыну Ивану село Островьское и съ Орининьскимъ и съ Костянтиновьскимъ и съ Молаховьскимъ и зъ деревнями, и что къ темъ селомъ потягло, да село Красное надъ великимъ прудомъ у города и зъ дворы зъ городскими, что къ нему потягло, да лугъ болшей у города, по реце по Москве. А сына своего Юрья благословляю третью въ Москве Княжею Володимеровьскою съ сыномъ своимъ съ Ондреемъ по половинамъ, а держати по годомъ; да Юрью же сыну придаю годъ въ Москве Княжь Костянтиновьской Дмитреевича; да сыну же своему Юрью даю Дмитровъ со всеми волостьми и съ путми и съ селы и со всеми пошлинами и зъ за-Московьскими волостьми, и со всемъ съ темъ, какъ было за Княземъ за Петромъ, да ему же даю Юлку и съ Юлотцькими бортники, и что къ Юлке потягло, да Серебожь, да Бускутово, да Рожественое, и со всемъ съ темъ, что къ темъ волостемъ потягло; да даю сыну же своему Юрью Можаескъ съ волостьми и съ путми и съ селы и со всеми пошлинами, и съ Медыною и что къ Медыни потягло, да Серпоховъ, да Хотунь со всеми пошлинами. А чемъ его благословила моя мати Великая Княгиня Софья, его баба, и въ душевной ему въ своей написала, Семчиньскимъ селцомъ у Москвы и зъ дворы зъ городскими и съ Самсоновымъ лугомъ, да Кжелею, да и своимъ прикупомъ селцомъ Воробьевьскимъ и съ Семеновьскимъ и зъ деревнями, да на Похре селомъ Мячковымъ и съ Фаустовьскимъ, и съ Лодыгинымъ и съ Федоровымъ Левонтьева, и съ Тяжынымъ и съ рыболовлими деревнями; а исъ Коломеньскихъ селъ Велино, Кривцово, Бронниче, Чевырево, Марчюково, да Рожекъ, да починокъ у Щелина озера; а изъ Юрьевъскихъ селъ Турабьевъские села все, да Кучка, да Деревенка, да Шадрино, ино то его и есть; да къ темъ селомъ къ Турабьевъскимъ придалъ есмь ему свое соло Шипиловъское со всемъ; а на Костроме дала ему его баба села Качаловъское, да Ушаковъское, да Святое село; а на Вологде Масленьские села, да Янгосарьские, да Говоровъские села, и что къ нимъ потягло, ино то его и есть. А въсхочетъ мой сынъ Иванъ у своего брата у Юрья выменити Коломеньские села, и сынъ мой Юрьи те села ему променитъ; а Иванъ сынъ выменитъ у своего брата [29] те села, а его не изобидитъ. А сына своего Ондрея благословляю, даю ему съ старешимъ его братомъ съ Юрьемъ треть въ Москве Княжу Володимерову по половинамъ, а держати по годомъ; да даю ему Углече со всеми волостми ж съ путми и съ селы и со всеми пошлинами, и съ Устюжною и съ Рожаловымъ, и съ Велетовымъ и съ Кистьмою, и со всемъ съ темъ, какъ было за Княземъ за Дмитреемъ за Шемякою; да даю ему Бежытцки верхъ и съ волостьми и съ путми и съ селы и со всеми пошлинами, да Звенигородъ съ волостми и съ путми и съ селы и со всеми пошлинами, а у Москвы село Сущевъское и зъ дворы зъ городскими, что къ нему потягли. А чемъ его благословила баба его Вышелесомъ, ино то его и есть. А сына своего Бориса благословляю въ Москве годомъ Княжымъ Ивановымъ Можайскаго, да въ городе на посаде дворы около святого Егорья каменые церкви, Марьиньские Федоровы; да даю ему Ржеву съ волостьми и съ путми и съ селы и зъ бортью и со всеми пошлинами; да даю ему Волокъ съ волостьми и съ путми и съ селы и со всеми пошлинами, да Рузу съ волостьми и съ путми и съ селы и съ пошлинами. А что его благословила моя мати Великая Княгини Софья, а его баба, на Волоце Белеутовъскими селы, Спасьскимъ селомь и зъ деревнями, да на Издетемле Окорокавъскими селы, ино то ему и есть. А что ему дала Марья Федорова Голтяева на Коломне села Проскурниковъские, да Веденьские и зъ деревнями, и на Городне деревня, и на Москве за Похрою Розсудовъские села Зверевъское и Борановъское, и иные селца и зъ деревнями и съ пустошми, и въ Володимере Симизиньские села и Лазарьское и Котязино, и что къ темъ селомъ потягло, какъ было за Марьею; да у города у Володимеря Евнутьевъское село, да на Костроме на Волзе Нижняя слобода со всеми деревнями, да Базеевъское, да Мануиловъское и зъ деревнями, да на Вологде Турандаевъское, да Понизовное, да Ковылиньские села, да Горка, да на Шоме деревни, да у Москвы село Шарапово зъ деревнями, да Лошаково зъ деревнями, да лугъ на реце на Москве подъ Крутицею, да въ Берендееве село Ростовцовъское зъ деревнями, да въ Кинеле Суровцово, да Тимофеевъское, да Микульское, ино то его и есть; да что ему дала Марья же дворъ свой внутри города на Москве, ино то его и есть. А сына своего Андрея меншого благословляю въ Москве годомъ Княжымъ Петровымъ Дмитреевича, да у Москвы село Таниньское со всемъ, да Ясеневъское со всемъ, да Раменейцо со всемъ; да даю ему Вологду и съ Кубеною и зъ Заозерьемъ со всемъ, и что къ Вологде и хъ Кубене и къ Заозерью потягло, и съ пошлинами, да Иледамъ съ Обнорою и съ Комелою и съ Волочкомъ, да Авнегу, да Шиленгу, да Пельшму, да Бохтюгу, да Ухтюшку, да Сяму, и Отводное съ Перфушковъскими селы, да Тошну, да Янгосаръ, и со всемъ, что къ темъ волостемъ потягло. А Княгине своей даю Ростовъ и со всемъ, что къ нему потягло, и съ селы своими до ее живота; а Князи Ростовъские что ведали при мне при Великомъ Князи, ини по тому и держатъ и при моей Княгине, а Княгини моя у нихъ въ то не въступается: а возметъ Богъ мою Княгиню, и Княгини моя дастъ Ростовъ моему сыну Юрью, а онъ держитъ по тому же, какъ держала его мати; что Князи ведали свое, ине по тому же держатъ. А что ее купля городокъ Романовъ Княжо Михайлово Деева, и Княжыхъ Лвовыхъ детей, и Княже Давыдово Засекина, и усть Шокъстны, что собе купила у Князя у Семена и у Князя у Василья у Шохонскихъ, ино то ее и есть, въ то ся дети мои у нее не въступаютъ. А что были волости Заволжьские и по реце по Шокъстне Княжы Ивановы Можайского, и села его и езы, и те есмь все волости и села и деревни техъ селъ и езы далъ есмь своей Княгине, и съ Петровъскими селы Костянтиновича, да усть Углы [30] со всемъ и съ езы. Да даю своей Княгине Нерехту съ варницами и со всеми пошлинами; а и зъ Московъскихъ селъ даю своей Княгине Напрудское у города и зъ дворы зъ городскими, что къ нему потягло, да мелницю Ходыньскую съ лугомъ съ Ходыньскимъ, да опосле Княгинина живота Василисина, Ногатиньское моей Княгини и зъ дворы и со всемъ, что къ нему потягло, да Новинки; да даю своей Княгине Озерецьские села и зъ деревнями, да Михалевъское и зъ деревнями, да Олешню и зъ деревнями. А что есмь у своее Княгини взялъ село Селивановъское въ Медушахъ, да далъ къ святой Троице; и язъ въ то место даю своей Княгине села свои Лужьские и Павшинское, да деревни Петровъские Костянтинова на Истре. А изъ удела сына своего Иванова изъ Коломны даю своей Княгине волостей, городокъ Брашову и съ сельцомъ и зъ Гвоздною и съ Иванемъ, да Устьмерску, да Песочну, да Малиньские села; да даю своей Княгине село Серкизовъское и съ Мезынькою, и со всеми селци и зъ деревнями, да село Высокое и зъ деревнями и зъ бортью, да село Шкинь и зъ деревнями, и съ Федоровъскимъ селцомъ Степанова сына, и съ Свербеевъскимъ съ куплею своею, да село Лысцовъское и зъ деревнями, да Бабышово у города у Коломны, что ей дала моя мати Великая Княгини, и зъ дворы зъ городскими, что къ нему потягло, да село Чюхистово, что ей далъ Михайло Федоровичь Сабуровъ, со всемъ, что къ нему потягло; а въ Переславле даю своей Княгине село Рюминьское зъ дворы зъ городскими, да Маринину слободу, да село Доброе и зъ дворы зъ городскими, которы дворы тянули къ путнику; а въ Юрьеве даю своей Княгине село Фроловьское съ Елохомь, да Красное село, да Курчево, да Елци, да Варварино, да Кузмедемьяньское, да Голенищово, да Добрыньское, да Волъстиново, да Сорогошино, да Петровъские села Костянтинова Матфеищово, да Ворогово и съ иными селци; а въ Суздале даю своей Княгине Шокшовъ, да Давыдовъское; а на Костроме даю ей Михайловъские села Даниловы со всемъ, что къ нимъ потягло, да что ей далъ Михайло Сабуровъ Колдомъские села, ино то ее и есть; а на Устюзе даю своей Княгине къ ее купле къ Левонтьевъскому, да къ Пятницскому да къ Вондокурье свои села, село Мошемъское и зъ деревнями и съ присельи, да Дымкову сторону и зъ деревнями и съ присельи. А у сына своего у Ондрея у болшого изъ удела даю своей Княгине Елду да Кадку, да Василково зъ деревнями; а у сына своего у Бориса изъ удела даю своей Княгине Издетемлю, да Июдину слободу, да Ядрово, да во Ржеве село Ондреевъское; а у сына своего у Андрея у меншово даю своей Княгине изъ его удела Иледамъ съ Комелою и съ Обнорою. А возметъ Богъ мою Княгиню, а у которого сына въ уделе волости и села, что есмь ей подавалъ, ино тому то и есть, опроче ее купель; а что ее купли Романовъ городокъ и Шокъстна, и иные волости и села, въ которыхъ городехъ ни буди, въ томъ волна моя Княгини, опосле своего живота которому своему сыну въсхочетъ дати, ино тому дастъ. А что моя тамга Московъская, и язъ даю своему сыну Ивану треть тамги и со всеми пошлинами, а другую треть Княжу Володимерову сыну своему Юрью да Ондрею болшому по половинамъ, а третью треть даю сыну своему Борису да Ондрею меншому по половинамъ: а исъ техъ изо всехъ трехъ третей далъ есмь своей Княгине половину тамги и всехъ пошлинъ до ее живота; а по ее животе, ино отдастъ имъ ихъ жеребьи по сей духовной грамоте, какъ имъ написано. Да даю своей Княгине изъ Новагорода изъ Нижнего половину пошлинъ своихъ всехъ, какъ было за моею матерью за Великою Княгинею, да и села, которые были за моею матерью за Великою Княгинею, и со всеми пошлинами и что къ нимъ потягло, и съ Соколовъскимъ селомъ и съ Керженцомъ; а изъ [31] Мурома даю своей Княгине селцо Муромское да Шатуръ: и въ то дети мои не въступаются. А какъ почнутъ дети мои жити по своимъ уделомъ, и моя Княгини, и мой сынъ Иванъ, и мой сынъ Юрьи, и мои дети пошлютъ писцевъ, да уделы свои писци ихъ опишутъ по крестному целованью, да по тому письму и обложатъ по сохамъ и по людемъ, да по тому окладу моя Княгини и мои дети и въ выходъ учнутъ давати сыну моему Ивану съ своихъ уделовъ: а переменитъ Богъ Орду, и моя Княгини и мои дети возмутъ дань собе съ своихъ уделовъ, а сынъ мой Иванъ въ то не въступается. А где есмь ни подавалъ своей Княгине волости и села въ уделехъ детей своихъ, во чьемъ ни буди, и те волости и села данью и судомъ потянутъ къ моей Княгине, а дети мои въ то не въступаются; а волостелей своихъ, и посельскихъ, и тиуновъ, и ключниковъ и доводшиковъ судитъ моя Княгини: а которымъ есмь детемъ своимъ села подавалъ, во чьемъ уделе ни буди, ино того и судъ надъ теми селы, кому дано. А кому буду давалъ своимъ Княземъ и Бояромъ и детемъ Боярьскимъ свои села въ жалованье, или хотя и въ куплю кому далъ; ино те мои села моимъ детемъ, во чьемъ уделе будетъ, ино тому то и есть. А по грехомъ у которого у моего сына вотчины отоймется, и Княгини моя уйметъ у своихъ сыновъ изъ ихъ уделовъ, да тому вотчину исполнитъ; а дети мои изъ ее воли не вымутся. А сына своего Ивана благословляю крестъ Петровъ чюдотворцовъ, да крестъ золотъ Парамшиньской, да шапка, да бармы, да сердоличная коробка, да поясъ золотъ болшой съ каменьемъ; а сына своего Юрья благословляю икона Филофеевъская, да крестъ золотъ, что мя благословила моя мати Великая Княгини, да поясъ золотъ на червьчате ремени; а сына своего Андрея болшого, крестъ золотъ Княжь Дмитреевъской меншого съ чепечкою; а сына своего Бориса благословляю крестъ золотъ, что мя благословила моя мати Великая Княгини, коли есмь шолъ къ своей отчине къ Великому Новугороду; а сына своего Андрея меншого благословляю икона золота на изумруте. А приказываю свою Княгиню, и своего сына Ивана и Юрья, и свои меншие дети брату своему Королю Польскому и Великому Князю Литовъскому Казимиру по докончалной нашей грамоте, на Бозе и на немъ на моемъ брате, какъ ся учнетъ печаловати моею Княгинею, и моимъ сыномъ Иваномъ и моими детми. А дети свои приказалъ есмь своей Княгине: а вы дети мои слушайте своее матери во всемъ, а изъ ее воли не выступайте ни въ чемъ; а который сынъ мой не иметъ слушати своее матери, а будетъ не въ ее воле, на томъ не буди моего благословленья. А вы дети мои чтите и слушайте своего брата старейшого Ивана, въ мое место своего отца; а сынъ мой Иванъ держитъ своего брата Юрья и свою братью меншую въ братьстве, безъ обиды. А хто моихъ Бояръ иметъ служити моей Княгине, а живутъ въ уделехъ детей моихъ, и техъ Бояръ дети мои блюдутъ съ одиново. А хто будетъ моихъ казначеевъ, или хто моихъ дьяковъ прибытокъ мой отъ мене ведали, или посельскихъ или тиуновъ, или хто женился у техъ; ино те все ненадобны моей Княгине и моимъ детемъ. А хто сю мою грамоту переступитъ, ино по Евангильскому словеси: хто преслушается отца и матери, и заповеди ихъ не хранитъ, смертъю да умретъ. А у духовные сидели: отець мой духовный Архимандритъ Спасьский Трифонъ, да Симановский Архимандритъ Афонасей, да мои Бояре Князь Иванъ Юръевичъ, да Иванъ Ивановичъ, да Василей Ивановичъ, да Федоръ Васильевичъ. А грамоту сю писалъ Дьякъ мой Василей Беда.

На подлинной подписано:

Смиреный Феодосий Архиепископъ всея Русии.

К сей Грамоте привешены на шелковых снурках две восковые печати. [32]

Вторая.

+ Во имя святыя и живоначалныя Троици Отца и Сына и святого Духа, и по благословленью отца нашего Феодосиа Митрополита всеиа Руси. Се язъ многогрешный худый рабъ Божей ВАСИЛЕЙ въ своемъ смысле пишу сию душевную приписную грамоту, что есмь писалъ болшую свою душевную грамоту, дая рядъ своей Княгине и своимъ детемъ, и чего есмь въ ту свою душевную грамоту не вписалъ, и язъ въ сю грамоту въ приписную написалъ. Даю своей Княгине село свое Коломеньское и зъ деревнями и что къ нему потягло, да село Дьяковъское, что собе выменила у Княгини у Василисы, со всемъ, да селцо Хвостовъское у города у Москвы зъ дворы зъ городскими, что къ нему потягло, да лугъ Княжь Юръевъской Дмитреевича противу моего двора, и съ Юръевъскимъ лугомъ казначеевымъ, что ей далъ Михайло Сабуровъ. Да что есмь писалъ въ болшой въ своей грамоте Княгине своей Маринину слободу, а о двухъ станехъ о Ортемьевъскомъ селе зъ деревнями, да о бортницехъ и о бобровникехъ съ числяки не описано, и язъ и те два стану даю Княгине своей къ Маринине слободе. Да даю своей Княгине въ Переславле Городище зъ деревнями съ Волнинскими, да Бармазово зъ деревнями; да въ Муроме даю ей Почапъ и Заколпье, и Черсево и что къ нему потягло; да на Коломне даю ей село Оксиньское зъ деревнями. Да что ми дала Настасья Федорова Андреевича село Мячково и зъ деревнями въ куплю, а держати ей за собою до своего живота; да что ми дала дочи ее Орина Олексеева жена Игнатьевича свои села на реце на Москве въ куплю же до своего живота: и те села Настасьины и Оринины опосле ихъ живота моей Княгине; а Княгини моя по моимъ по купчимъ грамотамъ отдастъ имъ цену за те села по, ихъ душе, кому они прикажутъ опосле своего живота взяти. Да въ Можайсце даю своей Княгине село Чертановское зъ деревнями и зъ дворы зъ городскими, да Белевици зъ деревнями, да Исмейское село зъ деревнями, да мелницю подъ городомъ подъ Можайскомъ на Москве на реце, что нарядилъ ей ее же посельской Васюкъ. А что ми дала Анна Васильева жена Ивановича села свои Муромские и въ Вотскомъ Стародубе съ озеры и со всеми уходы, и язъ то даю своей же Княгине. Да даю своей Княгине села Долматовъские Юръева въ Хотуньскомъ и въ Ростунове и въ Перемышле, и съ деревнями техъ селъ и со всимъ, что къ нимъ потягло: въ техъ селехъ волна, кому хочетъ, тому дастъ опосле своего живота. А которые дети Боярьские служатъ моей Княгине, и слуги ее, и вси ее люди, холопи ее, и кому буду язъ Князь Велики темъ давалъ свои села, или моя Княгини имъ давала свои села, или за кемъ будетъ ихъ отчина или купля: и въ техъ въ своихъ людехъ во всихъ волна моя Княгини и въ техъ селехъ; а дети мои въ то не въступаются. А что дворъ Княжь Ивановской Можайского на Москве, и язъ даю его сыну своему Ивану; а что дворъ Княжь Васильевской Ярославича Княжь Володимеровской за Архангиломъ Михаиломъ, и язъ даю его сыну своему Юрью; а что ему дала дворъ баба его у святого Ивана Предтечи, и язъ тотъ дворъ даю своей Княгине; а Княжь Дмитреевской дворъ Шемякинъ даю своему сыну Ондрею болшому. А что дворы у святого Рожества Петровъ и Ивановъ и Микитинъ Костянтиновичихъ, да и за городомъ которые мои дворы отчина моя и купля, примыслъ мой и сады мои: и въ техъ дворехъ волна моя Княгини, которымъ моимъ детемъ которое дастъ, ино то тому и есть. А что дала моя мати Великая Княгини Федору Басенку на Коломне село свое Окуловское, да Репинское, а въ душевной въ [33] своей описала такъ, что въ техъ селехъ воленъ язъ ее сынъ; ино те села опосле Басенкова живота моей же Княгине. А у сее грамоты у приписные сидели: отець же мой духовны Архимандритъ Трифонъ, да Бояре мои Князь Иванъ Юрьевичь, да Федоръ Михайловичь. А грамоту сю писалъ Дьякъ мой Василей Беда. ¹

На подлинной подписано:

Смиреный Феодосий Архиепископъ всея Русии.

К сей Грамоте привешены на шелковых снурках две восковые печати.

(Перепечатано из С. Г. Г. и Д., т. I, №№ 86 и 87, стр. 202-208).

Комментарии

1. Великий Князь ВАСИЛИЙ ВАСИЛИЕВИЧЬ (Темный) скончался в Москве 27 Марта 1462 года, оставив преемником Российского престола сына своего Вел. Князя ИОАННА ВАСИЛИЕВИЧА, родившегося 22 Генв. 1440 года.