Запись о куплях Симеона II, архиепископа Полоцкого, монастырю Николы-на-Лучне

22 марта 1531 г.

† Въ имя живоначалныя Троица. Се аз, смиреный Семион, архиепископ Полотьцкы, купил есми село на Тулове святому Николе на Лучно у Филиповое жены у Соициной у Зиновии и у ее детей у Ариста да у Ленидъка: землю роленную и бортъную. с озеры, и с реками, и с устьи, река Прокшица с устьем и с езы по Ленидов рубежь, река Липница с езы, а в озере в Липне половина, а въ-строве пашня и сеножати, да Орехова лука, а три тони в озере опришнии. А в озера (В слове “озера” между третьей и четвертой буквой — отверстие в пергаменте — примерно 0,5 см) в вси пойти в Туросно озеро изъ-о-Тулова, истоки с езы. А дал есми осмьнадесять Рублев. А купил есмь селце у Петрища у скомороха туто же, а дал есми два рубли. А туто же по ряду купил есми селце у Филипца у Храпчина брата, а дал есми два рубли. А то все святому Николе на Лучно. А рубежь с Ушаны, а по великой дорозе по обе стороны земля святого Николы, а рубежь с Ушаны в ведоме. А то есми купил все не епископьскым добытком, но с собою есми принесл. А хто будеть нашь брат по нашей животе, тот бы ся не въступал в тые земли святого Николы, а то бы заведал игумен с братьею, хто будет. А земьци той земли Сава Величьковичь, Данило Олешьчиничь, Родивон Власовичь, а приказал есми дом святого Николы детем своим, бояром полотцкым и мужем полочаном всим печаловатися домом святого Николы, хто иметь обидет. А на то послуси: Василей Дмитреевичь, Григорей Патрекеевичь, Василей [204] Ондреевичь, Ленид Патрекеевичь, игумен Лученьскый Калист, скарбьник владычень Митрофан, наместник владычень Юрьи, поп Левко. А хто иметь вступатся, судить нас святая Троица на Страшном суде. А сию грамоту дал есми на съблюдения Ваську Татаринову, Герасиму Заскорчину, Ивашку Булавчину, Захарии Заскорчину. /об./ А в том же селе на Тулове на сябрех на Семенце с детьми полъчетверта рубли, на Огафонце с детьми полътретья рубли, на Щетине полтина, а бортьника дала княгини Мария в дом святого Николы и с женою и с детьми.

ГАНижО. Ф. 2013. Оп. 1. Д. 18. Л. 1. Подлинник. 210 (220)х320 мм.