№ 44

1534 г. сентября 8. Копия листа Сигизмунда I гетману Ю. М. Радзивиллу с распоряжением о соблюдении привилегий жемайтской шляхты в отношении военной службы.

/л. 1 (47)/ Жикгимонт, Бож(е)ю милостью король польский, великий князь литовский, руский, пруский, жемоитский, мазовецкий, иных.

Пану виленскому, гетману нашому навышшому, старосте городенскому, маршалку дворному, державцы лидскому и белицкому, пану Юр(ь)ю Миколаевичу Радивиловича.

Присылали до нас панове тивунове жомоитскии и теж бояре шляхта и вси подданыи наши земли Жомоитское, оповедаючи нам то, иж твоя милость росказал им гуф их жомоитский надвое розлучити и одну половину людей при собе зоставити, а другую в землю неприятельскую послати. И они деи того не хотели вчинити для тое причины, штож деи они мают в себе привилья-вол(ь)ности предков наших и наши, на которых жо деи то есть им описано, иж не мает быти николи гуф их розрыван и в землю неприятельскую посылаи, тол(ь)ко бы олиж коли гетман наш великий где у которую сторону сам своею парсуною з войском потягнул, тогды деи они там з его милостью ходити мают, якож деи они за первъших гетманов завжды водлуг твердостей своих были заховываны; однож тепере от твоей милости в том им трудность ся деет. А к тому деи многии з них перед роком, от нас [113] зложоным, до войска приехали и, што-колве живностей с собою мели, то вжо потравили, и теж деи хоробы великии на них пришли, с которых жо многии померли, а другии деи и тепере – мало не третяя часть гуфу их – немоцни суть, и кони деи теж им отмерли. И били они нам чолом, абыхмо не казали в том им трудности чинити и водле привильев-вол(ь)ностей их, которыи они в себе мают, их заховати. А так, што ся дотычет гуфу их жомоитского, мы сами то добре бачим, иж в некоторых з них у людей жомоитских кони малы суть и ку делу спешному, а звлаще на загоны, стрывати не могут; и мели бы они на такавых конех до земли неприятельское /л. 1 (47) об./ посыланы быти, выстерегамы ся того, абыхмо, чого Боже вховай, которое шкоды в том не приняли и переказы в речи нашой земской не мели.

Прото, будет ли перед тым за первших гетманов наших гуф земли Жемоитское не розлучиван и з людми передними не посылыван, и на привильях-вол(ь)ностех их естли то описано, иж они завжды мают с гетманом великим на службы наши ходити, твоя бы милость и тепере никоторое трудности им не чинил и в том во всем к ним ся заховал водле привильев-вол(ь)ностей их, которыи они на то в себе мают, абы они над обычаи стародавныи и над права свои жадного обтяженья не мели.

Писан у Вилни под лет Бож(его) нарож(енья) 1534, м(есе)ца сен(тебря) 8 день, индикт 8. ^1-Михайло писарь^-1.

Ф. 293. Д. 88. Список XVI в. Двойной лист: (20,6 + 20,6) х 32,3 см.

Нумерация (коричневыми чернилами, XVIII в.?): в верхнем правом углу проставлены числа, соответственно 47 и 48; в нижнем левом углу на л. 1(47) – номер 38. Л. 2(48) оставлен чистым.

На обороте л. 2(48): аннотация по-польски (бледно-коричневыми чернилами): Copia listu od Krola Zygmunta do P. Jerze(g)o Radziwila Hetmana, aby Zmudz przy ich wolnosciach dawnych zachowal na woynie, nie rozrywaia ich Pulku na dwoie. A[nn]o 1534.

Комментарии

1-1. Тем же почерком и чернилами, что и основной текст.