№ 43

1534 г. августа 27. Ответное послание ("отпис") Сигизмунда I гетману Ю. М. Радзивиллу на его донесение об отправке передовых отрядов в московские пределы, на Северщину, об информации, полученной гетманом от знатных перебежчиков, князя С. Ф. Бельского и И. В. Ляцкого, а также о состоянии дисциплины в литовском войске.

/л.1 (44)/ Жикгимонт, Бож(е)ю милостью король польский, великий князь литовский, руский, пруский, жомоитский, мазовецкий и иных.

Пану виленскому, гетману наш(о)му навышшому, старосте городенскому, маршалку дворному, державцы лидскому и белицкому, пану Юрью Миколаевичу Радивилу.

Поведаем твоей милости, иж есмо з Божее ласки поспол с королевою нашою и великою княгинею ее милостью Боною, и с сыном нашим его милостью Жикгимонтом Августом, молодым королем и великим князем, и с королевною в добром здоровьи.

Што твоя милость пишеш(ь) до нас, иж што первей сего писал твоя милость к нам, поведаючи, же скоро по шиху войска отправил был твоя милость з людми передовыми воеводу киевского пана Андрея Якубовича Немировича а конюшого наш(о)го дворного пана Василья Богдановича Чижа к Быхову, а оттол(ь) мели они вже пойти в землю Московского; и кгды вже тая реч(ь) так была справена, принесена до твоей милости весть от державцы Мстиславского пана Юрья Юрьевича Зеновьевича, ижбы люди великии Московского к Смоленску пришли, а иншии перед ними на границах мстиславских были; и так твою милость справовал, якобы то певная а неотменная реч(ь) была. И твоя милость, то слышачи и выстерегаючися того, абы тыи люди Московского в панство нашо не вторгнули и шкоды которое не вчинили, оных людей, которых был наперед с паном воеводою киевским а с паном Чижом послал, зася вернул, а послал их к Буиничом, и сам за ними з войском ся поспешил. И будучи твоей милости у селе волости Любошанское у Дулебах (тогды, кгды ся твоя милость о людех и о справе земли Московское доведал с повести князя Семена Федоровича Белского ^1-а Ивана Лядцкого^-1, которыи на имя нашо господарьское з земли Московъского /л. 1 (44) об./ приехали), и вчинивши обмову и пораду с паны радами нашими, и зрозумевши тот обычай, яко бы твоя милость мог нам налепей послужити, в середу первшую по святе внебовзятья панны Марии отправил твоя милость пана воеводу киевского а пана Василья Чижа з войском, з людми передовыми, под Стародуб и под иншии замки в землю Московского, к Северу. И яко мають там з людми нашими поступовати, о том о всем им твоя милость науку дал. И пишеш(ь) твоя милость, ижбы вже давно тыи люди наши в земли Московского были, коли бы оныи новины о людех [110] Московского от пана Зеновьевича на переказе не были. Чому ж ся не треба дивити, же тыи новины переказу твоей милости в послузе нашой вчинили: бо там, яко на украине, кождого часу новины, а врядники украиныи как о певных, так и не о певных новинах, скоро што послышавши, тогды повинни без мешканья твоей милости ведомо давати. А так вже на то не потреба ничого бачити, што ся так стало. А што ся дотычет того, што твоя милость пана воеводу киевского а пана Чижа з людми в землю неприятеля наш(о)го Московского послал и которым обычаем мают ся они там з людми нашими справовати, о том твоя милость в листе своем до нас выписал. И мы тому с писанья листу твоей милости достаточне зрозумели и за то твоей милости дякуем, же твоя милость на речь посполитую земскую великую пилность и бачность маеш(ь) и тых людей наших без мешканья там отправил. При том што пишеш(ь) твоя милость до нас и лист державцы мстиславского пана Юрья Юрьевича Зеновьевича, до твоей милости писаный, прислал, где ж пишет, иж которых людей для языков /л. 2 (45)/ под Смолнеск посылал, тыи люди наши на одиннадцать сот людей Московского наголову поразили, а инших живых добрых людей поимали, – мы, то слышачи, вдячне то от твоей милости приймуем и с того велико милого Бога хвалим, и его св(я)тое милости просим, абы и тым, которых твоя милость ² с паном воеводою киевским а с паном Чижом отправил, также рачил ласку свою святую дати.

К тому, што пишеш(ь) до нас о князи Семене Федоровичу Белском а Иване Лядцком и о инших, которыи с ними на нашо имя господарьское к нам приехали, иж кгды там у твоей милости были, тогды многии речи перед твоею милостью поведили, о чом же твоя милость широко в листе своем до нас выписал: и мы оным речам всим достаточне з листу твоей милости вырозумели, и то нам ест велико вдячне от твоей милости, же твоя милость наперед, за часу, поки они ещо до нас не приехали, о том дал нам знати. И так ся нам бачит, иж подобно тое приеханье их с пожиточным нашим и земским будеть. И как они к нам приедут, и што с них вырозумеем, о том о всем твоей милости, пану а раде нашой, без мешканья ведомо дадим.

Теж што твоя милость пишеш(ь), иж многии люди з войска наш(о)го по пописе, перед шихом и после шиху, а наболей Белского повету, проч отъехали, а которыи ест, тыи силное непослушенство ку твоей милости мают и от твоей милости далеко ся [111] становят; а жомойть как твоя милость видел у Юрьевичох на шиху, после того их твоя милость не видал и не ведаеш(ь), где суть, одно ж слышиш(ь), же сторонами идуть и шкоды великии подданым нашим делают: абыхмо твоей милости науку нашу дали, што бы твоя милость мел с тым чинити. Ино веджо мы на отправе дали твоей милости науку нашу, и ведаеш(ь) твоя милость, яко ся маеш(ь) водле науки нашое с таковыми непослушными справовати. А так о жомойт казали есмо до того старшого их, до Адама, писати, приказуючи, /л. 2 (45) об./ ижбы они вси при твоей милости были, и по сторонам от твоей милости далеко не лежали, и были твоей милости послушни во въсем. А што ся тькнеть инших поветов, и твоя бы милость казал всих хоружих перед себе собрати и тому опыт и обыск вчинити и достаточне ся того доведати. И хто будеть сам своволне з войска отъехал, або будут ли хоружии сами кого отпустили, тых всих, которыи ся водле попису твоей милости не укажуть, абы твоя милость казал их кождого с них на имя пописати и тыи реистра до нас прислал; а мы вже водле оного реистру твоей милости пошлем до кождого в дом и кажем их за горла имати и так карати, яко на таковых, хто бы з войска зъехал, в правех ест описано.

Писан у Вилни под лет Бож(его) нарож(енья) 1534, м(есе)ца августа 27 день, индикт 7.

Ниже, перпендикулярно к тексту письма, – адрес (см. легенду к документу). /л. 3 (46)/

Также ³, пане гетмане, што есмо на он час, отпускаючи от нас, с твоею милостью намовляли, ижбы твоя милость, списавши и зшиховавши войско нашо въсе, реистра свои до нас прислал; и твоя милость тых реистров до нас не прислал аж и до сих часов. А прото абы твоя милость и тепер тыи реистра попису и шиху войска нашого списал и тыи реистра за печатью своею к нам прислал без всякого омешканья, бо мы хочем, ижбыхмо о том войску почот достаточне ведали и с тых реистрев твоей милости зрозумели, естли теж сполна водле попису земского кождый там выехал.

Нумерация (XVIII в.?): в верхнем правом углу каждого листа проставлены, соответственно, числа 44, 45 и 46; в нижнем левом углу (другими чернилами): на л. 1(44) – номер 36, на л. 3(46) – 37.

На обороте л. 2 (45): У правого края – овальная красновосковая печать (1,9 см по горизонтальной оси) под кустодией, с изображением польского орла на щите и буквами S.D.S. вверху; справа от нее – скрепа (крупно, размашисто, более яркими, чем основной текст, коричневыми чернилами): Горностай подскарбий земс(кий), В середине, перпендикулярно к тексту документа, – адрес: Пану виленскому, гетману наш(о)му на вышшому, старосте городенскому, маршалку дворному, державцы лид скому и белицкому, пану Юрью Миколаевичу Радивилу. Ниже, отступя: Отпис. Между адресом и этой записью – аннотация по-польски: List Krola Zygmunta do P. Radziwila, Pana Wilenskiego, Hetmana W^o X^a L^o, o sprawach woienych Moskyewskich. A(nn)o 1534 ⁴. Ниже – архивная помета XVIII в.: № 37. Fasc: 2. Woiennych.

Комментарии

1-1. В ркп. подчеркнуто.

2. В ркп.: милости.

3. Приписка на отдельном листе-вкладыше.

4. Год в ркп. подчеркнут.