№ 32

1534 г. июля 9. Лист Сигизмунда I гетману Ю. М. Радзивиллу с сообщением о получении вестового листа от мстиславского державцы Ю. Ю. Зеновьевича, копию которого король при сем прилагает.

Жикгимонт, Бож(е)ю милостью король польский, великий князь литовский, руский, пруский, жомоитский, мазовецкий и иных.

Пану виленскому, гетману нашому навышшому, старосте городенскому, маршалку наш(о)му дворному, державцы лидскому и белицкому, пану Юрью Миколаевичу Радивиловича.

Поведаем твоей милости, иж есмо з ласки Божее поспол с королевою нашою ее милостью и великою княгинею Боною, и з сыном нашим Жикгимонтом королем и великим князем молодым, и с королевною их милостью в добром здоровьи.

Затым поведаем твоей милости, иж сего дня, в четвергь, м(есе)ца июля девятого дня, принесен к нам лист от державцы Мстиславского пана Юрья Юрьевича Зеновьевича, в котором к нам пишет, иж тыми разы, у вилию св(я)того Петра, приехали там до Мстиславля дети боярскии помещики великого князя з Смоленска, которыи поведили запевне, иж молодого князя великого Московского и брата его, князя Василья, обеюх их в животе не стало. Якож мы с того листа его, писаного к нам, казали копею списати и до твоей милости, зашивши в сем нашем листе, послали. Прото абы твоя милость тую копею казал перед собою вычести и, зрозумевши с нее, в том бы твоя милость пораду свою нам дал, яко быхмо мы в том мели поступовати и которым способом дело нашо господарьское напротивку тому неприятелю нашому Московскому провадити. И што бы ся твоей милости видело, твоя бы милость о том к нам в листе своем черес того дворянина наш(о)го без мешканья отписал.

Писан у Вилни под лет Бож(его) нарож(енья) 1534, м(есе)ца июля 9 день, индикт семый.

Лист пронумерован: в правом верхнем углу – номер 27, в левом нижнем – 24. Лист был сложен в виде пакета, оборотной стороной наружу.

На обороте листа: У правого края – след красновосковой печати, рядом скрепа (теми же коричневыми чернилами, которыми написан основной текст): Горностай подскарбий зем(ский). В центре получившегося конверта – адрес (написан жирными темно-коричневыми чернилами): Пану виленскому, гетману нашому навышшому, старосте городенскому, маршалку нашому дворному, державцы лидскому и белицкому, пану Юрью Миколаевичу Радивиловича. Ниже – аннотация по-польски: List Krola Zygmunta do P. Jerze(g)o Radziwila, Hetmana W^o X^a L^o, ze Kniaz Moskiewski у brat ie(g)o umarі, o rada: со czynic. A(nn)o 1534.