№ 8

1529 г. февраля 16. Лист Сигизмунда I виленскому каштеляну, старосте городенскому Ю. М. Радзивиллу о выставлении на службу с имений его бояр и урядников, а также с его собственных имений необходимого числа конных и об уплате чрезвычайного налога – в соответствии с нормами, установленными Виленским вальным сеймом.

/л. 1(3)/ Жикгимонт, Бож(е)ю милостью король польский, великий князь литовский, руский, пруский, жомоитский, мазовецкий и иных.

Пану виленскому, старосте городенскому, маршалку нашому дворному, державци лидъскому и белицкому, пану Юр(ь)ю Миколаевичу Радивиловича.

Што есмо первей сего, будучи з вашою милостью, со всими паны радами нашими, на великом валном сойме у Вилни, умыслили пописати всих подданых наших великого князства литовского: бояр, шляхту и их всих людей и теж всих подданых вашое милости, с чого бы мела оборона земская напротивку неприятелев наших уставена быти. Як вжо тыи реистра всих подданых наших и теж подданых вашое милости к нам принесены, которых жо мы з вашою милостью радами нашими, зрозумевши, ухвалили и установили оборону земскую тым обычаем: хто з бояр наших будет в себе мети людей своих осмъдесят служоб, тот мает ку службе земской ехати сам-десят з добрыми молодцы конно а збройно; а хто людей своих будет в себе мети сорок служоб, тот повинен будет ехати сам-пят з добрыми пахолки такжо конно а збройно; а хто будет мети осм служоб людей своих, тот будет повинен ехати сам-один конно а збройно. А которыи бы с шляхты не мели осми служоб людей своих суполных, а мел бы людей своих шесть або пять служоб и мней, бы [58] пак теж и ни ¹ одного человека которыи не мели, – однако ж тыи вси повинни будут сами з домов своих на службу нашу и земскую ехати водле можностей своих. А так теж кождый з вашое милости панов рад наших тым почтом повинни на войну ку обороне земской, коли потреба вкажет, ехати; а княгини, и пании, и боярини-вдовы – выправляти; и каждый мает ставити с осми служоб людей своих пахолка доброго в сукни цветной, не в сермязе, на котором бы был панцер добрый, а прилбица, а меч, а павеза, а древцо с прапором цветным; а конь бы был под ним в чотыри копы грошей. А што ся дотычет слуг путных, и данников, и подляшских служоб, и мест влочных, – тых всих, хто их колко будет мети, – в тот жо почот з людми тяглыми весполок мают ку службе земской зровновати и с них службу земскую служити водле уставы земское вышеписаное. А прото штобы твоя милость рачил всим бояром и врядником своим грозне росказати, жебы от того часу водле тое уставы нашое службу земскую служили, и за часу к тому ся справовали, и поготову были на кождый час конечно. А хто бы колвек з ыменей и з людей своих службы земское водле тое уставы и ухвалы нашое не служил, таковый тратит именье свое на нас, господаря.

Такжо видилося ² нам и теж вашой милости всим паном радам нашим для заплаты служебным за их службу и для выкупленья замков, и дворов, и волостей наших господарьских положити плат /л. 1(3) об./ на всих подданых наших великого князьтва: яко на наших людех господарьских путных и тяглых, так теж на людех вашое милости всих рад наших духовных и светцких, и князьских, и панских, и боярских – в тот обычай, иж кождый з вашое милости князь и пан, духовный и светцкий, и вся шляхта, бояре наши, мают нам дата со всих людей своих путных и тяглых, и з данников, и з влок подляшских, пущаючи ровно как тяглого и путного человека, и данника одного, и влоку одну с тяглою службою заодно, с чого мают дати с коня, то есть с осми служоб людей, плату полторы копы грошей: с кождое службы людей – одиннадцать грошей и полтретя пенязя. А хто бы не мел людей своих осми служоб, а мел бы их шесть або пять и мней, бы теж и одного человека в службе мел, тогды повинен с кождое службы дати одиннадцать грошей и полтретя пенязя. А хто с шляхты людей своих ни одного человека не будет мети, тот плату не повинен дати ничого.

Так теж што ся дотычет мест вашое милости князьских и панских, и всее шляхты, и мест не влочных, и теж бояр их и слуг [59] дворных, которыи домки свои мают, и к тому огородников – яко от тое службы земское, так теж и от тых платов нынешних с того почту тяглых людей выписаных выймуем, кром тых мест подляшских, в которых будут мещане влоки свои мети – с таковых мест з влок повинни службу земскую панове их заступовати и тот плат нашь выдати. А што ся дотычет мещан, которыи влок не мают, а на огородех и на малых землицах седят, – с тых службы а никоторого плату быти не мает.

А так штобы твоя милость врядником своим всим рачил пилне приказати, абы в том обыск великий вчинили: естли будут вси подданыи твоее милости путныи и тяглыи, и теж люди твоее милости бояр справедливе пописаны, на тых бы твоя милость и тепер(ь) казал тым же врядником своим ³ тот плат нашь, без мешканья водле тое вышеписаное уставы нашое выбравши, и в целости до скарбу нашого отнести ⁴. А рок твоей милости покладаем тыи пенязи до скарбу нашого отослати – по сем пришлом святе, по Велице дни, у двух неделях, конечно. И нехай бы тыи врядники твоее милости перед подскарбим⁵ нашим земским присягу вчинили на том, иж яко перво всих людей твоее милости путных и тяглых, и мещан, и людей бояр твоее милости справедливе пописали; так теж тот плат нашь справедъливе на всих людех твоее милости и боярских /л. 2(4)/ выбрали водле тое уставы нашое, никому не фолкгуючи а ни одного человека не крыючи.

А што ся дотычет всих именей твоее милости отчизных, и купли, и выслуг, – мы подле попису реистров казали вси именья твоее милости осумовати: ино с тых всих сум водле уставы нашое и ухвалы земское маеш(ь) твоя милость ставити ку обороне земской с дву тисяч и с осмидесят и с трех служоб двесте и шестьдесят коней и три службы назвыш. А плату с тых людей и коней маеш(ь) твоя милость до скарбу нашого дати триста и девеносто коп и полкопы и три гроши и пол-осма пенязя. Теж што ся дотычет именья вашое милости Липска, которое твоя милость с паны воеводичи маеш(ь) ещо не в поделе, с того именья ку службе земской маеть ставено быти с четырехс[о]т ⁷ и с се[ми]десят ⁶ и с четырех служоб пят(ь)десят и девят(ь) коней и две службе назвыш. А плату з них осмъдесят коп, осм коп и пят(ь)десят грошей и полтретя пенязя. И твоя бы милость вжо подле тое уставы нашое и ухвалы земское по той суме коней з ыменей своих ку службе земской ставил и тую [60] суму пенязей со всих именей своих, на рок положоный собравши, и до скарбу нашого казал отдати.

Писан у Вилни под лет Божего нарож(енья) 1529, м(есе)ца фев(раля) 16 день, индикт 2.

Двойной лист был сложен втрое; линии сгиба кое-где прорвались. Оборот листа 2(4): Вверху – помета выцветшими коричневыми чернилами (ХVI в.): до пана старосты городенского. Ниже – аннотация по-польски (беглой скорописью): List krolewski ^7-do Р. Jerze(g)o Radiwila, starosty grodzienskiego^-7, o sіuzbe woienna: iako maia sluzic szlachta, у z wielu poddanych co stawic, у koс iaki ma byc od kop 4, у pobory postanowione na obrone R. Ptej w Roku 1529 ⁸. Слева, вдоль края (по вертикали) выскоблена одна строка; по размеру она соответствует обычному шифру Радзивилловского архива.

Комментарии

1. ни – написано над строкой.

2. В ркп. в этом слове пропущена буква "л".

3. В ркп. ошибочно: своих.

4. В ркп.: отнесли.

5. В ркп. в этом слове пропущена буква "д": поскарбим.

6-6. Бумага прорвана на сгибе. Восстановлено по смыслу.

7-7. Написано над строкой.

8. Год подчеркнут в ркп.