№ 15

1532 г. сентября 15. Лист Сигизмунда I гетману Ю. М. Радзивиллу с запретом нарушать владельческие права королевы Боны на присужденные ей земли, мост и церковь.

Жикгимонт, Бож(е)ю милостью король польский, великий князь литовский, руский, пруский и жомоитский, мазовецкий, иных.

Пану виленскому, гетману навышшому великого князства, старосте городенскому, маршалку наш(о)му дворному, державци лидскому и белицкому, пану Юрью Миколаевичу Радивиловича. [68]

Мовила нам королевая наша ее милость и великая кн(я)гиня Бона о том, штож которыи земли и церковь св(я)того Спаса, и мост на Котры, и перевоз на Немне тыми разы комисары к двору ее милости жорославскому отъехали, ино деи твоя милость черес оный суд комисарский тых земль и церкви св(я)того Спаса, и мосту на Котре, и перевозу на Немне моцно ¹ боронити хотячи, то пред ся к двору своему Котры мети. Ино, пане виленский, рачи твоя милость на то бачити, иж которыи розъезды межи вашею милостью паны радами або поддаными нашими коли бывают, а што с права кому будет присужоно, тогды то завжды бывает держано, а нам, господару, вышшое право есть; и про што бы теж то, што вжо есть королевое ее милости присужоно, не мело держано быти. Прото штобы твоя милость в тыи земли и в церьков(ь) св(я)того Спаса, и мост на Котры, и в перевоз на Немне, што вжо комисары ее милости к тому двору отъехали, ничим ся не вступовал и дал тому впокой ². Нехай бы вжо то было держано водле отъеханья комисарей ее милости, а то твоей милости приказуем под закладом нашим десятма тысячма копами грошей.

Писан в Кракове под лет Бож(его) нарож(енья) 1000 пятьсот 32, м(есе)ца сен(тебря) 15 день, индикт 6.

^3-Справа пана Михаила писара.^-3

Комментарии

1. Написано после, зачеркнутого: моц.

2. Последняя буква исправлена из "р".

3-3. Запись сделана тем же почерком, что и основной текст.