Покончаша промежу собя посадники великого конца Славенского, и бояре, и житьи люди, и весь великiи конецъ Славенскiи, и пожаловаша игумена АлексЪя и старцовъ святаго Вознесенiя. Что дали посадники Федоръ Тимофеевичь, и Иванъ Александровичь и старшiе посадники, и тысяцкiи землю кончанскую СавЪ старцу, а ободъ тое земли по сеи грамоте: отъ МедвЪжьи Головы, отъ ручья, возли рЪки въверхъ по ВЪшерЪ черезъ Глинецъ до Кружильского ручья, по ручью по Кружильскому въверхъ въ другую вЪть ручья въверхъ, съ верховеи ручья налЪво въ мохъ, мхомъ, недошедъ Паснои горки, черезъ лющикъ прямо въ мохъ, мхомъ къ сорочинЪ, отъ сорочинъ черезъ чистыи мохъ ко кресту, отъ креста черезъ лющикъ по черную лозу на устьЪ, съ устья ручья въ Вишеру рЪку до тои же МедвЪжье Головы. А та землица святому Вознесенiю въ Савину пустыню. А стояти за ту землю и за игумена и за старцовъ посадникомъ, и тысяцкимъ, и боярамъ, и житьимъ людемъ, и всему господину Славенскому концу. А посуловъ не имать по крестному цЪлованiю дому ради святаго Вознесенiя. А кто почнетъ имать у чернецовъ у вознесенскихъ посулъ или у того, кто обидитъ святое Вознесенiе, ино богъ на того и святое Вознесенiе и святыи Павелъ.