Се езъ князь великыи Изяславъ Мьстиславичь, по благословению епискупа Нифонта, испрошавъ есми у Новагорода святому Пантелеимону землю село Витославиць и Смердъ и поля Ушьково и до прости. А заводъ тои земли отъ Юрьевскои ораницы простью ввьрхъ, и съ прости возлЪ Ушьковскую ораницу по вьрхнеи сторонЪ да направо въ логъ, логомъ по вьрховью Мячина и Мячиномъ вънизъ по вешьнюю воду и Добрыни улици къ Образу святому, отъ Добрыни улицЪ Мячиномъ ввьрхъ подълЪ рель да налЪво въ Великыи ручеи, ручьемъ ввьрхъ подълЪ княжую рель до Юрьевского межьника, чьто крьстъ стоить подъ межьникомь, отъ Юрьевского межьника логомь подълЪ Юрьевскую рель, да подълЪ Юрьевскую ораницю логомь да по конець логу промежь ораницы Юрьевскои Ушькова поля да въ прость. А въ тое земли, ни въ пожьни, ни въ тони не въступатися ни князю, ни епискупу, ни боярину, ни кому. А кто почьнеть въступатися въ тое землю, и въ воду, и въ пожьни или князь или епискупъ, или хто иметь силу дЪяти, и онъ въ второе пришьствие станеть тяжатися съ святымъ Пантелеимономъ.