Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

77

1470—1471гг. — Договорная грамота короля польского и великого князя литовского Казимира IV с Великим Новгородом

Список конца XV — начала XVI в.; перед текстом: Списокъ с доконченные, что были написали собЪ ноугородци с королiмъ лЪта восмьдесять (Так в списке.) девятого. ГПБ, Сборник 0. IV. 74, лл. 24—27 об.

ААЭ, I, № 87.

Основание датировки: ААЭ, I, прим. 38; Соловьев, История, I, стб. 1358—1359. [130]

Се язъ честны король полскiи и князь великi литовьскiи докончялъ есми мiръ с нареченнымъ на владычьство съ Феофiломъ, и с посадники новогородцкiми, и с тысяцкими, и з бояры, и съ житьими, и с купцi, и со всЪмъ Великимъ Новымъгородомъ. А прiехаша ко мнЪ послове от нареченаго на владычьство Феофила, и от посадника степенного, и от тысяцкого степенного Васiлья Максiмовичя, и от всего Великого Новагорода мужеи волныхъ посадникъ новогородцкiи Офонос Остафьевичь, посадникъ Дмитреи Исаковичь, и Иванъ Кузминъ, сынъ посадничь, а от житьихъ Панфiлеи Селiфонтовичь, Кiрiло Ивановичь, Якимъ Яковличь, Яковъ Зiновьевичь, Степанъ Григорьевичь. Докончялъ есми с нимi миръ и со всЪмъ Великимъ Новымъгородомъ, с мужi волными. А держати ти, честны король, Великi Новъгородъ на сеи на крестнои грамотЪ. А держати тобЪ, честному королю, своего намЪстника на ГородищЪ от нашеи вЪры от греческои, от православнаго хрестьянства. А намЪстнику твоему без посадника новогородцкого суда не судити. А от мыта (В списке: а от мЪста.) кунъ не имати. А Великому Новугороду у твоего намЪстника суда не отъимати, опричь ратнои вЪсти и городоставленiа. А судiти твоему намЪстнику по новогородцкои старiнЪ. А дворецкому твоему жiтi на ГородiщЪ на дворцЪ, по новогородцкои пошлiнЪ. А дворецкому твоему пошлiны продавати с посадникомъ новогородцкiмъ по старiнЪ, с Петрова днi. А тиуну твоему судити в одрiнЪ с новогородцкiми приставы. А намЪстнику твоему, и дворецкому, и тiуну быти на ГородiщЪ в пятiдесяти человЪкъ. А намЪстнику твоему судiти с посадникомъ во владычнЪ дворЪ, на пошломъ мЪстЪ, какъ боярiна, такъ и житьего, такъ и молодшего, такъ и селянiна. А судiтi ему в правду, по крестному цЪлованью, всЪхъ равно. А пересудъ ему иматi по новогородцкои грамотЪ по крестнои, протiву посадника; а опричь пересуда посула ему не взятi. А во владычень судъ и в тысяцкого, (В списке: тысяцеого.) а в то ся тебЪ не вступатi, ни в манастырскiе суды, по старiнЪ. А поидетъ князь великi московскiи на Велики Новъгородъ, илi его сынъ, илi его братъ, или которую землю подъиметъ на Великi Новъгородъ, ино тебЪ нашему господину честному королю всЪсти на конь за Великi Новъгородъ и со всею съ своею радою лiтовскою противъ великого князя, и боронитi Великi Новъгородъ. А коли, господине честны король, не умиривъ Великого Новагорода с великимъ княземъ, а поЪдешь (В списке: поЬдешъ.) в Лятцкую землю илi в Немецкую, а бес тебе, господине, поидетъ князь великi, или его сынъ, или его братъ, илi кою землю подоиметь на Великi Новъгородъ, ино твоеи радЪ лiтовскои всЪсти на конь за Великi Новъгородъ, по твоему крестному цЪлованiю, и боронити Новгородъ. А что Ржова, и Великiа Лукi, и Холмовски погостъ, четырЪ [131] перевары, а то земли новгородцкiе; а в то ся тебЪ, честному королю, не вступати, а знати тебЪ своя черна куна, а тЪ земли к Великому Новугороду. А РжевЪ, и Лукамъ, и Холмовьскому погосту, и инымъ землямъ новгородцкимъ и водамъ от Лiтовскои землi рубежь по старiнЪ. А сведется новгородцу (В списке: новгородцку.) судъ в ЛитвЪ, ино его судiтi своимъ судомъ, а блюсти новгородця какъ и своего брата лiтвiна, по крестному цЪлованью. А сведется судъ литвину в Великомъ НовЪгородЪ, ино его судити своимъ судомъ новгородцкимъ, а блюстi его какъ и своего брата новгородця, по крестному целованiю тако ж. А сведется поле новгородцу с новогородцомъ, (В списке: новогородцкомъ.) ино намЪстнику твоему взяти от поля гривна, а двЪма приставомъ двЪ денгi; а учну[тъ] ходити за сречкою на поле, ино взяти твоимъ приставомъ двЪ денгi. А в РусЪ тi имати за проЪжжеи судъ, черезъ годъ, сорокъ рублевъ, а держати ти десять варниць в РусЪ; а в Водцкои землЪ имати ти за проЪжжеи судъ, через годъ, тритцять рублевъ; а в ЛадогЪ ти пятнадцять рублевъ; а с Ыжеры два рубля; а с Лопци рубль, за проЪжжеи судъ, черезъ годъ. А по инымъ волостемъ по новогородцкимъ имати тобЪ пошлiны по старiнЪ, а Новугороду пошлинъ не таити, по крестному цЪлованiю. А вывода ти, честны король, из Новогородцкои отчiны не чiнити, а челяди не закупати, ни даромъ не примати. А подводъ по Новогородцкои отчiнЪ не имати ни твоимъ посломъ, ни твоему намЪстнiку, ни иному никому ж в твоеи державЪ. А черна куна имати ти по старымъ грамотамъ и по сеи крестнои грамотЪ. А на Молвотицяхъ взяти ти два рубля, а тiуну рубль за петровщину; а на КунскЪ взяти ти рубль; а на Стержи трiтцять куниць да шестьдесятъ бЪлъ; а с Моревы сорокъ куниць да восмьдесятъ бЪлъ, а петровщины рубль, а в осенiнЪ полрубля; а в ЖабнЪ дватцеть куниць да восмьдесятъ бЪлъ, а петровщiны рубль, а медъ и пiво с перевары по сiлЪ; а на Лопастiцяхъ и на Буицяхъ у чернокунцовъ по двЪ куници и по двЪ бЪлi, а слугами бЪла; а на Лукахъ нашь тiунъ, а твои другои, а судъ имъ наполы; а торопецкому тiуну по Новогородцкои волостi не судiтi; а в ЛубоковЪ и в Заклинье по двЪ куници и по двЪ бЪлi, а петровщины сорокъ бЪлъ; а во Ржевъ по двЪ куници и по двЪ бЪлi, а с перевары медъ, пиво по сiлЪ. А в новогородцкихъ волостехъ, ни на ДЪмонЪ, ни на ЦснЪ, ни на ПолоновЪ не надобЪ иное ЛiтвЪ ничто ж, ни черны куны не брати. А иныхъ пошлинъ тобЪ, честны король, на новгородцкiе волостi не вкладывати через сiю крестную грамоту. А сведется вiра, убьютъ сотцкого в селЪ, ино тебЪ взяти полтiна, а не сотцкого, ино четырЪ гривны, а намъ вiръ не таити в НовЪгородЪ; а о убiствЪ вiръ нЪтъ. А что волости, честны король, новгородцкiе, ино тебЪ не держати [132] своими мужи, а держати мужми новогородцкими. А что пошлина в Торжку и на ВолоцЪ, тiвунъ свои держати на своеи чястi, а Новугороду на своеи чясти посадника держатi. А се волости новогородцкiе: Волокъ со всЪми волостми, Торжокъ, БЪжiцi, Городець (В списке Городець отделено от Палець точкой.) Палець, Шiпинъ, Мелеця, Егна, Заволочье, Тиръ, Пермь, Печера, Югра, Вологда с волостмi. А пожни, честны король, твои и твоихъ мужъ, а то твои; а что пожни новогородцкiе, а то к Новугороду, какъ пошло. А дворяномъ з Городищя и извЪтникомъ позывати по старiнЪ. А на Новгородцкои землЪ тебЪ, честны король, селъ не ставити, ни закупати, ни даромъ не примати, ни твоеи королевои, ни твоимъ дътемъ, ни твоимъ княземъ, ни твоимъ паномъ, ни твоимъ слугамъ. А холопъ или роба, или смердъ почнетъ на осподу вадити, а тому ти, честны король, въры не няти. А купець поидетъ [во свое сто], (Срезано здесь и далее при переплетании рукописи.) а смердъ потянетъ в свои потугъ к Новугороду, какъ пошло. А приставовъ тебЪ, честны король, не всылатi во всЪ волости новогородцкiе. А у нас тебъ, честны король, вЪры греческiе православные нашеи не отъимати. А гдЪ будетъ намъ, Великому Новугороду, любо в своемъ православномъ хрестьянствЪ, ту мы владыку поставимъ по своеи воли. А римскихъ церквеи тебЪ, честны король, в Великомъ НовЪгородЪ не ставiти, ни по пригородомъ новогородцкимъ, ни по всеи земли Новогородцкои. А тiуну твоему в Торжку судити судъ с новогородцкимъ посадникомъ; такожъ и на ВолоцЪ, по новогородцкои пошлинЪ, новгородцкимъ судомъ; и виры и полевое по новгородцкому суду. А что во ПсковЪ судъ и печять и земли Великого Новагорода, а то к Великому Новугороду, по старiнЪ. А умиришь, господине честны король, Великi Новъгородъ с великимъ княземъ, ино тебЪ взяти честному королю черны боръ по новогородцкимъ волостемъ по старiнЪ одiнова, по старымъ грамотамъ, а в ыные годы черны боръ не надобЪ. А Немецкого двора тебе не затворяти, [ни приставовъ своихъ не приста]вливати; а гостю твоему торговати с нЪмцi нашею братьею. А посломъ и гостемъ на обЪ половины путь имъ чистъ, по Литовскои землЪ и по Новогородцкои. А держати тебЪ, честны король, Велики Новъгородъ в воли мужеи волныхъ, по нашеи старинЪ и по сеи крестнои грамотЪ. А на томъ на всемъ, честны король, крестъ цЪлуи ко всему Великому Новугороду за все свое княжество и за всю раду литовскую, в правду, без всякого извЪта. А новогородцкiе послове цЪловаша крестъ новогородцкою душею къ честному королю за весь Великi Новъгородъ в правду, без всякого извЪта.

Еще больше интересных материалов на нашем телеграм-канале ⏳Вперед в прошлое | Документы и факты⏳

Главная страница  | Обратная связь
COPYRIGHT © 2008-2024  All Rights Reserved.