Се урадиша господине князь псковъскии Василеи Васильевичъ и вси посадники псковъские и весь господине Псковъ на вечи посломъ ехати къ чесному великому королю посадъника псковъского Василья Логиновичъ, да боярина своего Юрья Ивановича, и повелехомъ имъ посольство правити честному великому королю. Первое о обидахъ, што наши купъцы Микифорко купли на заехалъ у Луцъкое торгомъ, и воевода луцъкии того Микипоръка всего ограбилъ, товару много; и ты бы, господине честныи король, тому делу управу далъ по крестному цалованию; а отчина великихъ князеи тобЪ, своему господину, посадъники псковъские, и степеньники, и старие посадники, и сынове посадъничы, и бояре, и соцъкие, и купъцы, и житии люди, и весь Псковъ чоломъ бьетъ. А иное жалуемъся тобе, своему господину, што по твоеи державе, по городомъ воеводы и мещане нашимъ псковичомъ купцомъ с немъцы торговати не дадуть; ино бы, господине честныи и великии король, твои воеводы, и наместницы (В списке: воеводы ниместичи.) нашимъ купцомъ по твоимъ городомъ не бранили торговать с немъцы и со всякимъ гостемъ по миръному доконъчанью и по крестъному цалованью, какъ и твоимъ, (В списке: в томъ.) господине, людемъ во Пскове и по городомъ торгъ со всякимъ гостемъ.

Да и о семъ тобЪ, своему господину, честъному великому королю, чоломъ бьемъ и жалуемъся, што немъцы, князь местеръ, пришедъ на миру, на крестномъ целованьи, и на земълю светое Троицы, на отъчину великихъ князеи, два пригороды псковъскихъ выжъгли, волости пожъгли, хрестиянъство пересекли и въ полонъ свели. А нынечи намъ слышанье, што деи князь местеръ тобе, нашому господину, честному великому королю, бьеть чоломъ на отъчину великихъ князеи, на Псковъ, а проситъ у тебе силы у помочъ на [326] Псковъ, а самъ будучи виноватъ передъ Псковомъ; и ты бы, господине, великии и честныи король, силы князю местеру въ помочь не давалъ на Псковъ; а отъчина великихъ князеи тобе, своему господину, честному великому королю, и посадники псковъские, и степенъныя, и старие посадники и сынове посадъничи, и бояре, и купъцы, и житие люди, и весь Псковъ чоломъ бьеть.

Да и о семъ тобе своему господину чоломъ бъемъ, што князь местеръ нашихъ псковичъ полонилъ, и тые наши полоняне псковичи черезъ твою Литовъскую земълю бегають ко Пскову из Немецъкое земли, и литва тыхъ полоняниковъ ко Пскову не пускають, забавъливають у себе; и ты бы, господине, пожаловалъ, нашихъ полоняниковъ псковичъ своимъ не велелъ приимати. А мы тобе своему господину чоломъ бъемъ.