Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

335

1440 г. декабря 30. — Договорная грамота литовского великого князя Казимира с Псковом

Список XVI в.; перед текстом: Перемирье короля Казимера зо Псковомъ. ЦГАДА, Лит. Метр., Кн. зап. V, л. 285—285 об. — Список 1821 г. ЛБ, собр. Румянцева, № 74, лл. 6—9.

Полевой, I, сс. 101—104; Сборник Муханова, № 2; АЗР, № 38.

Се язъ, великии князь Казимиръ, королевичъ, и з своею братьею конъчали есмо миръ со Пъсковомъ. А прыехали к намъ со Пъскова Ларыонъ Селивестровъ, сынъ посадничъ, Стефанъ Арыстовичъ, а Лука Михаиловичъ, да били намъ чоломъ ото Пъскова, и с тымъ есмо миръ конъчали. А конъчали есмо такъ. Што жъ послу изъ нашее земли, из Литовъское, [322] и гостю, — или ляхъ, или русинъ, или полочанинъ, или витблянинъ и смолнянинъ, — тымъ путь чыстъ изо всее моее отчыны въ Псковскую землю. А гостю торговати во Пъскове без пакости, по старои пошлине со всякимъ гостемъ; такожъ и псковичомъ послу и гостю, изо всее отъчыны Псковское, тымъ всимъ путь чыстъ во всю мою отъчыну, в Литовъскую землю. А гостю торговати во всеи Литовскои земли по старыне без пакости, по старои пошлине, со всякимъ гостемъ. Также и послу псковъскому, кого коли пошлеть ко князю великому московъскому на Москву, путь чыстъ черезъ нашу отчыну, на Смолнескъ тамъ ехати и назадъ отъехати, коли мы, великии князь Казимиръ, будемъ с княземъ великимъ московскимъ в любви. А мне, великому князю Казимиру, блюсти псковитина, какъ и своего литвина; такожъ и псковичомъ блюсти литвина, какъ и псковитина. А межы собою будучы в любви, за холопа, за робу, за должника, за поручники, за смерда, за татя и за розбоиника не стояти ни мне, ни вамъ, а выдати по исправе. А обиднымъ деломъ вложыли есмо рокъ: которыи будуть вчынилися от великого князя Витовтовы смерти до сихъ местъ, тымъ деломъ на обе стороне судъ и справу учынити; а которыи будуть пени вчынили перъво великого князя Витовътовы смерти, или пожжено, или силно пограблено, или головы побиты и иныи пакъ дела, то есмо ему все на обе стороне вчынили отложыли, того не надобе искати нашым (В списке: наиншымъ.) на псковичахъ, ни псковичомъ на нашыхъ. Аже вчыниться пеня гостю в Литве псковъскому, кончать по великого князя правде и по целованью. Аже вчыниться пеня нашымъ, или литвину, или полочанину, или витьбляномъ, или смолняномъ во Пъскове, конъчать по псковъскои правде и по целованью. А рубежъ воде и земли со Пъсковомъ мне, великому князю, а то намъ старыи рубежъ. А сконъчалъ великии князь Казимиръ со всимъ Псковомъ, и со всими прыгороды Псковъскими, и со всею волостью Псковскою по сеи грамоте. Ажъ вчыниться нелюбовъ мне, великому князю, до Пскова, и мне, великому князю, тую грамоту кресную не слати ни на Москву ко князю великому Василью, ни к Новугороду; но положыти мне тую грамоту кресную во Пъскове; а от (В списке: онъ.) того дня, какъ грамота положена, алижъ месецъ проидеть, чотыры недели, тожъ воевати. Такъже ажъ вчынится псковичомъ нелюбовъ со мною з великимъ княземъ Казимиромъ, и псковичомъ грамота хрестная положыти в Вилни; а от того дни, какъ грамота положена, олижъ месецъ проидеть, чотыры недели, тожъ воевати. А на всемъ на семъ я, великии князь Казимиръ, крестъ целовалъ; такъже и послове псковъские крестъ целовали от всего Пскова, по правъде, без всякого извета. А п[и]санъ у Вилни месеца декабря 30 день подъ леты рожества господа нашего Исуса Хрыста 1440 летъ, инъдикъ 4. [323]

Еще больше интересных материалов на нашем телеграм-канале ⏳Вперед в прошлое | Документы и факты⏳

Главная страница  | Обратная связь
COPYRIGHT © 2008-2024  All Rights Reserved.