Се приговорили игуменъ Варламъ, и Федориi старецъ Богдановъ сынъ, и вси старцы Важитцкого монастыря с Васильемъ с ОлексЪевичемъ, и сь Яковомъ Левонтиевичемъ, и с Васильевою женою с Покинарьею о земли МануевЪ и сына его Фомы о селахъ о Кондрускихъ, и о Мандрескихъ, и [о] Кузаранскихъ, и о Тубозерскихъ, о Мануеве земли i сына его Фомы. ВолодЪти имъ на сеи годъ со единого [по] половинамъ. А поемлютъ хлЪбъ i куны и рыбы, ино имъ по половинамъ: игумену Варламу и Федору старцу и всЪмъ старцамъ Вяжитцкого монастыря половина, а Василью АлексЪеву и Якову Левонтиеву другая половина хлЪба, и в кунахъ, и в рыбахъ. А доидетъ сеи годъ от Покрова до Покрова святеи богородицы, коли Святыi духъ церковь каменную ставили, ино володЪти игумену Варламу, и Федору старцу Богданову сыну, и всЪмъ старцамъ Вяжитцкого монастыря Кузаранскою землею и Тубозерскою землею по дЪлнои грамотЪ по Иванови, что былъ дЪлъ Василью и Якову с Федоромъ с Богдановымъ сыномъ, и по купнои грамотЪ Матфееве, что купилъ Матфеи у Ивана у Софьина сына у Маноилова внука, и по володЪнью по Богданову. А Василью Алексееву и Якову Левонтиеву володЪти имъ Кондрускою (В списке: Кондоскою.) землею и Мандрескою землею по дЪлнои грамотЪ по Иванови, что былъ дЪлъ Василью и Якову с Федоромъ с Богдановымъ сыномъ, ино достанется игумену Варламу и Федору Богданову сыну и всЪмъ старцамъ Вяжитцкого монастыря Кузаранда и Тубозеро, а Василью и Якову и Васильеве жены Покинарьi Кондруша и Мандрега. А потворитъ Настасья купную грамоту и сынъ [305] еи Юрье Ивановичь на Кондруские (В списке: Кондушие.) села и на Мандрегискиi села i землю, что есми купила у Фомы, ино Федору Богданову сыну в суду очистить, что есми не продалъ Настасьi ни еи сыну Юрью Ивановичю. А се имъ приговоръ и дЪлъ по дЪлнымъ грамотамъ крЪпокъ и в вЪки. А на семь приговоре людi добрые со обЪ стороны: Панфилеи Селифонтовъ, Юрье Григорьевъ, Иванъ Парфеньевъ, Ондронъ Филистовъ. А хто в семъ приговоре не устоитъ, ино дастъ князю и владыки пять гривенъ золота, а правымъ и старцамъ виноватымъ истицы пятдесятъ рублевъ.