Во имя отца и сына и святого духа. Се азъ рабъ божиi инокъ АлексЪи списахъ рукописание при своемъ животЪ. А приказываю в домъ святого [294] Николы на Вяжища отчину свою в ОбонЪжьi в Толвуi слободцкую землю, и воду и пожни тои земли толвуискои, и полЪшеи лЪсъ, что во отдЪлъ досталось мнЪ от своего брата Ивана, и по дЪлнои грамоте, и [по] старымъ грамотамъ отца своего, и по данои моеи. И ноне тыi грамоты старыi, и дЪлную, и даную далъ есми в домъ святого Николы при своемъ животЪ. Ино по тои грамотЪ по моеи данои все чисто святому НиколЪ, на память батку моему и матке моеи и мнЪ. А что купилъ у меня iгуменъ Якимъ и всЪ старцы святого Николы с Вяжищь в Падмоозере землю, и села, и полЪшеи лЪсъ, и воду на Выгу, а то по ихъ купнымъ грамотамъ чиста тая земля в домъ святого Николы. А что купилъ игуменъ Якимъ у Фешака село, поля, и заполки, и лЪшую землю, а то по ихъ по купнои грамотЪ вся чиста тая земля святому НиколЪ. А что мнЪ будетъ има[ть] коя на людехъ, и язъ то все отдаю бога ради. А ты, брате мои Иване, не вступаисе ни во что ж, ни в землю мою, ни в воду толвуискую, что есми далъ святому Николы, ни в люди мои, а приказалъ есми своему отцу игумену Якиму, и своему господину Арсенью Матфеевичю, и всЪмъ старцамъ святого Николы на Вяжища. И вы, господо, поминаите, коли язъ преставлюся, на томъ и по моихъ родителехъ и по мнЪ. А не виноватъ есми никому ничимъ, развЪ богу душею. А на то послухъ богъ и отецъ мои духовнои игуменъ Якимъ святого Николы с Вяжищъ. А кто се рукописание преступитъ, сужусь с нимъ предъ богомъ.