Во имя отца i сына i святаго духа. Се азъ рабъ божiи Ондреи пишу рукописание при своемъ животЪ своимъ цЪлымъ умомъ. Благословилъ есми двою Iвановъ Матигорскимъ селомъ. А Ступинского села половина Рожеству святому, а другая Оверкею. А на Низу села в Заостровьи Вархацевъ конецъ меншимъ дЪтемъ с матерью. А поидетъ замужъ, ино еи не дати участокъ ничего, i участка еи в земли нЪтъ. А взяти ми: у Филимона у Дмитриева два рубля денегъ, а варилъ на Великомъ мЪсте мои церенъ i дрова тои же Филимонъ пять ноцеи, а то до меня не дохаживало ницто; у Константина Григорьева рубль; а у Пахомья, Вагаева зятя, рубль; а у Федора у Баламута полтина. А что есми занялъ у Ески у Юршина тысяцу, а то есмь ему и заплатилъ. А инЪмъ есмь не виноватъ ницЪмъ. А дати ми святому Николе рубль. А пожаловалъ есми Савку: послужить ему мнЪ до моево живота, а по моемъ животЪ на слободу. А боле того не виноватъ есмь никому ницЪмъ, развее богу душею. А на то послухъ отецъ мои душевныи попъ Федосеи святаго Рожества. А хто се рукописание переступить, сужуся с нимъ предъ богомъ.