Мобильная версия сайта |  RSS
 Обратная связь
DrevLit.Ru - ДревЛит - древние рукописи, манускрипты, документы и тексты
   
<<Вернуться назад

221

Не позднее 1478 г. «Рядная» и «дельная» грамота Якова Александрова сына и его братанов с Настасьей Степановой дочерью и ее детьми о разделе без суда Заволоцкой земли

Список в правой грамоте 1535 г. декабря 27. Подлинник правой грамоты. ЦГАДА, ГКЭ, № 4091/9. Список правой грамоты XVII в. БАН, Архангельское собрание, № 1192, лл. 322 об.—327.

Москвитянин, 1846, № 10, сс. 155167 (по подлиннику); Шахматов, Исследование, прил. I, № VI (по списку); СбГКЭ, I, №76 (по подлиннику).

Основание датировки: рядная составлена до покорения Новгорода великому князю, как видно из ее окончания.

Не идя к суду срядишась рядомъ Яковъ ОлЪксандровъ сынъ и его братаны, Мартемiяновы дЪти, Федоръ и СемЪнъ и ихъ братия с Настасьею Степановою дочерiю и съ ее дЪтми, с Ываномъ и с ОлЪксандромъ. Что искала Настасья и ее дЪти, Иванъ и ОлЪксандръ, на ЯковЪ на ОлЪксандровЪ и на его братанахъ, на ФедорЪ и на СемЪне, и на ихъ братии, на МартЪмiяновыхъ дЪтяхъ, Заволоцкои земли и водЪ и кунъ, по отца своего рукописанью по Степанову, и о тои земли и о водЪ и о кунахъ срядишась рядомъ и розделиша ту землю Заволоцкую. И досташась Настасье и ее дЪтемъ, Ивану и ОлЪксандру, в УимЪ у святаго НиколЪ села и земля, отчина еи Степановщина, и пожни, и ловища, и на Беломъ пЪску земля и вода и пожни по Степанову владЪнiю, и в Тоинокурьи сЪло, и на ПрилукЪ село, и в Тоивутовскомъ село, и на КузнЪцовЪ горЪ село, и в ЛахтЪ за Конечнымъ (В списке XVII в.: Конечными.) село, и на ЛисестровЪ село ДЪмiяновское, а искати Ивану и ОлЪксандру по своимъ управамъ того села ДЪмiяновского самимъ на собя, и на ПитяяевЪ пожни и в СоломбалЪ (Исправлено по списку XVII в.; грамоте № 1535 г.: КоисолобалЪ.) по Степанову владенiю, и в ЗолотицЪ земля и вода по Степанову владЪнiю, и в Уне мЪсто соляное и пожни, и на Кошки и на КЪкусе по Степанову владЪнiю, и на Черномъ наволокЪ нолневода, и на островЪ тоня, и усть Уимы тоня, и Ляхово тоня, и Еремкина тоня, и Жаравково тоня, и на Беломъ пЪску тоня, и на ИвановЪ наволокЪ неводъ, и Холопково тоня, и на Жабии болотЪ тоня. А что куны [245] заволоцкiе в СтЪпановЪ рукописаньи, а тЪ куны Настасьи и ее дЪтемъ А владЪти Настасьи и ее дЪтемъ Ивану и ОлЪксандру тЪми землями, и тонями, и пожнями, и лесами по Степанову владенiю, и по Степанову рукописанiю, и по грамотамъ, и по сеи по ряднои и по делнои грамотЪ и в вЪки и ихъ дЪтемъ. А Якову и его братанамъ Федору и СемЪну и ихъ братиямъ, Мартемiяновымъ дЪтемъ, в тую землю и воду и пожни и в куны не вступатись. А Якову досталось ОлЪксандрову и его братанамъ Федору и Семену [и] ихъ братиямъ, Мартемiяновымъ дЪтемъ, на Лявле островЪ села, и земля и вода, и пожни, (В списке XVII в. далее: и на Летнике земля.) и на ЖаровковЪ земля Степановъ учястокъ, все без вывЪта, и на ЛисестровЪ два села, ФалЪлеево и Окулово владенiе, земля и вода и пожни, и на ИсаковЪ горе земля, (В списке XVII в. далее: и воды и пожни.) и в Пехтокурьи земля и вода и пожни, и на Летники земля Окуловского села, и на ЛевковЪ курьи полсела земли и воды и пожни Степановъ учястокъ, и подъ Банивогою горою тоня, и на Тонкомъ наволокЪ тоня, и усть НаимаксЪ четверть тони, и в НЪлокурьи (В списке XVII в.: Лелокурья.) Степановъ учястокъ тони, и на ЦылнЪмЪ половина тони, и в Пудожми (В списке XVII в.: в Пудожемскомъ.) четверть тони, и в ВарислахтЪ половина тони. А что далъ Степанъ Есиповичь ОндрЪяну и Якову сорокъ рублевъ, а то серебро ОндрЪяну и Якову и в вЪки по Степанову рукописанiю. А что запись Степанова в томъ серебрЪ в сороки рублехъ у Настасьи, а та запись Настасьи подрати. А владЪти Якову ОлЪксандровичю и его братанамъ Федору и Семену и ихъ братiи, Мартемiяновымъ дЪтямъ, тЪми землями, и тонями, и пожнями, и лЪсами по Степанову владЪнiю и по Степанову рукописанiю, и по грамотамъ и по сеи ряднои и делнеи и в вЪки и ихъ дЪтемъ, а Настасьи и ее дЪтемъ Ивану и ОлЪксандру в тую землю и в воды и в пожнi не вступатись. А сеи имъ рядъ и дЪлъ с обЪ половины крЪпокъ и в вЪки и ее дЪтемъ. А потомъ не надобЪ Настасьи и ее дЪтемъ Ивану и ОлЪксандру до Якова до ОлЪксандрова ни до его братановъ до Федора ни до Семена, ни до ихъ братiи, до Мартемiяновыхъ дЪтеи, в семъ орудии ничто же; ни Якову Олександрову ни его братанамъ Федору и СемЪну и ихъ братiи не надобЪ до Настасьи ни до ее дЪтеи, до Ивана и до ОлЪксандра, в семъ орудьи ничто же. Что ся ни дЪялось до сего ряду и до сеи ряднои грамотЪ и до дълнои, не надобЪ до обЪ половины ничто же. А на то рядцы и послуси с обЪ половины: Офоносъ Микулинъ, ОлЪксандръ КлимЪнтьевъ, Иванъ Петровъ, Федоръ Михаиловъ, Митрофанъ Ивановъ, Мартемьянъ Федоровъ, Игнатеи Олександровъ. А хто сеи рядъ порушитъ, дасть князю и владыцЪ десять гривенъ золота. [246]

Еще больше интересных материалов на нашем телеграм-канале ⏳Вперед в прошлое | Документы и факты⏳

Главная страница  | Обратная связь
COPYRIGHT © 2008-2024  All Rights Reserved.