От посадника Великого Новагорода степенного Офонаса Остафьевичя, и от всЪхъ старыхъ посадниковъ, и от тысяцкого Великого Новагорода степенного Михаила ОндрЪевичя, и от всЪхъ старыхъ тысяцкихъ, и от бояръ, и от житьихъ людеи, и от купцовъ, и от черныхъ людеи, и от всего Великого Новагорода. На вечЪ на ЯрославлЪ дворЪ. Се дахомъ черныи боръ [39] на сеи годъ великому князю Василью Васильевичю всея Руси. А послалъ князь великi на черный боръ Семена Яковличя в Торжокъ. А брати князя великого черноборцемъ на новоторжьскихъ волостехъ на всЪхъ, куды пошло по старинЪ, съ сохи по гривнЪ по новои, а писцу княжу мортка съ сохи. А в соху два коня, а третьее припряжь; да тшанъ кожевничскои за соху; неводъ за соху; лавка за соху; плугъ за двЪ сохи; кузнець за соху; четыре пЪшци за соху; лодья за двЪ сохи; црЪнъ за двЪ сохи. А хто сидитъ на исполовьи, на томъ взяти за полсохи. А гдЪ будетъ ноугородець заЪхалъ лодьею, или лавкою торгуетъ, или староста, на томъ не взяти. А кто будетъ одерноватыи, емлетъ мЪсячину, на томъ не взяти. А кто, поверга свои дворъ, а вбЪжитъ в боярьскии дворъ, или кто иметъ соху таити, а изобличать, на томъ взяти вины въдвое за соху. А кормъ з десяти сохъ князя великого черноборцемъ взяти тритцать хлЪбцовъ, баранъ, а любо полоть мяса, трое куровъ, сито заспы, два сыра, бЪкарь соли; а коневого корму пять коробеи овса въ старую коробью, три возы сЪна з десяти сохъ, какъ пошло; по двЪ подводы от стану до стану. А брати имъ, куды и переже сего черноборци брали, по старинЪ.