Се купи Василеи Филимоновичь и ЕвсЪи Онаньинъ у Федоры у Григорьевы дочери и у еи мужа у Федора у Федоровичи сЪло земли на ИжьмЪ Фофановьское, отчину ея: дворъ и дворище, орамыи земли и с притеребы, и пожни с притЪребы, и путики того сЪла, и перевесища того села, и полЪшии лЪсы, и бобровыи ловища, и в тонЪ участокъ у Ижемьского кола шестая часть, со всими угодьи, гдЪ ни есть, все без вывЪта, что ФедорЪ дали братья Аврамъ и Яковъ отчину свою Ижемьское сЪло со всимъ володЪньемъ. А далъ Василеи Филимоновъ и ЕвсЪи Ананьинъ на томъ сЪле ФедорЪ ГригорьевЪ дочери и ее мужу Федору Федоровичю девять сороковъ бЪлъки, а пополонка куря. А купилъ Василеи Филимоновъ и ЕвсЪи Ананьинъ собЪ и своимъ дЪтемъ одерень и в вЪки. Чимъ володЪлъ Григореи Васильевичь и его дочи Федора и зять его Федоръ Федоровичь, тымъ володЪти Василью Филимонову и ЕвсЪю Онаньину [и] ихъ дЪтемъ и в вЪки. А будетъ ЕвсЪю не до земли и его дЪтемъ, ино имъ мимо Василья Филимонова и его дЪтеи земли не продавати никому же, ни ЕвсЪевымъ дЪтемъ мимо Васильевыхъ дЪтеи земли не продовати никому же; ино взяти ЕвсЪю и его дЪтемъ свои куны у Василья у Филимонова и у его дЪтеи полъпята сорока бЪлъки, а земля Василью Филимонову и его дЪтемъ одЪрень и в вЪки. А на то послухи: Яковъ Васильевичь, Лука Павловичь, Семенъ Окуловъ, Иванъ Фоминъ. А у печати стоялъ самъ Федоръ Федоровичь и в жены своеи мЪсто в Федорино. И в отводЪ ялъся и в очищенье самъ Федоръ Федоровичь и жена его Федора.