Се купи игуменъ Василеи у МатфЪя у Урвана у ЛевонтЪева сына дворъ и дворищо все Филипово, и огородець, и за дворомъ наволочокъ орамои земли промежу улицами, и того наволочка лугу половина подъ Михалевьскимъ дворищемъ, и в опцемъ поли гумнища половина Филипова, в опцемъ поли полоса земли и половина болота возли Кривую полосу; половина орамои земли Круглици, у Фомини наволоки орамая земля, [206] в межахъ с Гавриломъ, другая межа от Никольскои земли; двои гоны зе[м]ли орамици, путь по серетки подли Никольскую пожню; на Плоскои веретЪи гоны земли орамици, в межахъ с Савельемъ, другая межа до Гаврилови земли; а иная орамая земля и покроми с верхного конца межа от Гаврилови земли, с нижнего конца межа до Фефилови пожни; надъ Нюрдолою поженка, урЪчище рЪпЪщо и с притеребомъ к Нюрдолиякъ; и орамои земли гоны промежи Никольскою землею у Фомини наволоки у гумнищи у Филипови участки половина. Цимъ володЪлъ МатфЪи Урванъ и братанъ его Васке Мартушовъ, тимъ володЪти игумну Василью орамыи земли и пожни полуучасткомъ Филиповымъ. И далъ игуменъ Василеи на тихъ земляхъ семь сороковъ бЪлки и 10 бЪлъ, овцю пополонка. А купилъ собЪ одерень. А очищивати та земля и пожни МатфЪю Урвану и его дЪтемъ. А на то послухи: Василеи Васильевичь Сасинъ, Несторъ Васильевичь, ТимофЪи Баi, ОнЪкЪи поповичь, Павле ОсЪевъ. А у печати стоялъ и землю завелъ МатфЪи Урванъ.