Сесрядися Василии Федорове и его дЪти, и его братанЪ ОлександровЪ дЪти, Мартемьяне, и Иване, и ОндрЪяне, и Якове с посадникомъ с новгороцкымъ с Ываномъ с Даниловицомь про учястокъ дядЪ своего, про ОндрЪевъ, что купилъ посадникъ Иванъ Даниловиць у игумена святаго Спаса и у всихъ церенцевъ учястокъ ОндрЪевъ, дядЪ ихъ, за Волокомъ [187] в СоломбалЪ Яковцевъ островъ и Карпцевъ островъ, и в СоломбалЪ, что в СоломбалЪ наполъ, и в ЫжмЪ, что с Федоромъ наполъ, и в ЛодмЪ, что с Федоромъ наполъ, и в УнЪ; и в солоныхъ мЪстехъ въ отцинЪ его четвертая чясть, и въ лЪсЪ и въ водЪ въ отцинЪ его четвертая чясть. И взя посадникъ Иванъ Даниловиць на томъ у Василья и у его братановъ, у Олександровыхъ дЪтЪи, на ОндрЪевЪ учясткЪ в СоломбалЪ, чимъ ОндрЪи володЪле сто рублевъ, что купилъ посадникъ Иванъ Даниловиць у черенцевъ святаго Спаса. А боле потомъ не надоби посаднику Ивану Даниловицю ни черенцямъ святаго Спаса въступатись в СоломбалЪ за Волокомъ въ ОндрЪевъ учястокъ. А что ряднЪи грамотЪ у Ивана у посадника с Васильемъ, а тЪ грамотЪ посадникъ Иванъ подраше. А что грамоту взялъ посадникъ Иванъ бесудную на Олександра з дЪтми и на Василья, а ту грамоту посадникъ Иванъ подраше. А что пожня Латиперть, а та пожня знати Ивану по своеи исправЪ, а Василью и его братанамъ, Олександровымъ дЪтемъ, положити свои исправЪ. А потомъ не надоби посаднику Ивану Даниловицю, ни игумену святаго Спаса с Хутина, ни черенцямъ до Василья, ни до его дЪтЪи, ни до его братановъ, до Олександровыхъ дЪтЪи, в томъ орудьи, въ ИвановЪ куплЪ в посадници, ничто же; ни Василью, ни его дЪтемъ, ни его братанамъ, Олександровымъ дЪтемъ, не надоби до посадника до Ивана до Даниловиця, ни до игумена святаго Спаса с Хутина, ни до церенцовъ в томъ орудьи ничто же. А на то рядцЪ с обЪ половинЪ: тысяцкыи Олександръ Игнатьевиць, Яковъ Дмитриевиць, Иванъ Дмитриевиць, Сава Ермолиниць, Иеве Кузмине, Нефедья ПарфЪеве. А у печяти стоялъ въ братьи своеи мЪсто в Мартемьяново и в [Ы]ваново и во ОндрЪяново брать ихъ Якове, а Васильеве мЪсто у печяти стоялъ сынъ его Остафии. А хто сии рядъ поруши, дасть князю и владыцЪ десять гривенъ золота.