По милости божiи святаго Спаса и по благословению архиепископа новгородцкого владыки Iвана. Се дахомъ спинския сябри Григореи по[са]дникъ и Кирила ОндрЪевичь, сынъ посадничь, Захарья Яковлевичь з братьею и Юрьи Дмитриевъ, Кирила Семеновъ в домъ святому Спасу на Веренду игумену и чернцамъ ловища рыбныя во Спинскомъ ободе свое по Веренды реки от озера вверхь по обЪ стороны, докуды имъ любо; а по Видогощи реки дахомъ землю, и лЪсъ, и пожни по обЪ стороны от Веренды реки по Видогощи вверхъ по Спинскои стороны до Серапионова ручья, Серапионовымъ ручьемъ вверхъ да на путь, тЪмъ путемъ в Черевко озерко, из озерка в Мокову рЪчку, рЪчкою в Веренду реку; а по другую сторону Видогощи вверхь до Крутца ручья, Крутцемъ ручьемъ вверхъ до Лошьихъ ямъ, от ямъ в Хлуховское росплавье, Хлухомъ ручьемъ внизъ пожни ВЪтки в Зимникъ, из Зимника в Востище, из Востища посериди грядокъ, из грядокъ в Шерипокъ ручеи, Шерипкомъ в Веренду реку. А паозеричанамъ и веренжанамъ без ыгоменова велЪния в Видогощу реку не вьЪзжати запаса добывати. А игумену святаго Спаса и чернцемъ, и iхъ людемъ, iхъ крестьяномъ по Видогощи реки вверхъ и по Веренды реки вверхъ в лЪсе ослободихомъ всякия запасы добывати; а бразги имъ с того не давати. А приказываю монастырь свои беречи архиепископъ Iванъ господину и брату своему архиепископу Великого Новагорода, кого богъ дастъ, да и дЪтемъ своимъ тысяцкимъ, и [166] посадникамъ, а не было розного жития в дому святаго Спаса и в вЪки. А к сеи грамотЪ приложихомъ свои печати. А то в домъ святому Спасу, игумену и чернцамъ, и в вЪки. А хто сю грамоту переступить, на того богъ и святыи Спасъ.