Список XVI в.; перед текстом: Списокъ с чюдотворцовы Антония Римлянина духовные грамоты. ЛОИИ, собр. актов до 1613 г., № 1, сст. 1—2 (см. № 102).

О подлинности грамоты см.: Валк, стр. 295—300; Тихомиров, сс. 233—241.

Се язъ Антонии, хужши во мнисехъ, изыдохъ на мЪсто сее, не прияхъ и имЪния ото князя ни от епискупа, но токмо благословение от Никиты епискупа. И паша по чюжеи землЪ ни вдвое ни воедино, ни себЪ покоя не дахъ, и братьи и сиротамъ и здЪ крестьяномъ досажая. Да то все управитъ мати божия, что есмь беды принялъ о мЪсте семь. А се поручаю богу и святЪи богородицы и крестьяномъ, и даю в свободу, и се поручаю мЪсто се на игуменство. Хто мое слово худое преступить, судить ему богъ и святая богородица или богъ отведетъ. А кого изберутъ братья, но от братьи, и иже кто в мЪстЪ семъ терпитъ. А которои братъ нашъ да от мЪста сего начнетъ хотЪти игуменства или мздою или насильемъ, да будетъ проклятъ; или ото князя начнетъ по насилью дЪяти кому или по мздЪ, да будетъ проклятъ; или епискупъ по мздЪ начнетъ кого ставити, или инъ станетъ насильствомъ творить на местЪ семъ, да будетъ проклятъ. И се возвещаю: да егда седохъ на мЪсте семъ, далъ есмь на землЪ и на тони семдесятъ гривенъ, на селЪ есмь далъ гривенъ сто на Волховскомъ, ТудорЪ з женою и з детми одерень, Волосъ з женою и з детми одерень, Василеи з женою из детми одерень. Аще сию грамоту хто преступить, да будетъ проклятъ треми сты святыхъ отецъ и осмьюнадесятъ и буди ему со Июдою причастье.

На обороте сставов 1—3:

ЛЪта 7081-го августа въ 15 день, на праздникъ Успенье пречистые владычицы богородицы, на всеношнои у СофЪи премудрости божиi, государь царь и великиi князь Иванъ Васильевичь всея Русиi сеи списка з духовнои грамоте Онтонья чюдотворца слушалъ и, выслушавъ, пожаловалъ в своеи государеве отчины в Великомъ НовЪгороде в своемъ государеве богомолье, в ОнтоновЪ монастырЪ, игумена Мисаила з братьею, или иные по немъ игумены в томъ манастыри будутъ. Ходити имъ по сеи духовнои по старинЪ; и грамоту имъ государь жаловалную пожаловалъ далъ и велЪлъ подписати свою государеву жаловалную грамоту дiяку своему ноугородцкому Ивану Собакину. А подписалъ на семъ списку по государеву цареву и великого князя Ивана Васильевича всеа Русiи приказу дiякъ Iванъ Собакiнъ.

Лета 7114-го июля в 30 день государь царь и великии князь Василеи Ивановичь всеа Русиi сего списка з духовные грамоты чюдотворца Онтония слушалъ, а, выслушавъ, в своеи отчине в Великомъ НовЪгороде Онтонова монастыря игумена Харитона з братьею, или хто по немъ в томъ монастырЪ иныи iгуменъ будетъ, пожаловалъ, велЪлъ имъ по сеи духовнои ходити по старине, и грамоты имъ жаловалные велЪлъ подписати на свое царево и великого князя Василья Ивановича всеа Русиi имя. Государевъ царевъ и великого князя Василья Ивановича всеа Русiи дiакъ ЗахарЪи Свiязевъ.

Лета 7125 июня въ 24 день государь царь и великии князь Михаило Федоровичь всеа Русии сего списка з духовные грамоты чюдотворца Онтония слушалъ, а, выслушавъ, Онтонова монастыря игумена Павла з братиею, или хто по немъ в томъ монастырЪ иныи игуменъ и братия будутъ, пожаловалъ, велЪлъ имъ по сеи духовнои ходити по старинЪ, и грамоты имъ жаловалные велЪлъ подписать на свое царево и великого князя Михаила Федоровича всеа Русии имя. А подписалъ государевъ царевъ и великого князя Михаила Федоровича всеа Русiи дiакъ Иванъ Болотниковъ.