Подлинник на пергамене; в нижней части немного оборван и подклеен бумагой. Печать свинцовая круглая на бечевке; на одной стороне изображение богоматери типа «Знамение» с надписями: *** (матерь божия.) и *** (Иисус Христос.); на другой: *** (Феоктист, архиепископ Новгородский), ЦГАДА, Гос. Древлехр., отд. I, рубр. III, № 8.

Благословление от владыкы, поклонъ от посадника Гюргя, и от [ты]сячкого, (В прямых скобках здесь и далее стершиеся части текста.) и от всЪхъ старЪишихъ, и от всЪхъ мьншихъ, и [от всего] Новагорода господину князю Михаилу. На семь, княже, цЪлуи хрьстъ къ всему Новугороду, на чемь цЪловали дЪди и отець твои Ярославъ. Новгородъ ти дьржати въ старинЪ, по пошлин[Ъ]. Что волостии новгородьскыхъ, тЪхъ волостии, княже, не [дь]ржати ти своими мужи, дьржати мужи новгородьскы[ми]; а даръ, княже, тобъ емати от тЪхъ волостии. А бес посадника ти, княже, суда не судити, ни волостии роздавати, ни грамотъ даяти. А без вины мужа волости не лишити ти. А что ти, княже, пошло на Тържьку и на ВолоцЪ: тивунъ свои дьржати на своеи части, а новгородца на своеи части. А въ БЪжичахъ тобЪ, княже, ни твоеи княгыни, ни твоимъ бояромъ, ни твоимъ слугамъ селъ не дьржати, ни куггати, ни даромъ приимати, и по всеи волости Новгородьскои. А се, княже, волости новгородьскыя: Волокъ съ всЪми волостьми, Тържькъ, БЪжицЪ, Городьць Палиць, Мелеча, Шипино, Егна, Заволочие, ТьрЪ, Пьрмь, Печера. Югра, Волъгда. А свинье бити за 60 вьрстъ от города. А в Русу ти, княже, ездити на третьюю зиму. А лЪтЪ ездити на Озвадъ звЪри гонитъ. А в Ладогу ти, княже, слати осетрьника и медовара по грамотЪ дЪда твоего Ярослава. А ездити тобЪ, княже, въ Ладогу на третиее лъто. А из БЪжиць, княже, людии не выводите въ свою волость, ни из ынои волости новгородьскои, ни грамотъ имъ даяти, ни закладниковъ приимати ни твоеи княгыни, ни бояромъ твоимъ, ни слугамъ твоимъ: ни смЪрда, ни купцины. А грамотъ ти не посужати. А пожнЪ, что твое и твоихъ мужь пошло, то твое и твоихъ мужь; а новгородьское Новугороду. А [16] дворяномъ твоимъ, како пошло, погонъ емати: от князя по 5 кунъ, а от тиу[на] по 2 кунЪ. А что, княже, мытъ по Суждальскои земли и въ твоеи волости, от воза имати по 2 вЪкшЪ, и от лодье, и от хмелна короба, и от льняна. А дворяномъ твоимъ у купьць повозовъ не емати, развЪ ратнои вЪсти. А свободъ ти, ни мытъ на Новгородьскои волости не ставити. А холопъ или роба почнеть вадити на господу, тому ти вЪры не яти. А на Низу тобЪ, княже, новгородца не судити, ни волостии роздавати. А кто почнеть вадити к тобЪ, тому ти вЪры не яти. А въ НЪмЪчкомъ дворЪ тобЪ, княже, търговати нашею братьею; а двора не затваряти; а приставовъ не приставливати. А гости нашему гостити по Суждальскои земли безъ рубежа, по цесаревЪ грамотЪ. А судье слати тобЪ свое на Петровъ день, тако пошло. А вывода ти, княже, межю Суждальскою землею и Новгородьскою не чинити. А что закладниковъ въ Търъжку или инде, или за тобою, или за княгынею, или за мужи твоими: кто купьць, поидеть въ свое сто; а смЪрдъ поидеть въ свои погостъ; тако пошло в НовЪгородЪ, отпусти ихъ прочь. А за Волокъ ти своего мужа не слати, слати новгородца; а тобЪ серебро емати. А гнЪва ти, княже, до Новагорода не дьржати ни до одиного человека. А ряду въ Новгородьскои волости тобЪ, княже, и твоимъ судиямъ не посужати. А самосуда не замышляти. А старостЪ ни холопа ни робы безъ господаря твоимъ судиямъ не судити. А за рубежь из Новгородьскои волости твоимъ дворяномъ суда не водити, ни судити. (Далее одна неразобранная буква.) А свободъ ти и селъ съступитися. А про землю и про [села]: кто у кого будеть купилъ, знаеть своего истьца про куны, а земля къ святои Софии.