Подлинник на пергамене; в некоторых местах подклеен бумагой; на обороте крупным почерком, современным грамоте: Се приехаша послы от Менгу Темеря цесаря (В подлиннике: цря и под титлом: с; так и в последующих грамотах.) сажатъ Ярослава съ грамотою Чевгу и Баиши; другим почерком и обратно первой записи: Княжа Ярослава Ярославлич. Печать свинцовая круглая на шелковом шнурке, повреждена; на одной стороне [12] изображение св. Афанасия Александрийского; на другой — св. Федора Стратилата. Следы прикрепления еще двух печатей. ЦГАДА, Гос. Древлехр., отд. 1, рубр. III, № 3.

Благословление от владыкы, поклонъ от посадника Павше, и от всЪхъ старЪшиихъ, и от всЪхъ меншихъ, и от всего Новагорода къ господину князю Ярославу. На семь, княже, цЪлуи хрьстъ къ всему Новугороду, на цЪмь то целовали дЪди и отець твои Ярославъ. Новгородъ ти дЪржати въ старинЪ, по пошлинЪ. Что волостии всехъ новгородьскыхъ, тЪхъ волостии, княже, не держати ти своими мужи, нъ держати мужи новгородьскыми; а даръ, княже, тобе имати от техъ волостии. А бес посадника ти, княже, суда не судити, ни волостии раздавати, ни грамотъ ти даяти. А кому волости роздаялъ Дмитрии съ новгородци и Александръ, брать твои, тЪхъ волостии тобе без вины не лишати. А что ти, княже, пошло на Торожку и на ВолочЪ: тивунъ свои дьржати на своей чясти, а новгородець на своей чясти. А въ Бежичяхъ тобе, княже, ни твоеи княгыни, ни твоимъ бояромъ, ни твоимъ слугамъ селъ не держати, ни купити, ни даромъ приимати, и по всей волости Новгородьскои. А се, княже, волости новгородьскые: Волокъ съ всеми волостьми, Торжекъ, Бежиче, Городець Палиць, Мелечя, Шипино, Егна, Заволочье, ТрЪ, Перемь, Печера, Югра, Вологда. А в Русу ти, княже, ездити на третиюю зиму. А лЪтЪ, княже, ездити на Озвадо звери гонитъ. А в Ладогу, княже, слати осетрьникъ и медовара по грамоте отца своего Ярослава; а ту грамоту, княже, отъялъ еси, а та грамота, княже, дати ти назадъ. А в Ладогу, княже, ездити на третиее лъто. А из Бежиць, княже, людии нЪ выводите въ свою волость, ни изъ инои волости новгородьскои, ни грамотъ имъ даяти, ни закладниковъ приимати ни твоеи княгыни, ни бояромъ твоимъ, ни слугамъ твоимъ: ни смерда, ни купцины. А без вины ти, княже, мужа без вины не лишати волости. А грамотъ ти не посужати. А пожне, княже, что твое и твоихъ мужь пошло, то твое и твоихъ мужь. А что былъ отъялъ братъ твои Александръ пожне, то ти не надобе. А что, княже, грамоты посубилъ еси отца своего и брата своего, а свое грамоты подаялъ еси на ты грамоты, ты грамоты отъимати, а старые оправливати. А что, княже, братъ твои Александръ дЪялъ насилие на НовегородЪ, того ти ся отступите. А дворяномъ твоимъ, како пошло, погонъ имати: от князя по 5 кунъ, а от тивуна по 2 куне. А что, княже, мытъ по Суждальскои земли и въ твоеи волости: от воза имати по 2 векши, и от лодье, и от хмЪлна короба, и от лняна. [13] А дворяномъ твоимъ у купчевъ повозовъ не имати, разве ратнои вести. А свободъ ти, ни мытъ на Новгородьскои волости не ставите. А на Имоволозьскомъ погосте куны ти имати и на Важаньскомъ. А что еси, княже, отъимъ у Кюрили Хотуниче, (Хотуниче написано крупнее, буквы стоят свободнее.) далъ еси попу святаго Михаила, а городискымъ попомъ не пошло дани има[ти] на новгородьскомъ погосте, вдаи опять. А холопъ или роба почнеть вадити на господу, тому ти вЪры не яти. А на Низу, княже, новгородца не судити, ни дании ти раздавати. А что, къняже, тобе было гнЪва на посадника и на всь Новгородъ, то ти, княже, все нелюбье отложити и от мала и от велика, не мщати ти ни судомь, ни чим же. А кто почнеть вадити к тобе, тому ти веры не яти. А про послы, княже, и про купче новгородьскые, что въ КостромЪ и по инымъ городомъ, то, исправивъ, пусти въ Новъгородъ съ товаромъ. А въ Немецьскомъ дворЪ тобе торговати нашею братиею; а двора ти не затваряти; а приставовъ ти не приста[в]ливати. А про полонъ, кто кде заточенъ, или человекъ, или конь русьскыи и новгородьскыи, то исправи. А село святои Софии исправи къ святои Софии. А до владыкы, отча нашего, гнЪва ти не держати. На томъ, господине, на всемь крьстъ цЪлуи къ всему Новугороду. А гости нашему гостити по Суждальскои земли безъ рубежа, по цесаревЪ грамоте. А судье слати на Петровъ день, тако пошло. А вывода, ти, княже, межи Суждальскою землею и Новъмьгородомъ не чинити. А что закладниковъ за Гюргемь на Торожку или за тобою, или за кн[я]гынею, или за мужи твоими: кто купець, тотъ въ сто; а кто смердъ, а тот потягнеть въ свои погостъ; тако пошло НовегородЪ, отпустите ихъ проць.